କୋଲକତା,୫।୧: ହୃଦଘାତରେ ପୀଡିତ ହୋଇ ଡାକ୍ତରଖାନାରେ ଭର୍ତ୍ତି ହୋଇଥିବା ବିସିସିଆଇ ସଭାପତି ସୌରଭ ଗାଙ୍ଗୁଲି ଆସନ୍ତା ବୁଧବାର ଡାକ୍ତରଖାନାରୁ ଡିସଚାର୍ଜ ହେବେ। ଗାଙ୍ଗୁଲି ଉଡ୍ଲାଣ୍ଡ ହସ୍ପିଟାଲରେ ଭର୍ତ୍ତି ହୋଇଥିଲେ। ତାଙ୍କୁ ଚିକିତ୍ସା କରୁଥିବା ଡକ୍ଟର ରୁପାଲି ବସୁ ଆଜି ମଧ୍ୟାହ୍ନ ପ୍ରାୟ ୧୨ଟା ସମୟରେ ଗଣମାଧ୍ୟମରେ ଏହି ସୂଚନା ଦେଇଛନ୍ତି। ଉଡ୍ଲାଣ୍ଡ ହସ୍ପିଟାଲର ଏମଡି ତଥା ସିଇଓ ଡାକ୍ତର ରୁପାଲି ବିଶ୍ୱାସ କରନ୍ତି ଯେ ୪୮ ବର୍ଷିୟ ସୌରଭ ଗାଙ୍ଗୁଲି ଦୁଇ ତିନି ସପ୍ତାହ ମଧ୍ୟରେ ପରବର୍ତ୍ତୀ ଚିକିତ୍ସା ପାଇଁ ପ୍ରସ୍ତୁତ ରହିବେ। ବୋଧହୁଏ ତାଙ୍କର ସେହି ସମୟରେ ଆଉ ଏକ ଆଞ୍ଜିଓପ୍ଲାଷ୍ଟି ହେବ। ସମ୍ପ୍ରତି ତାଙ୍କ ଅବସ୍ଥା ସ୍ଥିର ରହିଛି ଏବଂ ତାଙ୍କୁ ଆସନ୍ତାକାଲି ଡାକ୍ତରଖାନାରୁ ଡିସଚାର୍ଜ କରାଯିବ, ଯଦିଓ ଗାଙ୍ଗୁଲି ଘରେ ଚିକିତ୍ସିତ ହେବେ, ସେଠାରେ ତାଙ୍କୁ ପ୍ରତିଦିନ ପରୀକ୍ଷା କରାଯିବ। ଡାକ୍ତରମାନେ ତାଙ୍କ ସ୍ବସ୍ଥ୍ୟାବସ୍ଥା ଉପରେ ନିରନ୍ତର ନଜର ରଖିବେ। ଡାକ୍ତରଖାନା ଛାଡିବା ପରେ ଘରେ ମଧ୍ୟ ଉପଯୁକ୍ତ ପଦକ୍ଷେପ ନିଆଯିବ।