ତେନ୍ତୁଳିଖୁଣ୍ଟି,୧୬।୧(ଡି.ଏନ୍.ଏ.): ଗୋଟେ ଆମ୍ବଗଛ ପାର୍ଶ୍ୱରୁ ବହିଆସୁଛି ତିନୋଟି ଜଳଧାର। ଏହିଠାରୁ ହିଁ ଇନ୍ଦ୍ରାବତୀ ନଦୀର ଉତ୍ପତ୍ତି। ନିଜ ଆଖିରେ ନ ଦେଖିଲେ କେବେ ବି ବିଶ୍ୱାସ ହେବନି ଯେ ତିନୋଟି ସରୁ ଜଳଧାର ହିଁ ଇନ୍ଦ୍ରାବତୀ ନଦୀର ଉତ୍ପତ୍ତି ସ୍ଥଳ। ଯେଉଁ ନଦୀରେ ଜଳଭଣ୍ଡାର କରାଯାଇ କଳାହାଣ୍ଡି ଜିଲାରେ ଦେଢ଼ ଲକ୍ଷ ହେକ୍ଟର ଜମି ଶଷ୍ୟଶ୍ୟାମଳା । ରାଜ୍ୟ ପାଉଛି ଦୈନିକ ୬୦୦ ମେଗାୱାଟ ବିଦ୍ୟୁତ୍। ରାଜ୍ୟ ପର୍ଯ୍ୟଟନ ମାନଚିତ୍ରରେ ସ୍ଥାନପାଇଛି ମର୍ଦ୍ଧିଗୁଡ଼ା। ପର୍ଯ୍ୟଟନ ସ୍ଥଳୀର ମାନ୍ୟତା ସତ୍ତ୍ୱେ ପ୍ରଚାର ପ୍ରସାର ଅଭାବରୁ ଏହା ଲୋକଲୋଚନକୁ ଆସିପାରୁନାହିଁ। ଏହା ଅବହେଳିତ ହୋଇରହିଛି।
ମର୍ଦ୍ଧିଗୁଡା କଳାହାଣ୍ଡି ଜିଲା ଥୁଆମୂଳ ରାମପୁର ବ୍ଲକର ଏକ ଛୋଟିଆ ଗାଁ। ଜଙ୍ଗଲ ପାହାଡ଼ଘେରା ଏହି ମର୍ଦ୍ଧିଗୁଡାରେ ବସବାସ କରୁଛନ୍ତି ପ୍ରାୟ ୪୦ ଚାଷୀ ପରିବାର। ମର୍ଦ୍ଧିଗୁଡାର ଏକ ଆମ୍ବଗଛ ପାଖରୁ ତିନିଗୋଟି ଜଳଧାରରୁ ଆରମ୍ଭ ଇନ୍ଦ୍ରାବତୀ ନଦୀ l ଏଣୁ ଏଇ ସ୍ଥାନକୁ ମା’ ଇନ୍ଦ୍ରାବତୀ ପୀଠସ୍ଥଳୀ ଭାବେ ନାମିତ କରାଯାଇଛି। କୁଳୁ କୁଳୁ ଶବ୍ଦ କରି ବର୍ଷ ବର୍ଷ ଧରି ବହି ଆସୁଥିବା ତିନି ଜଳ ଧାରରୁ ସୃଷ୍ଟି ହୋଇଥିବା ପ୍ରାକୃତିକ ଇନ୍ଦ୍ରାବତୀ ନଦୀକୁ ବନ୍ଧବାନ୍ଧି ସୃଷ୍ଟି କରାଗଲା ବିରାଟ ଜଳଭଣ୍ଡାର। ଇନ୍ଦ୍ରାବତୀ ଜଳଭଣ୍ଡାର ପାଣି ବ୍ୟବହାର କରି ମୁଖୀଗୁଡ଼ାରେ ଜଳ ବିଦ୍ୟୁତ୍ ପ୍ରକଳ୍ପ ସ୍ଥାପନ କରାଯାଇ ୬୦୦ମେଗାୱାଟ କ୍ଷମତା ସମ୍ପନ୍ନ ବିଦ୍ୟୁତ୍ ଉତ୍ପାଦନ କରିବା ସହ ଓଡିଶା ସରକାର ରାଜସ୍ବ ବୃଦ୍ଧି କରୁଛି। କିନ୍ତୁ ଦୁଃଖର ବିଷୟ ଇନ୍ଦ୍ରାବତୀକୁ ଜନ୍ମ ଦେଇଥିବା ମର୍ଦ୍ଧିଗୁଡା ଗାଁ ଆଜି ଦୟନୀୟ ଅବସ୍ଥାରେ। ଗାଁରେ ପାନୀୟ ଜଳ ସମସ୍ୟା ରହିଛି। ଟିବ୍ଓ୍ବେଲ ଅଛି କିନ୍ତୁ ସେଥିରୁ ବାହାରୁଛି ଦୂଷିତ ପାଣି। ନିରବଚ୍ଛିନ୍ନ ବିଦ୍ୟୁତ୍ ସେବା ମିଳୁନାହିଁ। ସପ୍ତାହକୁ ପାଞ୍ଚ ଦିନ ଡିବିରି ଆଲୁଅ ଭରସା। ଓଡ଼ିଶା ପର୍ଯ୍ୟଟନ ବିଭାଗରେ ସ୍ଥାନ ପାଇଛି ମର୍ଦ୍ଧିଗୁଡ଼ା। ବିଭାଗ ସେଠାରେ ଓଡ଼ିଶା ଟୁରିଜମ୍ ବୋଲି ଲେଖାଥିବା ଏକ ସାଇନ ବୋର୍ଡ ପୋତି କାମ ସାରିଦେଇଛି। ପର୍ଯ୍ୟଟକଙ୍କୁ ଆକୃଷ୍ଟ କଲାଭଳି କୌଣସି ବ୍ୟବସ୍ଥା କିନ୍ତୁ ସେଠାରେ କରାଯାଇନାହିଁ। ରାଜ୍ୟ ପର୍ଯ୍ୟଟନ ମାନଚିତ୍ରରେ ସ୍ଥାନ ଦେବା ପରେ ପର୍ଯ୍ୟଟନ ବିଭାଗ ଭୁଲିଗଲା ଭଳି ଲାଗୁଛି। ପର୍ଯ୍ୟଟକଙ୍କୁ ଆକୃଷ୍ଟ କରିବା ଭଳି କିଛି ବ୍ୟବସ୍ଥା କରି ସ୍ଥାନୀୟ ଅଧିବାସୀଙ୍କୁ ପର୍ଯ୍ୟଟନ ଶିଳ୍ପର ଅନ୍ତତଃ ସ୍ବଳ୍ପ ଫାଇଦା ଯୋଗାଇବା ଅଶ୍ୟକତା ରହିଛି ବୋଲି ବୁଦ୍ଧିଜୀବୀମାନେ କହିଛନ୍ତି। ଏ ନେଇ ବିଡିଓ ଶୁଭକାନ୍ତ ନାୟକଙ୍କୁ ପଚାରିବାରୁ ମର୍ଦ୍ଧିଗୁଡା ଗ୍ରାମର ବିଭିନ୍ନ ସମସ୍ୟା ରହିଛି, ସେ ସବୁର ସମାଧାନ ପର୍ଯ୍ୟାୟକ୍ରମେ କରା ଯାଉଛି ବୋଲି କହିଥିଲେ। କିନ୍ତୁ ପର୍ଯ୍ୟଟନ କ୍ଷେତ୍ର ହିସାବରେ ବିକାଶ ପାଇଁ ବ୍ଲକ ପକ୍ଷରୁ ବର୍ତ୍ତମାନ କୌଣସି ବ୍ୟବସ୍ଥା ନାହିଁ ବୋଲି ସେ ପ୍ରକାଶ କରିଛନ୍ତି।