କାବୁଲ, ୧୪।୮: ଆଫଗାନିସ୍ତାନରୁ ଆମେରିକା ଓ ନାଟୋ ସେନା ପ୍ରତ୍ୟାହାର ଶେଷ ପର୍ଯ୍ୟାୟରେ ପହଞ୍ଚତ୍ଥିବାବେଳେ ତାଲିବାନ ଆତଙ୍କବାଦୀମାନେ ଗୋଟିଏ ପରେ ଗୋଟିଏ ପ୍ରଦେଶିକ ରାଜଧାନୀ ଦଖଲ କରିବାରେ ଲାଗିଛନ୍ତି। ଏବେ ସମ୍ପୂର୍ଣ୍ଣ ଦକ୍ଷିଣ ଆଫଗାନ ସେମାନଙ୍କ ନିୟନ୍ତ୍ରଣକୁ ଆସିଗଲାଣି। ରାଜଧାନୀ କାବୁଲ ଦଖଲ କରିବା ସେମାନଙ୍କ ପାଇଁ ଆଉ ବେଶି ଦୂର ନୁହେଁ ବୋଲି କୁହାଯାଉଛି। ପତନ ଅବଶ୍ୟମ୍ଭାବୀ ଆଶଙ୍କା କରି ଆଫଗାନ ସରକାର ତାଲିବାନକୁ କ୍ଷମତା ଭାଗବଣ୍ଟା ପାଇଁ ପ୍ରସ୍ତାବ ଦେଇସାରିଲେଣି। ପୂର୍ବରୁ ଆତଙ୍କବାଦୀ ସୀମାବର୍ତ୍ତୀ ଗ୍ରାମାଞ୍ଚଳକୁ ଦଖଲ କରିଥିବାବେଳେ ଏବେ ଦେଶର ଦୁଇ-ତୃତୀୟାଂଶରୁ ଅଧିକ ଅଞ୍ଚଳ ସେମାନଙ୍କ ଦଖଲରେ।
ସପ୍ତାହକ ମଧ୍ୟରେ ଆତଙ୍କବାଦୀମାନେ ୧୦ ପ୍ରାଦେଶିକ ରାଜଧାନୀ ଦଖଲ କରିଥିବାବେଳେ ଶୁକ୍ରବାର ଆଉ ୪ଟି ରାଜଧାନୀକୁ କବ୍ଜା କରିଛନ୍ତି। ଆଫଗାନିସ୍ତାନର ଦ୍ୱିତୀୟ ବୃହତ ସହର କାନ୍ଦାହାର ଏବଂ ତୃତୀୟ ବୃହତ ସହର ହେରାତ ସେମାନଙ୍କ ନିୟନ୍ତ୍ରଣକୁ ଯାଇଛି। ହେରାତ୍ରୁ ଅନେକ ଲୋକ ଘରଦ୍ୱାର ଛାଡ଼ି ପଳାଇଥିବାବେଳେ କେତେକ ପରିବାର ଘରେ ଆତ୍ମଗୋପନ କରିଥିବା ପ୍ରାଦେଶିକ କାଉନସିଲ ସଦସ୍ୟ ଗୁଲାମ ହବିବ୍ ହଶିମି କହିଛନ୍ତି। ଗୁରୁବାର ରାତିରୁ କାନ୍ଦାହାର ସହରରେ ସୁରକ୍ଷା ବଳ ଓ ତାଲିବାନ ଆତଙ୍କବାଦୀଙ୍କ ମଧ୍ୟରେ ଘମାଘୋଟ ଲଢ଼େଇ ପରେ ଏହି ସହର ସେମାନଙ୍କ କବଳକୁ ଯାଇଛି। ଏହା ବ୍ୟତୀତ ହେଲମଣ୍ଡ ପ୍ରଦେଶ ରାଜଧାନୀ ଲଶ୍କର ଗାହକୁ ମଧ୍ୟ ତାଲିବାନ କବ୍ଜା କରିଛି। ଘମାଘୋଟ ଲଢ଼େଇ ପରେ ସହରର ସରକାରୀ ପ୍ରତିଷ୍ଠାନଗୁଡ଼ିକ ଉପରେ ତାଲିବାନ ପତାକା ଉଡ଼ିଥିଲା। ଗୁରୁବାର ଗଜନୀ ସେମାନଙ୍କ ଅକ୍ତିଆରକୁ ଯାଇଥିଲା। କାଲାତ ରାଜଧାନୀ ତାଲିବାନ ନିୟନ୍ତ୍ରଣକୁ ଯାଇଥିବାବେଳେ ସେଠାରେ ଥିବା ଯବାନମାନେ କ୍ୟାମ୍ପ୍ ଖାଲି କରିବାକୁ ପ୍ରସ୍ତୁତି ଚଳାଇଥିବା ଜାବୁଲ୍ ପ୍ରଦେଶ କାଉନସିଲ୍ ମୁଖ୍ୟ କହିଛନ୍ତି। ତିରିନ୍ କଟ୍ ପ୍ରାଦେଶିକ ରାଜଧାନୀର ସ୍ଥାନୀୟ ଅଧିକାରୀମାନେ ଆତ୍ମସମର୍ପଣ କରିସାରିଲେଣି। ବୃହତ ସହର ମଧ୍ୟରେ କାବୁଲ, ମଜାର-ଇ-ଶରିଫ୍ ଏବଂ ଜଲାଲାବାଦ ଏବେ ଆଫଗାନ ସରକାରଙ୍କ ନିୟନ୍ତ୍ରଣରେ ରହିଛି।
ଆତଙ୍କବାଦୀ ଓ ଆଫଗାନ ସୈନ୍ୟଙ୍କ ମଧ୍ୟରେ ସଂଘର୍ଷ ଜାରି ରହିଥିବାବେଳେ ସ୍ଥିତି ବିଗିଡ଼ିବାରେ ଲାଗିଛି। ଦେଶରେ ଖାଦ୍ୟ ସଙ୍କଟ ସୃଷ୍ଟି ହୋଇଥିବା ଜାତିସଂଘ କହିଛି। ଆମେରିକା ତା’ର ଦୂତାବାସ କର୍ମଚାରୀମାନଙ୍କୁ ଫେରାଇ ନେବା ପାଇଁ ୪୮ ଘଣ୍ଟା ମଧ୍ୟରେ ୩,୦୦୦ ଅତିରିକ୍ତ ସୈନ୍ୟ ପଠାଇବାକୁ ନିଷ୍ପତ୍ତି ନେଇଛି। ସେହିପରି ବ୍ରିଟେନ ଏହାର ନାଗରିକମାନଙ୍କୁ ଫେରାଇ ନେବା ଲାଗି ୬୦୦ ସୈନ୍ୟ ନିୟୋଜିତ କରିବ ବୋଲି କହିଛି। ସେହିପରି କାନାଡା ମଧ୍ୟ କାବୁଲକୁ ସ୍ବତନ୍ତ୍ର ସୈନ୍ୟଦଳ ପଠାଉଛି। ତାଲିବାନ କାବୁଲ୍ ଅକ୍ତିଆର କରିବା ପରେ ଦେଶବାସୀଙ୍କ ଉପରେ ଏହାର ବିନାଶକାରୀ ପ୍ରଭାବ ପଡ଼ିପାରେ ବୋଲି ଜାତିସଂଘ ସତର୍କ କରାଇଛି। ତେବେ ଯୁଦ୍ଧ ରୋକିବା ଲାଗି ତାଲିବାନ ସହ ବୁଝାମଣା ଆଶା କ୍ଷୀଣ। ୩୪ ପ୍ରାଦେଶିକ ରାଜଧାନୀ ମଧ୍ୟରୁ ୧୪ଟି ତାଲିବାନ ଦଖଲକୁ ଗଲାଣି। ଆତଙ୍କବାଦୀମାନେ ଆଫଗାନ ସରକାରକୁ ପରାଜିତ କରି ସେଠାରେ କଠୋର ଇସ୍ଲାମୀୟ ଶାସନ ଚଳାଇବାକୁ ଚାହାନ୍ତି।
ଗଜନୀ ରାଜ୍ୟପାଳ ଗିରଫ
ରାଜ୍ୟକୁ ତାଲିବାନ ହାତରେ ଟେକି ଦେଇଥିବା ଗଜନୀ ରାଜ୍ୟପାଳ ଦାଉଦ୍ ଲାଗମାନିଙ୍କୁ ଆଫଗାନିସ୍ତାନର ଓ୍ବାରଡକ୍ ପୋଲିସ ଗିରଫ କରିଛି। ରାଜ୍ୟପାଳଙ୍କ ସହିତ ତାଙ୍କ ସହକାରୀ ଏବଂ ଚିଫ୍ ଅଫ୍ ଷ୍ଟାଫ୍ଙ୍କୁ ଗିରଫ କରାଯାଇଛି। ତାଲିବାନ ଆତଙ୍କବାଦୀମାନେ ରାଜ୍ୟପାଳ ଲାଗମାନିଙ୍କୁ ସୁରକ୍ଷା ଦେଇ ଗଜନୀରୁ ଓ୍ବାରଡାକ୍ ନେଇଯାଇଥିଲେ।
ଆତଙ୍କବାଦୀଙ୍କୁ ବିବାହ ପାଇଁ ମହିଳାଙ୍କୁ ବାଧ୍ୟ କରାଯାଉଛି
ଆଫଗାନିସ୍ତାନର ଅଧିକାଂଶ ଗୁରୁତ୍ୱପୂର୍ଣ୍ଣ ସହର ଦଖଲ କରିଥିବା ତାଲିବାନ ଏବେ ମହିଳାମାନଙ୍କୁ ଆତଙ୍କବାଦୀଙ୍କ ସହ ବିବାହ କରାଇବାକୁ ବାଧ୍ୟ କରୁଛି। ସେମାନେ ଗିରଫ କରିଥିବା ସୈନ୍ୟମାନଙ୍କୁ ହତ୍ୟା କରିବା ସହ ସାଧାରଣ ନାଗରିକଙ୍କ ଉପରେ ମଧ୍ୟ ଆକ୍ରମଣ ଆରମ୍ଭ କରିଦେଇଛନ୍ତି। ଜୀବନ ବଞ୍ଚାଇବାକୁ ଲୋକେ ଘରଦ୍ୱାର ଛାଡ଼ି ପଳାଉଥିବା ଦେଖାଯାଉଛି। ଅବିବାହିତ ଝିଅମାନଙ୍କୁ ଆତଙ୍କବାଦୀଙ୍କ ସ୍ତ୍ରୀ ହେବା ପାଇଁ ବାଧ୍ୟ କରାଯାଉଛି। ଏହା ଏକ ପ୍ରକାର ଯୌନ ହିଂସା ବୋଲି ମାନବାଧିକାର ସଂଗଠନ କହିଛି। ସେମାନଙ୍କ ନିୟନ୍ତ୍ରଣକୁ ଆସିଥିବା ସହରରେ ସରକାରୀ ଅଧିକାରୀ, ଯବାନ ଏବଂ ଜନସାଧାରଣ ଭୟ କରିବାର କିଛି କାରଣ ନାହିଁ ବୋଲି ତାଲିବାନ କହୁଥିବାବେଳେ ବାସ୍ତବରେ ଏହା ଆତଙ୍କ ସୃଷ୍ଟି କରୁଥିବା ଦେଖାଯାଇଛି। ଆତ୍ମସମର୍ପଣ କରିଥିବା ଆଫଗାନ ସୈନ୍ୟଙ୍କୁ ହତ୍ୟା କରାଯାଉଥିବାରୁ ଆମେରିକା ଦୂତାବାସ ପକ୍ଷରୁ ଏହାକୁ ନିନ୍ଦା କରାଯାଇଛି।