କୋଲକାତା,୩।୧: ବିସିସିଆଇ ଅଧ୍ୟକ୍ଷ ଭାରତୀୟ କ୍ରିକେଟର ସୌରଭ ଗାଙ୍ଗୁଲିଙ୍କୁ ଶନିବାର ହାର୍ଟ ଆଟାକ୍ ଆସିଥିଲା। ଚିକିତ୍ସା ପାଇଁ ତାଙ୍କୁ ଉଡ୍ଲ୍ୟାଣ୍ଡସ୍ ହସ୍ପିଟାଲରେ ଭର୍ତ୍ତି କରାଯାଇଥିଲା। ହସ୍ପିଟାଲରେ ତାଙ୍କର ହାର୍ଟର ଏକ ଛୋଟ ଅପରେଶନ୍ କରାଯାଇଥିଲା। ହାର୍ଟ ସର୍ଜରୀ ସଫଳ ରହିଥିବା ହସ୍ପିଟାଲ ପକ୍ଷରୁ ରବିବାର ସକାଳେ ସୂଚନା ଦିଆଯାଇଛି। ଡାକ୍ତର ସରୋଜ ମଣ୍ଡଳ ଏବଂ ସପ୍ତର୍ଷି ବାସୁ ତାଙ୍କର ଚିକିତ୍ସା ଜାରି ରଖିଛନ୍ତି। ସୌରଭଙ୍କର ହାର୍ଟର ୩ଟି ଆରଟେରିରେ ବ୍ଲକେଜ୍ ଥିବା ଡାକ୍ତର କହିଛନ୍ତି। ତାଙ୍କର ଡାହାଣ ପଟ କୋରୋନାରି ଆରଟେରିରେ ଷ୍ଟେଣ୍ଟ୍ ଲଗାଯାଇଛି। କୋରୋନାରି ଆଞ୍ଜିଓଗ୍ରାଫି କରାଯିବା ପରେ ବ୍ଲକେଜ୍ ସମ୍ପର୍କରେ ଜଣାପଡ଼ିଥଲା। ଏହାପରେ ରାଡିଆଲ ରୁଟ୍ ପଦ୍ଧତିରେ ଷ୍ଟେଣ୍ଟ୍ର ବ୍ୟବହାର କରାଯାଇଥିବା ଡାକ୍ତର କହିଛନ୍ତି। ସୌରଭଙ୍କ ବାମ ଆଣ୍ଟେରିଅର ଡିସେଣ୍ଡିଙ୍ଗ୍ ଆରଟେରି ଏବଂ ଓବଟ୍ୟୁଜ୍ ମାର୍ଜିନାଲ୍ ଆରଟେରିର କାର୍ଯ୍ୟ ଉପରେ ମଧ୍ୟ ତୀକ୍ଷ୍ଣ ନଜର ରଖାଯାଇଥିବା ଡାକ୍ତର କହିଛନ୍ତି।
