ପୂର୍ବତନ ଅଧିନାୟକ ସୌରଭ ଗାଙ୍ଗୁଲି ଦେଶକୁ ଅନେକ ସଫଳ କ୍ରିକେଟର ଦେଇଛନ୍ତି। ଏହି କ୍ରିକେଟରମାନେ ଗାଙ୍ଗୁଲିଙ୍କ ଅଧିନାୟତ୍ୱ ସୁଯୋଗ ପାଇ ଭଲ ପ୍ରଦର୍ଶନ କରିଛନ୍ତି। ଏହି ଖେଳାଳିଙ୍କ ମଧ୍ୟରୁ ସର୍ବାଗ୍ରେ ଅଛନ୍ତି ମହେନ୍ଦ୍ର ସିଂ ଧୋନୀ। ଗାଙ୍ଗୁଲି ହିଁ ପ୍ରଥମ ବ୍ୟକ୍ତି ଯିଏ କି ଧୋନୀଙ୍କ ପ୍ରତିଭାକୁ ଚିହ୍ନି ତାଙ୍କ ଦଳରେ ସୁଯୋଗ ଦେଇଥିଲେ। କୋଲକାତା ନାଇଟ ରାଇଡର୍ସ ଦଳର ପୂର୍ବତନ ନିର୍ଦ୍ଦେଶକ ଆନନ୍ଦ ଭଟ୍ଟାଚାର୍ଯ୍ୟ କହିଛନ୍ତି ଯେ, ମୋର ମନେ ଅଛି ଯେ ମୁଁ ୨୦୦୪ରେ ବାଂଲାଦେଶ ଅଭିମୁଖେ ଯାତ୍ରା କରୁଥିଲି ଏବଂ ଗାଙ୍ଗୁଲି ମୋତେ କହୁଥିଲେ ଯେ ଆମକୁ ଏକ ନୂଆ ଧୂଆଁଧାର ବ୍ୟାଟ୍ସମ୍ୟାନ ମିଳିଛି। ତାଙ୍କୁ ଦଳରେ ସୁଯୋଗ ଦେବା ଉଚିତ୍। ଦେଖିବେ ସିଏ ଦିନେ ଭାରତୀୟ କ୍ରିକେଟ ଦଳର ବଡ ଷ୍ଟାର୍ ହେବେ।
୨୦୦୪ ବାଂଲାଦେଶ ଯାତ୍ରା ଭାରତୀୟ ଦଳ ସହିତ ଧୋନୀଙ୍କ ପ୍ରଥମ ଯାତ୍ରା ଥିଲା। ତେବେ ସେ ଏହି ଗସ୍ତରେ ପ୍ରଭାବିତ କରିପାରି ନ ଥିଲେ ଏବଂ ପ୍ରଥମ ମ୍ୟାଚରେ ଶୂନରେ ରନଆଉଟ ହୋଇଥିଲେ। ଏହା ପରେ ସେ ପାକିସ୍ତାନ ବିପକ୍ଷରେ ଖେଳାଯାଇଥିବା ସିରିଜ ପାଇଁ ଦଳରେ ପୁଣି ମନୋନୀତ ହୋଇଥିଲେ। ଏହି ସିରିଜରେ ଗାଙ୍ଗୁଲି ଧୋନୀଙ୍କୁ ତାଙ୍କ ସ୍ଥାନରେ ନମ୍ବର -୩ ରେ ପଠାଇଥିଲେ। ଧୋନୀ ବିଶାଖାପାଟନମରେ ଖେଳାଯାଇଥିବା ମ୍ୟାଚ୍ରେ ୧୨୩ବଲରୁ ୧୪୮ ର ଇନିଂସ ଖେଳି ସମସ୍ତଙଙ୍କ ଦୃଷ୍ଟି ଆକର୍ଷଣ କରିଥିଲେ। ଭଟ୍ଟାଚାର୍ଯ୍ୟ କହିଛନ୍ତି, ସେଦିନ ଗାଙ୍ଗୁଲିଙ୍କ ଭବିଷ୍ୟବାଣୀ ଆଜି ସତ ହୋଇଛି। ଧୋନୀ ଭାରତୀୟ କ୍ରିକେଟର ଜଣେ କିମ୍ବଦନ୍ତୀ ବୋଲି ସେ କହିଛନ୍ତି।