ଗଜପତି,୨୫।୪(ଡି.ଏନ.ଏ): ଗଜପତି ଜିଲା ନବୋଦୟ ଛାତ୍ରୀ ସୌଦାମିନୀ ରୋଇତ ମୃତ୍ୟୁ ଘଟଣାର ୬୫ ଦିନ ପରେ ମଧ୍ୟ ପୋଲିସ ଘଟଣାର ତଦନ୍ତ କରି ଦୋଷୀଙ୍କୁ ଚିହ୍ନଟ କରିବାରେ ବିଫଳ ହୋଇଛି। ଏହି ଅଭିଯୋଗରେ ମୃତ ଛାତ୍ରୀ ସୌଦାମିନୀଙ୍କ ପରିବାର ଲୋକଙ୍କୁ ସମର୍ଥନ ଜଣାଇ ମାର୍କସବାଦୀ କମ୍ୟୁନିଷ୍ଟ ତରଫରୁ ପାରଳାଖେମୁଣ୍ଡି ବସଷ୍ଟାଣ୍ଡ ନିକଟରୁ ଏକ ବିଶାଳ ଶୋଭାଯାତ୍ରା ବାହାରି ସହର ପରିକ୍ରମା କରିଛି। ପରେ ସେମାନେ ଜିଲାପାଳଙ୍କ କାର୍ଯ୍ୟାଳୟ ନିକଟରେ ପହଞ୍ଚି ବିକ୍ଷୋଭ ପ୍ରଦର୍ଶନ କରିଛନ୍ତି । ମୃତ ଛାତ୍ରୀଙ୍କ ପରିବାରକୁୁ ୫୦ଲକ୍ଷ ଟଙ୍କା କ୍ଷତିପୂରଣ ଦିଆଯିବା ସହ ପରିବାରର ଜଣେ ସଦସ୍ୟଙ୍କୁ ଚାକିରି ଦିଆଯାଉ ବୋଲି ସେ ଦାବି କରିଛନ୍ତି। ଏଥିସହ ଘଟଣାର ତଦନ୍ତ କରି ସ୍କୁଲ କର୍ତ୍ତୃପକ୍ଷଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବାକୁ ସେ କହିଛନ୍ତି। ପୋଲିସର ତଦନ୍ତ ପ୍ରକ୍ରିୟା ଉପରେ ମୃତ ଛାତ୍ରୀଙ୍କ ପରିବାର ଲୋକେ ସମ୍ପୂର୍ଣ୍ଣ ଆସ୍ଥା ହରାଇଛନ୍ତି। ତେଣୁ ବର୍ତ୍ତମାନ ତଦନ୍ତ ଭାର କ୍ରାଇମବ୍ରାଞ୍ଚକୁ ହସ୍ତାନ୍ତର କରାଯାଉ ବୋଲି ମଧ୍ୟ ଦାବି ରଖାଯାଇଛି। ଦାବି ନ ଶୁଣିବା ଯାଏ ସିପିଏମ ପାର୍ଟି ଓ ସୌଦାମିନୀଙ୍କ ପରିବାର ଅର୍ନିଦ୍ଧିଷ୍ଟ କାଳ ପଯ୍ୟନ୍ତ ଆନ୍ଦୋଳନ ଜାରି ରଖିବେ ବୋଲି ଚେତାବନୀ ଦେଇଛନ୍ତି।