କୁହାଯାଏ କ୍ରୋଧ ମଣିଷର ଏମିତି ଏକ ଶତ୍ରୁ, ଯାହା ନିଜ ସହ ଅନ୍ୟକୁ ବି କ୍ଷତି ପହଞ୍ଚାଇଥାଏ। ଏଥିପାଇଁ କେବେକେବେ ବନ୍ଧୁତାର ସମ୍ପର୍କ ହେଉ ଅବା ପରିବାର କିମ୍ବା ଅନ୍ୟ କାହା ସହ ଭୁଲ୍ ବୁଝାମଣା କିମ୍ବା ଝଗଡ଼ା ହୋଇଯାଏ। ଆଉ ଏମିତିରେ କ୍ରୋଧବଶତଃ କାହା ସହ ଝଗଡ଼ା କରିବା କିମ୍ବା କାହାକୁ କିଛି କହିଦେବା ହେଉ ଅବା କୌଣସି ଭୁଲ୍ ବୁଝାମଣାବଶତଃ ମନାନ୍ତର ହୋଇ କଥାବାର୍ତ୍ତା ବନ୍ଦ ହୋଇଯାଏ। ହେଲେ ଏହାଦ୍ୱାରା ସବୁବେଳେ ସମ୍ପର୍କରେ ତିକ୍ତତା ବୃଦ୍ଧିପାଏ। କିନ୍ତୁ ଯେଉଁମାନେ ନିଜର ଭୁଲ ବୁଝି ଯଥା ସମୟରେ ଏଥିପାଇଁ ଅନୁତାପ କରି କ୍ଷମା ମାଗିନିଅନ୍ତି ଏବଂ ଅପରପକ୍ଷ ସବୁ କିଛି ଭୁଲି କ୍ଷମା କରିଦିଅନ୍ତି, ସେଠାରେ ସମ୍ପର୍କ ପୁନର୍ବାର ପୂର୍ବପରି ଗଢ଼ିଉଠେ।
ଦିଏ ମାନସିକ ଶାନ୍ତି: କେବେକେବେ କୌଣସି ଅପ୍ରୀତିକର ପରିସ୍ଥିତି, ଭୁଲ୍ ବୁଝାମଣା, ଝଗଡ଼ା ଭଳି କାରଣରୁ କେହି ଆପଣଙ୍କୁ ମାନସିକ ଆଘାତ ଦେଇଥା’ନ୍ତି ଏବଂ ଆପଣ ସମ୍ପୂର୍ଣ୍ଣ ଭାବେ ତାଙ୍କଠାରୁ ବିମୁଖ ହୋଇଯାଆନ୍ତି। କିନ୍ତୁ ପୁନର୍ବାର ପରବର୍ତ୍ତୀ ସମୟରେ ପରିସ୍ଥିତି ସୁଧାରିବା ଲାଗି ଚାହାନ୍ତି, ପ୍ରଥମେ ଆପଣ ତାଙ୍କୁ କ୍ଷମା କରିବା ଦରକାର। କାରଣ ଯେଉଁ ପର୍ଯ୍ୟନ୍ତ ଜିଦ୍ କିମ୍ବା ରାଗକୁ ମନ ଭିତରେ ସାଇତି ରଖିଥିବେ ସେ ପର୍ଯ୍ୟନ୍ତ ମନ ଆବଦ୍ଧ ବା ବନ୍ଧନ ଭିତରେ ରହି ଭୁଲ୍ ଠିକ୍ର ବିଚାର କରିପାରିବ ନାହିଁ। ଏମିତିରେ ସମ୍ପର୍କ ସୁଧୁରିବା ବଦଳରେ ଦିନକୁ ଦିନ ଖରାପ ହେବ। ହେଲେ ଥରେ ଏସବୁ ଭୁଲି ହୃଦୟର ସହ କ୍ଷମା ମାଗିବା ଏବଂ ଅପରପକ୍ଷ କ୍ଷମା କରିଦେବା ଦ୍ୱାରା ମନ ହାଲୁକା ହୋଇଯାଏ ଏବଂ ଏକ ବନ୍ଧନମୁକ୍ତ ଅନୁଭବ ସୃଷ୍ଟି ହୋଇଥାଏ।
ସ୍ବାସ୍ଥ୍ୟ ଉପରେ ପକାଏ ସୁପ୍ରଭାବ:
ଜନ୍ ହପ୍କିନ୍ସ ସ୍କୁଲ ଅଫ୍ ମେଡିସିନର ବିଶେଷଜ୍ଞ କାରେନ୍ ସ୍ବାର୍ଜଙ୍କ ଏକ ଗବେଷଣା ରିପୋର୍ଟ ମୁତାବକ, କାହାଦ୍ୱାରା ଗଭୀର ମାନସିକ ଆଘାତ ପାଇବା ଯୋଗୁ ମନସ୍ତାପରେ ରହିବା କିମ୍ବା ରାଗିବା ଦ୍ୱାରା ଶରୀରରେ ବିଭିନ୍ନ ପ୍ରତିକ୍ରିୟା ଘଟିଥାଏ। ଅନିୟମିତ ରକ୍ତପ୍ରବାହ, ରକ୍ତଚାପରେ ପରିବର୍ତ୍ତନ ଇତ୍ୟାଦି ଯୋଗୁ ଅବସାଦ, ମଧୁମେହ ଏବଂ ହୃଦ୍ଘାତ ଭଳି ସମସ୍ୟାର ବି ଆଶଙ୍କା ବଢ଼ିଥାଏ। ହେଲେ ଏଭଳି ପରିସ୍ଥିତିରେ କ୍ଷମା ଆଚରଣ ଦ୍ୱାରା ପରିସ୍ଥିତି ସୁଧୁରିବା, ସମ୍ପର୍କ ମଜଭୁତ ହେବା ସହ ମନ ଚାପ ଓ ଅବସାଦମୁକ୍ତ ହୋଇ ଖୁସିହେବା ଯୋଗୁ ଶରୀର ମଧ୍ୟ ସୁସ୍ଥ ରହିଥାଏ।
ମନେରଖନ୍ତୁ…
କ୍ଷମା କରି ପରିସ୍ଥିତି ସୁଧାରିବାକୁ ଚାହୁଁଥିଲେ ପ୍ରଥମେ ନିଜ ମନକୁ ପ୍ରସ୍ତୁତ କରନ୍ତୁ ଏବଂ ହୃଦୟର ସହ କ୍ଷମା କରନ୍ତୁ। ଅନ୍ୟକୁ ନିନ୍ଦା କରିବା କିମ୍ବା ବିରୋଧରେ ଗପିବା ଭଳି କାର୍ଯ୍ୟ ଆଦୌ କରନ୍ତୁ ନାହିଁ। କାରଣ ଏହା ଦୁର୍ବଳମନା ଏବଂ ଖଳପ୍ରକୃତିର ପରିଚୟ ଦେଇଥାଏ। ତା’ଛଡ଼ା ଏଭଳି ପରିସ୍ଥିତିର ଅନ୍ୟମାନେ ସୁଯୋଗ ନେଇ ସମ୍ପର୍କକୁ ଆହୁରି ଖରାପ କରିପାରନ୍ତି।
କ୍ଷମାକରି ଆଗକୁ ବଢ଼ିବାର ନିଷ୍ପତ୍ତି ନେବା ମାତ୍ରେ ଅତୀତର କେଉଁ ଘଟଣା ଲାଗି ମନୋମାଳିନ୍ୟ ହୋଇଥିଲା ତାହାକୁ ସମ୍ପୂର୍ଣ୍ଣ ଭାବେ ଭୁଲିଯାଆନ୍ତୁ। ଏ ସମ୍ପର୍କରେ ପୁନର୍ବାର ଆଲୋଚନା ମଧ୍ୟ କରନ୍ତୁ ନାହିଁ। କାରଣ ଏହାଦ୍ୱାରା ପରସ୍ପର ମଧ୍ୟରେ ପୁନର୍ବାର ମନୋମାଳିନ୍ୟ ହେବାର ଆଶଙ୍କା ଥାଏ। ତା’ଛଡ଼ା ଏହାଦ୍ୱାରା ଅପରପକ୍ଷକୁ ଅପମାନବୋଧ କରାଇବା ସହ କଥା ହେବାକୁ ସଙ୍କୋଚ ଲାଗିପାରେ।