କୋଲକାତା, ୩୦।୭: ଭାରତର ପ୍ରାକ୍ତନ ଅଧିନାୟକ ତଥା ବର୍ତ୍ତମାନ ଭାରତୀୟ କ୍ରିକେଟ୍ କଣ୍ଟ୍ରୋଲ ବୋର୍ଡ (ବିସିସିଆଇ)ର ସଭାପତି ଥିବା ସୌରଭ ଗାଙ୍ଗୁଲିଙ୍କ ପିଲା ଦିନର କୋଚ୍ ଅଶୋକ ମୁସ୍ତାଫିଙ୍କ ପରଲୋକ ଘଟିଛି। ଦୀର୍ଘଦିନ ଧରି ଅସୁସ୍ଥ ଥିବା ଅଶୋକ ଗୁରୁବାର ସକାଳେ ହାର୍ଟ ଆଟାକ୍ରେ ମୃତ୍ୟୁବରଣ କରିଛନ୍ତି। ମୃତ୍ୟୁବେଳକୁ ତାଙ୍କୁ ୮୬ ବର୍ଷ ହୋଇଥିଲା। ତାଙ୍କର ଏକମାତ୍ର ଝିଅ ଏବେ ଲଣ୍ଡନରେ ରହୁଛନ୍ତି। ଅଶୋକଙ୍କ ପରିବାର ପକ୍ଷରୁ ଖବର ସରବରାହ ସଂସ୍ଥା ପିଟିଆକୁ ଦିଆଯାଇଥିବା ସୂଚନା ମୁତାବକ, ‘ତାଙ୍କର ଦୀର୍ଘଦିନ ଧରି ହାର୍ଟ ସମସ୍ୟା ରହିଥିଲା। ଗତ ଏପ୍ରିଲରେ ମାସରେ ଗୁରୁତର ହେବାରୁ ତାଙ୍କୁ ହସ୍ପିଟାଲରେ ଭର୍ତ୍ତି କରାଯାଇଥିଲା। ଆଜି ସକାଳେ ସେ ଶେଷ ନିଶ୍ୱାସ ତ୍ୟାଗ କରିଥିଲେ।’ ଅଶୋକ ପ୍ରସିଦ୍ଧ ଦୁଃଖିରାମ କ୍ରିକେଟ୍ କୋଚିଂ ସେଣ୍ଟରର ପ୍ରଶିକ୍ଷକ ଥିଲେ। ଯାହାକି, ଆର୍ଯ୍ୟାନ କ୍ଲବ ଗ୍ୟାଲେରି ଅଧିନରେ ରହିଥିଲା। ଏକଦା ବେଙ୍ଗଲ କ୍ରିକେଟ୍ର ନର୍ସରୀ ଭାବେ ପରିଚିତ ଏହି ସେଣ୍ଟର ଏକ ଡର୍ଜନରୁ ଅଧିକ ରଣ୍ଜୀ ଖେଳାଳିଙ୍କୁ ସୃଷ୍ଟି କରିଥିଲା। ସେମାନଙ୍କ ମଧ୍ୟରେ ସୌରଭ ଗାଙ୍ଗୁଲି ପ୍ରମୁଖ ଥିଲେ। ଗାଙ୍ଗୁଲିଙ୍କ ବାପା ପ୍ରାରମ୍ଭିକ ସମୟରେ ତାଙ୍କୁ ପ୍ରଶିକ୍ଷଣ ପାଇଁ ଅଶୋକଙ୍କ ନିକଟକୁ ପଠାଇଥିଲେ। ଯେଉଁଠାରେ ଗାଙ୍ଗୁଲି ତାଙ୍କ ସାଙ୍ଗ ସଞ୍ଜୟ ଦାସଙ୍କ ସହ ଏକାଠି ଟ୍ରେନିଂ ନେଉଥିଲେ। ଗତ ମାସରେ ଅଶୋକଙ୍କ ସ୍ବାସ୍ଥ୍ୟବସ୍ଥା ଖରାପ ଥିବା ସମୟରେ ଗାଙ୍ଗୁଲି ଓ ତାଙ୍କ ସାଙ୍ଗ ସଞ୍ଜୟ ମିଶି ତାଙ୍କୁ ହସ୍ପିଟାଲାରେ ଚିକିତ୍ସା ପାଇଁ ଭର୍ତ୍ତି କରିଥିଲେ।
