ସୋର, ୭ା୭(ଡି.ଏନ.ଏ.): ବାଲେଶ୍ୱର ଜିଲା ସୋର- ବାଗୁଡି ରାସ୍ତା ମରଣଯନ୍ତା ପାଲଟିଛି। ସୋର ତହସିଲ ଅଧୀନ ବାଗୁଡି ଖଞ୍ଜାମାହାଲ ପଥର ଖାଦାନର ପଥର ଓ ପାହାଡ ମାଟିରେ ଉପକୂଳ ଓଡିଶାର ରାସ୍ତା ନିର୍ମାଣ କୋଟି ଟଙ୍କାର ରାଜସ୍ବ ଆଦାୟ ହେଉଥିବା ବେଳେ ଦୀପତଳ ଅନ୍ଧାର ଭଳି ଏହି ଖାଦାନ ସଂଲଗ୍ନ ରାସ୍ତା ମରଣଯନ୍ତା ପାଲଟିଛି।
ଏହି ରାସ୍ତାଦେଇ ପ୍ରତିଦିନ ହଜାର ହଜାର ଭାରିଯାନ ଡମ୍ପର, ୧୦ଚକିଆ ଯାନ, ଟ୍ରକ ଓ ଟ୍ରାକ୍ଟର ବେପରୁଆ ଭାବେ ଓଭରଲୋଡ଼ିଂ କରି ଯାତାୟାତ କରୁଛି। ରାସ୍ତା ପ୍ରତି କେହି ଦୃଷ୍ଟି ନିକ୍ଷେପ କରୁ ନ ଥିବାରୁ ଅବସ୍ଥା ଅତ୍ୟନ୍ତ ଶୋଚନୀୟ ହୋଇପଡ଼ିଛି। ବିଶେଷ କରି ବାଗୁଡ଼ି ବଜାରଠାରୁ ଆଙ୍ଗୁଳା ଛକ ପର୍ଯ୍ୟନ୍ତ ରାସ୍ତା ଉପରେ ଆଣ୍ଠୁଏ ଲେଖାଏଁ ଗାତ ହୋଇଥିବାରୁ ସାଧାରଣ ଲୋକେ ଯାତାୟାତରେ ଘୋର ଅସୁବିଧାର ସମ୍ମୁଖୀନ ହେଉଛନ୍ତି। ଫଳରେ ଅଧିକାଂଶ ସମୟରେ ଦୁର୍ଘଟଣା ଘଟି ଧନଜୀବନ ନଷ୍ଟ ହେଉଛି। ବର୍ଷା ଯୋଗୁ ରାସ୍ତାଟି ଅଧିକ ବିପଦଜନକ ହୋଇ ଯାତାୟାତ ଅସମ୍ଭବ ହୋଇପଡ଼ିଛି। ଏହି ରାସ୍ତାକୁ ପୂର୍ତ୍ତ ବିଭାଗ ତରଫରୁ ପୁନର୍ନିମାଣ କରିବା ପାଇଁ ୧୦କୋଟି ଟଙ୍କା ୨୦୨୦-୨୧ ଆର୍ଥକ ବର୍ଷରେ ବ୍ୟୟ ହୋଇଥିଲା। ଏହାକୁ ଟେଣ୍ଡର ନେଇଥିବା ଠିକାଦାର ଶେଷ ମୁହୂର୍ତ୍ତରେ ଏଗ୍ରିମେଣ୍ଟ ନ କରି ଛାଡ଼ି ଚାଲିଯାଇଥିଲେ। ପୁନଶ୍ଚ ଏହି କାର୍ଯ୍ୟ ପାଇଁ ନୂତନ ଭାବେ ଟେଣ୍ଡର ହୋଇ ଗତ ମାର୍ଚ୍ଚରେ ଶ୍ରୀଗଣେଶ ଅଗ୍ରୱାଲ କାର୍ଯ୍ୟାଦେଶ ନେଇଥିଲେ ସୁଦ୍ଧା ଏହାର ୧୧ମାସ ଅବଧି ଭିତରୁ ୫ ମାସ ଅତିକ୍ରମ ହୋଇଯାଇଥିବା ବେଳେ ବରଫକଳ ଛକ ନିକଟରୁ ମାଣତ୍ରୀଛକ ପର୍ଯ୍ୟନ୍ତ ଗାର୍ଡ଼ୱାଲ କରି ଛାଡ଼ି ଦିଆଯାଇଛି। ନିୟମ ଅନୁସାରେ ଠିକାଦାର ଏହି କାର୍ଯ୍ୟ କରୁଥିବା ବେଳେ ଜନସାଧାରଣଙ୍କର ଗତାଗତ, ଯାତ୍ରୀ ପରିବହନରେ କୌଣସି ଅସବୁିଧା ନ ହେବା ପାଇଁ ଦୃଷ୍ଟି ଦେବା କଥା। ମାତ୍ର ରାସ୍ତା ଅବସ୍ଥା ଅତ୍ୟନ୍ତ ଶୋଚନୀୟ ହୋଇପଡୁ ଥିବା ବେଳେ ଏହାକୁ ମରାମତି କରାଯାଉନାହଁି। ଫଳରେ ଟ୍ରକ, ଡମ୍ପର ବ୍ୟତୀତ ଛୋଟ ଗାଡ଼ି, ବାଇକ୍, ସାଇକେଲରେ ଏହି ରାସ୍ତାରେ ଯାତାୟାତ କରିବା ଅସମ୍ଭବ ହୋଇପଡ଼ୁଛି। ଫଳରେ ସ୍ଥାନୀୟ ଅଞ୍ଚଳରେ ଜନଅସନ୍ତୋଷ ତେଜୁଛି। ତୁରନ୍ତ ଏହି ରାସ୍ତାକୁ ମରାମତି କରିବା ସହିତ ରାସ୍ତା ନିର୍ମାଣ କାର୍ଯ୍ୟକୁ ତ୍ୱରାନ୍ବିତ କରିବା ପାଇଁ ସାଧାରଣରେ ଦାବି ହୋଇଛି।