ସେଞ୍ଚୁରିଅନ୍,୨୬ା୧୨: ଦକ୍ଷିଣ ଆଫ୍ରିକା ବିପକ୍ଷ ଦୁଇ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ୍ ମଙ୍ଗଳବାର ଆରମ୍ଭ ହେବ। ଭାରତୀୟ ଦଳ ୩୧ ବର୍ଷ ହେବ ଦକ୍ଷିଣ ଆଫ୍ରିକାରେ ଗୋଟିଏ ବି ଟେଷ୍ଟ ସିରିଜ୍ ଜିତି ନ ଥିବା ବେଳେ ରୋହିତ ଶର୍ମାଙ୍କ ନେତୃତ୍ୱରେ ଦଳ ଏହାକୁ ପରିବର୍ତ୍ତନ କରିବାକୁ ଚେଷ୍ଟା କରିବ। ଦକ୍ଷିଣ ଆଫ୍ରିକା ୧୯୯୨ରେ ଟେଷ୍ଟ ମାନ୍ୟତା ପାଇଥିଲା। ଇତି ମଧ୍ୟରେ ଭାରତ୯ ଥର ଦକ୍ଷିଣ ଆଫ୍ରିକା ଗସ୍ତ କରି ସାରିଛି। ତେବେ ଥରେ ମଧ୍ୟ ଦଳ ସିରିଜ୍ ବିଜୟୀ ହେବାରେ ସମର୍ଥ ହୋଇନାହିଁ। ସୁପର ସ୍ପୋର୍ଟ ପାର୍କରେ ଖେଳା ଯିବାକୁ ଥିବା ଏହି ଟେଷ୍ଟ ମ୍ୟାଚ୍ର ପ୍ରଥମ ଦୁଇ ଦିନରେ ପ୍ରବଳ ବର୍ଷା ଆଶଙ୍କା କରାଯାଇଥିବା ବେଳେ ପେସ୍ ବୋଲରଙ୍କୁ ସହାୟତା ମିଳିବ॥
ଏପରି ସ୍ଥିତିରେ ଭାରତ ନିଜର ପ୍ରାଇମ ବୋଲର ମହମ୍ମଦ ଶାମିଙ୍କୁ ମିସ୍ କରିବ। ଦିନିକିଆ ବିଶ୍ୱକପର ଫାଇନାଲ ମ୍ୟାଚ୍ର ପରାଜୟ ପରେ ପ୍ରଥମ ଥର ପାଇଁ ରୋହିତ ଶର୍ମା ଓ ବିରାଟ କୋହଲିଙ୍କୁ ଆକ୍ସନରେ ଦେଖିବାକୁ ମିଳିବ। ଅଧିନାୟକ ଭାବରେ ସଚିନ୍ ତେନ୍ଦୁଲକର(୧୯୯୬) ଓ ମହମ୍ମଦ ଆଝାରୁଦ୍ଦିନ ଗୋଟିଏ ବି ବିଜୟ ହାସଲ କରିପାରି ନ ଥିଲେ। ଅନ୍ୟ ପକ୍ଷରେ ସୌରଭ ଗାଙ୍ଗୁଲି(୨୦୦୧), ରାହୁଲ ଡ୍ରାଭିଡ୍(୨୦୦୬-୦୭), ମହେନ୍ଦ୍ର ସିଂ ଧୋନୀ (୨୦୧୦-୧୧), (୨୦୧୩-୧୪) ଏବଂ ବିରାଟ କୋହଲି(୨୦୧୮-୧୯) ଓ (୨୦୨୧-୨୨)ରେ ଟେଷ୍ଟ ମ୍ୟାଚରେ ବିଜୟ ହାସଲ କରିଥିଲେ ହେଁ ସିରିଜ୍ ବିଜୟରେ ସମର୍ଥ ହୋଇ ନ ଥିଲେ। ଏହି ଧାରାକୁ ଭାଙ୍ଗିବାକୁ ଚାହିଁବେ ରୋହିତ ଶର୍ମା। ବିଶ୍ୱକପ ପରାଜୟକୁ ଭୁଲି ଭାରତ ସେହି ସଫଳତା ହାସଲ କରିବାକୁ ଚାହିଁବ ଯାହା ପୂର୍ବର କୌଣସି ଦଳ ହାସଲ କରି ପାରି ନାହାନ୍ତି।
