ଜୋହାନ୍ସବର୍ଗ,୫।୧: ସ୍ଥାନୀୟ ଓ୍ବାଣ୍ଡରର୍ସ ଷ୍ଟାଡିୟମରେ ଚାଲିଥିବା ନ୍ୟୁ ଇୟର ଟେଷ୍ଟରେ ଦକ୍ଷିଣ ଆଫ୍ରିକା ଆଗରେ ୨୪୦ ରନ୍ର ବିଜୟ ଲକ୍ଷ୍ୟ ଛିଡ଼ା କରିଛି ଭାରତୀୟ ଦଳ। ପ୍ରଥମ ଇନିଂସରେ ଭାରତ ୨୦୨ ରନ୍ କରିଥିବା ବେଳେ ଠାକୁରଙ୍କ ଚମତ୍କାର ବୋଲିଂ ପ୍ରଦର୍ଶନ କାରଣରୁ ୨୨୯ ରନ୍ରେ ଅଲଆଉଟ୍ ହୋଇଯାଇଥିଲା ଘରୋଇ ଦକ୍ଷିଣ ଆଫ୍ରିକା। ୨୭ ରନ୍ରେ ପଛୁଆ ଥିବା ଟିମ୍ ଇଣ୍ଡିଆର ଦ୍ୱିତୀୟ ପାଳି ଶେଷ ହୋଇଛି ୨୬୬ ରନ୍ରେ। ମ୍ୟାଚ୍ରେ ଆହୁରି ଦୁଇ ଦିନ ଥିବାରୁ ଫଳାଫଳ ବାହାରିବା ନିଶ୍ଚିତ।
ପରବର୍ତ୍ତୀ ମ୍ୟାଚ୍ ଲାଗି ଦଳରେ ସ୍ଥାନ ସୁରକ୍ଷିତ ରଖିବା ପାଇଁ ସଂଘର୍ଷ କରୁଥିବା ଅଜିଙ୍କ୍ୟ ରାହାନେ ୫୮ (୮ ଚୌକା ଓ ୧ ଛକା) ଓ ଚେତେଶ୍ୱର ପୂଜାରା ୫୩ (୧୦ ଚୌକା) ବୁଧବାର ଆରମ୍ଭରୁ ଆଟାକିଂ ବ୍ୟାଟିଂ କରିଥିଲେ। ପ୍ୟାଭେଲିଅନ ଫେରିବା ପୂର୍ବରୁ ଦୁହେଁ ୩ୟ ଉଇକେଟ ପାଇଁ ଯୋଡ଼ିଥିଲେ ୧୧୧ ରନ୍। ମାତ୍ର ଏହାପରେ ଟିମ୍ ଇଣ୍ଡିଆ କ୍ରମାଗତ ବ୍ୟବଧାନରେ ୪ ଉଇକେଟ ହରାଇଥିଲା। ଏଭଳି ସ୍ଥିତିରେ ବିସ୍ଫୋରକ ୨୮ (୫ ଚୌକା ଓ ୧ ଛକା) ରନ୍ ପାଳି ଖେଳିଥିଲେ ଠାକୁର। ହନୁମା ବିହାରୀଙ୍କ ଅପରାଜିତ ୪୦ (୬ ଚୌକା) ରନ୍ର ଇନିଂସ ଯୋଗୁ ଭାରତ ୨୬୬ ରନ୍ କରିବାକୁ ସକ୍ଷମ ହୋଇଥିଲା। ଘରୋଇ ଦଳ ପକ୍ଷରୁ କାଗିସୋ ରବାଡା, ମାର୍କୋ ଜାନସେନ ଓ ଲୁଙ୍ଗି ଏନ୍ଗିଡି ୩ ଲେଖାଏ ଉଇକେଟ ନେଇଥିଲେ।
