ଯାଜପୁର ଅଫିସ/କବାଟବନ୍ଧ (ଡି.ଏନ୍.ଏ.),୧୩ା୫: ଯାଜପୁର ଜିଲା ଧର୍ମଶାଳା ତହସିଲର କଳାପଥର କେଳେଙ୍କାରୀ ସହ ବାୟୁ ପ୍ରଦୂଷଣ ଏବେ ଚରମସୀମାରେ ପହଞ୍ଚିଛି। ଜିଲା ପ୍ରଶାସନ ପକ୍ଷରୁ ଏଭଳି ଅନିୟମିତତା ଏବଂ ମନମାନିକୁ ନିୟନ୍ତ୍ରଣ କରିବାରେ ସେଭଳି କିଛି ଠୋସ୍ କାର୍ଯ୍ୟାନୁଷ୍ଠାନ ନେବାରେ ବିଫଳ ହୋଇଛନ୍ତି। ଏହିକ୍ରମରେ ପ୍ରଦୂଷଣରେ ଅତିଷ୍ଠ ଅଞ୍ଚଳବାସୀ ଶୁକ୍ରବାର ରାସ୍ତାରୋକୋ ଭଳି କାର୍ଯ୍ୟପନ୍ଥା ଆପଣାଇଛନ୍ତି।
୫୩ ନମ୍ବର ଜାତୀୟ ରାଜପଥର ବରଡ଼ାଳ ଛକରୁ ତୁରଙ୍ଗ ରାସ୍ତାରେ ପ୍ରତିଦିନ ୩୦୦ରୁ ୪୦୦ ପର୍ଯ୍ୟନ୍ତ କଳାପଥର ବୋଝେଇ ଗାଡ଼ି ପରିବହନ ହେଉଛି। ଫଳରେ ଏହି ରାସ୍ତାରେ ଥିବା ମହିଶରା, ବରଡ଼ା, ଡଙ୍କାରୀ, ରମ୍ପେଇ, ରାହାଡ଼ପୁର ପ୍ରଭୃତି ଗ୍ରାମବାସୀ ବାୟୁ ପ୍ରଦୂଷଣର ଶିକାର ହେଉଛନ୍ତି। ଏହି ରାସ୍ତାଦେଇ ଯିବା ଆସିବା କରିବା ସାଧାରଣ ଲୋକଙ୍କ ପକ୍ଷେ ସହଜ ହୋଇପାରିନାହିଁ। ବାୟୁ ପ୍ରଦୂଷଣରେ ବିଭିନ୍ନ ରୋଗରେ ଲୋକେ ଆକ୍ରାନ୍ତ ହେଉଛନ୍ତି। ଛାତ୍ରୀଛାତ୍ରମାନେ ମଧ୍ୟ ବହୁଳ ଭାବେ କ୍ଷତିଗ୍ରସ୍ତ ହେଉଛନ୍ତି। ତେଣୁ ଆବଶ୍ୟକ ପାଣି ସିଞ୍ଚନ କରି ଗାଡ଼ି ଚଳାଚଳ କରିବାକୁ ଅଞ୍ଚଳବାସୀ ଦାବି କରି ଆସୁଥିଲେ ହେଁ କେହି ଶୁଣୁ ନାହାନ୍ତି। ଫଳରେ ଲୋକେ ବରଡା ଗ୍ରାମରେ ଅପରାହ୍ନ ୧ଟାରୁ ସନ୍ଧ୍ୟା ୭ଟା ପର୍ଯ୍ୟନ୍ତ ଗାଡ଼ିଗୁଡିକୁ ଅଟକାଇଥିଲେ। ଏଥିଯୋଗୁ ରାସ୍ତାର ଉଭୟ ପାର୍ଶ୍ୱରେ କଳାପଥର ବୋଝେଇ ଗାଡ଼ି ସହ ଅନ୍ୟ ଯାନବାହନ ଲମ୍ବାଧାଡିରେ ଠିଆ ହୋଇଥିଲା। ପ୍ରଶାସନ କିମ୍ବା କ୍ରଶର ମାଲିକ ସଂଘ ପକ୍ଷରୁ କେହି ଉପସ୍ଥିତ ନ ହେବାରୁ ଗଁା ଲୋକେ ଆନ୍ଦୋଳନରୁ ଓହରି ଯାଇଥିଲେ। ପରବର୍ତ୍ତୀ ସମୟରେ ଆନ୍ଦୋଳନକୁ ଆହୁରି ବ୍ୟାପକ କରାଯିବ ବୋଲି ପ୍ରଭାବିତ ଲୋକେ ଚେତାବନୀ ଦେଇଛନ୍ତି।