ଜୋହାନ୍ସବର୍ଗ,୨୯।୬: ଦକ୍ଷିଣ ଆଫ୍ରିକା ସରକାର ନିଜର ଏକ ବିବାଦୀୟ ପ୍ରସ୍ତାବକୁ ନେଇ ଚର୍ଚ୍ଚାରେ ରହିଛନ୍ତି। ଅନେକ ଦେଶରେ ପୁରୁଷଙ୍କର ଏକରୁ ଅଧିକ ପତ୍ନୀଙ୍କୁ ବିବାହ କରିବାର ଅଧିକାର ରହିଛି। କିନ୍ତୁ ଦକ୍ଷିଣ ଆଫ୍ରିକାରେ ମହିଳାକ୍ଷେତ୍ରରେ ସମାନ ଅଧିକାର ନାହିଁ। ତେଣୁ ଏହାକୁ ନେଇ ଦକ୍ଷିଣ ଆଫ୍ରିକାରେ ଏବେ ବିତର୍କ ଚାଲିଥିବା ବେଳେ ମହିଳାଙ୍କୁ ଏକାଧିକ ବିବାହ ଅନୁମତି ଦେବାକୁ ସରକାର ଏକ ପ୍ରସ୍ତାବ ଦେଇଛନ୍ତି। ଏହି ପ୍ରସ୍ତାବକୁ ଦେଶର ଅନେକ ଲୋକ ତଥା କିଛି ଧାର୍ମିକ ସଂଗଠନ ଓ ରାଜନୈତିକ ଦଳର ନେତାମାନେ ଏହାକୁ ବିରୋଧ କରିଛନ୍ତି। ଏହି ବ୍ୟବସ୍ଥା ଦକ୍ଷିଣ ଆଫ୍ରିକାରର ସଂସ୍କୃତିକୁ ଧ୍ୱଂସ କରିଦେବ ବୋଲି କୁହାଯାଉଛି। ମହିଳାମାନେ କେବେ ବି ପୁରୁଷଙ୍କ ସ୍ଥାନ ନେଇପାରିବେ ନାହିଁ ବୋଲି ସେମାନେ କହିଛନ୍ତି। ସୂଚନାଯୋଗ୍ୟ, ଦକ୍ଷିଣ ଆଫ୍ରିକାକୁ ଉଦାରବାଦୀ ଦେଶ ଭାବେ ବିବେଚନା କରାଯାଏ। ପୂର୍ବରୁ ଦେଶରେ ସମଲିଙ୍ଗୀ ବିବାହକୁ ଅନୁମତି ଦିଆଯାଇଥିବା ବେଳେ ପୁରୁଷମାନେ ମଧ୍ୟ ଏକାଧିକ ସ୍ତ୍ରୀ ରଖିପାରିବେ ବୋଲି ଦେଶରେ ଆଇନଗତ ଅଧିକାର ରହିଛି। କିନ୍ତୁ ବର୍ତ୍ତମାନ ମହିଳାଙ୍କୁ ବି ସମାନ ଅଧିକାର ଦିଆଯିବା ପାଇଁ ସ୍ବେଚ୍ଛାସେବୀମାନେ ସରକାରଙ୍କ ନିକଟରେ ଦାବି କରିଛନ୍ତି। ଆଉ ଏହାକୁ ଆଇନର ମାନ୍ୟତା ଦେବାକୁ ସେମାନେ ସରକାରଙ୍କୁ ଏକ ଦାବିପତ୍ର ଦେଇଛନ୍ତି। ତେବେ ଏହି ପ୍ରସ୍ତାବ ଉପରେ ଦକ୍ଷିଣ ଆଫ୍ରିକାର ଗୃହମନ୍ତ୍ରଣାଳୟ କାମ କରୁଥିବା ଜଣାପଡ଼ିଛି।