ଶାରଜା,୩୦।୧୦: ଟି-୨୦ ବିଶ୍ବକପ ଗ୍ରୁପ-୧ର ଶନିବାର ମ୍ୟାଚରେ ଦକ୍ଷିଣ ଆଫ୍ରିକା ୪ ଉଇକେଟରେ ଶ୍ରୀଲଙ୍କାକୁ ପରାସ୍ତ କରଛି। ଦକ୍ଷିଣ ଆଫ୍ରିକା ଟସ୍ ଜିତି ବୋଲିଂ କରିଥିଲା। ବ୍ୟାଟିଂ କରିବାକୁ ଆସି ଶ୍ରୀଲଙ୍କା ୨୦ ଓଭରରେ ୧୪୨ ରନ୍ କରି ଅଲ୍ଆଉଟ ହୋଇଯାଇଥିଲା। ଫଳରେ ଦକ୍ଷିଣ ଆଫ୍ରିକା ଆଗରେ ୧୪୩ ରନ୍ର ବିଜୟ ଲକ୍ଷ୍ୟ ରଖିଥିଲା ଶ୍ରୀଲଙ୍କା। ଦକ୍ଷିଣ ଆଫ୍ରିକାର ଓପନର କ୍ୱିଣ୍ଟନ ଡି’କକ୍ ଏବଂ ରେଜା ହେଣ୍ଡ୍ରିକ୍ସ ବିଶେଷ କିଛି କରିପାରି ନ ଥିଲେ।
ପ୍ରଥମ ଉଇକେଟ ଭାବେ ରେଜା ହେଣ୍ଡ୍ରିକ୍ସ ୧୧ ରନ୍ କରି ଦୁଷ୍ମନ୍ତ ଚାମିରାଙ୍କ ବଲ୍ରେ ଆଉଟ ହୋଇଥିଲେ। ସେହିପରି ଚାମିରାଙ୍କ ପରବର୍ତ୍ତୀ ବଲ୍ରେ କ୍ୱିଣ୍ଟନ ଡି’କକ୍ ୧୨ରନ୍ କରି ଆଉଟ୍ ହୋଇଥିଲେ। ୩ୟ ସ୍ଥାନରେ ଆସିଥିବା ରାସିଭାନ ଡର ଦୁସେନ ୧୬ ରନ କରି ଆଉଟ ହୋଇଥିଲେ । ଫଳରେ ଦକ୍ଷିଣ ଆଫ୍ରିକା ସଙ୍କଟରେ ପଡିଯାଇଥିଲା। ପରବର୍ତ୍ତୀ ସମୟରେ ଦକ୍ଷିଣ ଆଫ୍ରିକା ଅଧିନାୟକ ଟେମ୍ବା ଭାବୁମା ୪୬ ରନ୍ କରି ଦଳୀୟ ସ୍କୋରକୁ ଆଗେଇ ନେଇଥିଲେ । ଶେଷ ଓଭରରେ ଦକ୍ଷିଣ ଆଫ୍ରିକାକୁ ୧୬ ରନ୍ର ଆବଶ୍ୟକତା ରହିଥିଲା। ବିସ୍ଫୋରକ ଡେଭିଡ ମିଲର ୨ଟି ବଲ୍ରେ ୨ଟି ଛକା ମାରି ଦଳ ପାଇଁ ବିଜୟ ଆଣିଦେଇଥିଲେ।
