ନୂଆଦିଲ୍ଲୀ,୨୦ା୨: ଭାରତର ଗଣତନ୍ତ୍ର ଉପରେ ବିଲିୟନେୟାର୍ ବିଜ୍ନେସ୍ମ୍ୟାନ୍ ଜର୍ଜ ସୋରୋସ୍ଙ୍କ ମନ୍ତବ୍ୟ ଦେଶରେ ବିତର୍କ ସୃଷ୍ଟି କରିଛି। ଜର୍ମାନୀର ମ୍ୟୁନିକ୍ ସୁରକ୍ଷା ସମ୍ମିଳନୀରେ ସୋରୋସ୍ କହିଥିଲେ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଗଣତନ୍ତ୍ର ସପକ୍ଷବାଦୀ ନୁହନ୍ତି। ବିଶିଷ୍ଟ ଶିଳ୍ପପତି ଗୌତମ ଆଦାନୀଙ୍କ ସହ ମୋଦିଙ୍କ ସମ୍ପର୍କକୁ ନେଇ ମଧ୍ୟ ସେ ପ୍ରଶ୍ନ ଉଠାଇଥିଲେ। ଇତିମଧ୍ୟରେ ସୋରୋସ୍ଙ୍କ ମନ୍ତବ୍ୟକୁ ନେଇ କେନ୍ଦ୍ରର କ୍ୟାବିନେଟ୍ ମନ୍ତ୍ରୀମାନେ କଡ଼ା ଜବାବ ଦେବା ପାଇଁ ଆଗେଇ ଆସିଛନ୍ତି। ମହିଳା ଓ ଶିଶୁ ବିକାଶ ମନ୍ତ୍ରୀ ସ୍ମୃତି ଇରାନୀ ସୋରୋସ୍ଙ୍କୁ ଜଣେ ଆର୍ଥିକ ଯୁଦ୍ଧ ଅପରାଧୀ ଭାବେ ଅଭିହିତ କରିଥିବାବେଳେ ବହିର୍ବ୍ୟାପାର ମନ୍ତ୍ରୀ ଏସ୍. ଜୟଶଙ୍କର ତାଙ୍କୁ ବୃଦ୍ଧ, ଧନୀ, କୁହାଳିଆ ଓ ବିପଜ୍ଜନନ ବ୍ୟକ୍ତି ବୋଲି ସମାଲୋଚନା କରିଛନ୍ତି।
ଭୂରାଜନୈତିକ ବିଶେଷଜ୍ଞ ଅଭିଜିତ ଆୟର ମିତ୍ରଙ୍କ ମତରେ ମୋଦିଙ୍କ ସହ ଆଦାନୀଙ୍କ ସମ୍ପର୍କ ତୁଳନାରେ ସୋରୋସ୍ଙ୍କ ସହ କଂଗ୍ରେସର ଅଧିକ ସମ୍ପର୍କ ରହିଛି। ଆମେରିକୀୟ ଶର୍ଟ ସେଲର୍ ହିଣ୍ଡେନ୍ବର୍ଗ ରିସର୍ଚ୍ଚ ଆଦାନୀ ଗ୍ରୁପ୍ ବିରୋଧରେ ଷ୍ଟକ୍ସ ଓ ଆକାଉଣ୍ଟସ୍ ହେରଫେର ନେଇ ଏକ ଚାଞ୍ଚଲ୍ୟକର ରିପୋର୍ଟ ପ୍ରଘଟ କରିଥିଲା। କଂଗ୍ରେସ ସମେତ ବିରୋଧୀ ଦଳଗୁଡ଼ିକ ଏହାର ଯୁଗ୍ମ ସଂସଦୀୟ କମିଟି (ଜେପିସି) ତଦନ୍ତ ଦାବିରେ ଅଡ଼ିବସିଥିବାବେଳେ ଶୁକ୍ରବାର ମ୍ୟୁନିକ୍ ସିକ୍ୟୁରିଟି କନ୍ଫରେନ୍ସ (ଏମ୍ଏସ୍ସି-୨୦୨୩)ରେ ୯୨ ବର୍ଷୀୟ ସୋରୋସ୍ କହିଥିଲେ, ଆଦାନୀ ଗ୍ରୁପ୍କୁ ନେଇ ବିଦେଶୀ ନିବେଶକଙ୍କ ପ୍ରଶ୍ନ ଏବଂ ଭାରତୀୟ ପାର୍ଲାମେଣ୍ଟରେ ଆସିଥିବା ଅଭିଯୋଗଗୁଡ଼ିକର ଉତ୍ତର ପ୍ରଧାନମନ୍ତ୍ରୀ ମୋଦିଙ୍କୁ ଦେବାକୁ ପଡ଼ିବ। ଅନ୍ୟପକ୍ଷେ ସୋରୋସ୍ଙ୍କ ଅବାଞ୍ଛିତ ମନ୍ତବ୍ୟ ଭାରତୀୟ ଗଣତନ୍ତ୍ରକୁ ଦୁର୍ବଳ କରିବା ପାଇଁ ଉଦ୍ଦିଷ୍ଟ ବୋଲି ଭାଜପା ଜବାବ ଦେଇଛି। ସ୍ମରଣଯୋଗ୍ୟ, ୨୦୧୯ ସେପ୍ଟେମ୍ବର ୨୨ରେ ଆମେରିକାର ଟେକ୍ସାସ୍ ଇଣ୍ଡିଆ ଫୋରମ୍ ପକ୍ଷରୁ ଆୟୋଜିତ ‘ହାଓଡି ମୋଦି’ କାର୍ଯ୍ୟକ୍ରମରେ ଯୋଗଦେଇ ପ୍ରଧାନମନ୍ତ୍ରୀ ମୋଦି ପୂର୍ବତନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ଙ୍କ ସପକ୍ଷରେ ପ୍ରଚାର କରିଥିଲେ।
ମୋଦି ‘ଅବ୍ କୀ ବାର୍ ଟ୍ରମ୍ପ୍ ସରକାର’ ସ୍ଲୋଗାନ ଦେଇ ଆମେରିକାରେ ବସବାସ କରୁଥିବା ଭାରତୀୟ ଭୋଟରଙ୍କୁ ପ୍ରଭାବିତ କରିବାକୁ ଉଦ୍ୟମ କରିଥିଲେ। କିନ୍ତୁ ରାଷ୍ଟ୍ରପତି ନିର୍ବାଚନରେ ଟ୍ରମ୍ପ୍ଙ୍କୁ ପରାଜୟର ମୁହଁ ଦେଖିବାକୁ ପଡ଼ିଥିଲା। ଯଦି ମୋଦି ଆମେରିକା ରାଜନୀତିରେ ହସ୍ତକ୍ଷେପ କରିପାରୁଛନ୍ତି ତେବେ ସୋରୋସ୍ ଭାରତୀୟ ରାଜନୀତି ଓ ଗଣତନ୍ତ୍ର ଉପରେ ମନ୍ତବ୍ୟ ଦେବା ଆଦୌ ଅବାଞ୍ଛିତ ନୁହେଁ ବୋଲି ମତ ପ୍ରକାଶ ପାଇଛି।