ହ୍ରାଇଦ୍ରାବାଦ: ଦକ୍ଷିଣ ଭାରତୀୟ ଫିଲ୍ମରେ ଦୁଇଟି ଜିନିଷ ନିଶ୍ଚିତ ଭାବେ ମିଳିବ। ତାହା ହେଲା ଆକ୍ସନ ଏବଂ କମେଡି। ରଜନୀକାନ୍ତ, ମହେଶ ବାବୁ, ରାଣା ଦୁଗ୍ଗୁବତୀ, ବିଜୟଙ୍କ ଭଳି ଅଭିନେତାମାନେ ଆକ୍ସନ ପାଇଁ ଜଣାଶୁଣା ହୋଇଥିବାବେଳେ କମେଡି କଥା ପଡ଼ିଲେ ପ୍ରତ୍ୟେକ ଚଳଚ୍ଚିତ୍ରରେ ଜଣେ ଲୋକପ୍ରିୟ କଳାକାରଙ୍କୁ ଦେଖିବାକୁ ମିଳିଥାଏ। ସେ ହେଲେ ହାସ୍ୟ ଅଭିନେତା ତଥା କମେଡିଆନ୍ ବ୍ରହ୍ମାନନ୍ଦମ୍। ତାଙ୍କ ଲୋକପ୍ରିୟତା ଅଧିକ ହୋଇଥିବାରୁ ଲୋକମାନେ ତାଙ୍କୁ ସୁପରଷ୍ଟାରଙ୍କ ଭଳି ଭଲପାଇଥାନ୍ତି। ଅତ୍ୟନ୍ତ ଗରିବ ପରିବାରରୁ ଆସିଥିବା ବ୍ରହ୍ମାନନ୍ଦମ୍ ସିନେମାରେ ନିଜର ସ୍ଥାନ ସୃଷ୍ଟି କରିଛନ୍ତି। ଏବେ ସେ ଗୋଟିଏ ଫିଲ୍ମ ପାଇଁ ମୋଟା ଅଙ୍କର ପାଉଣା ନେଉଛନ୍ତି। ଦେଖିବାକୁ ଗଲେ ବଲିଉଡ୍ର ଅନେକ କଳାକାରଙ୍କ ପାଉଣା ମଧ୍ୟ ସେତେ ନୁହେଁ।
ଅନେକ ସୁପରହିଟ୍ ଫିଲ୍ମରେ ଅଭିନୟ କରିଥିବା ବ୍ରହ୍ମାନନ୍ଦମ୍ଙ୍କ ନାମ ଗିନିଜ ବୁକ୍ ଅଫ୍ ଓ୍ବାଲ୍ଡ ରେକର୍ଡରେ ଲିପିବଦ୍ଧ ହୋଛି। କାରଣ ସେ ଦକ୍ଷିଣ ଭାରତର ୧୦୦୦ରୁ ଅଧିକ ଫିଲ୍ମରେ କାମ କରିଛନ୍ତି। ଏହି ରେକର୍ଡ କେବଳ ତାଙ୍କ ନାମରେ ହିଁ ରହିଛି। ଏହି କମେଡିଆନଙ୍କୁ ଚଳଚ୍ଚିତ୍ରଜଗତକୁ ଆଣିବାର ଶ୍ରେୟ ଚଳଚ୍ଚିତ୍ର ନିର୍ମାତା ଜାନ୍ଧ୍ୟାଲାଙ୍କୁ ଦିଆଯାଇଛି। ସେ ହିଁ ତାଙ୍କୁ ୧୯୮୬ ମସିହାରେ ଚଳଚ୍ଚିତ୍ରକୁ ଆଣିଥିଲେ। ସେ ଫିଲ୍ମ ‘ଚାଣ୍ଟାବାଇ’ରୁ ଡେବ୍ୟୁ କରିଥିଲେ। ୩୫ ବର୍ଷର କ୍ୟାରିୟର ପୂରଣ କରିଥିବା ବ୍ରହ୍ମାନନ୍ଦମ କିଛି ଦିନ ପୂର୍ବେ ଅଭିନେତ୍ରୀ ଅନୁଷ୍କା ସେଟ୍ଟୀଙ୍କ ଉପରେ କମେଣ୍ଟ କରି ଚର୍ଚ୍ଚାକୁ ଆସିଥିଲେ।
ରିପୋର୍ଟ ମୁତାବକ, ବ୍ରହ୍ମାନନ୍ଦମ ଗୋଟିଏ ଚଳଚ୍ଚିତ୍ର ପାଇଁ ୧ କୋଟି ଟଙ୍କା ପର୍ଯ୍ୟନ୍ତ ପାଉଣା ନିଅନ୍ତି। ତାଙ୍କୁ ଦକ୍ଷିଣ ଭାରତୀୟ ଦାମୀ ତାରକାଙ୍କ ତାଲିକାରେ ଗଣାଯାଏ। ସେ ଅତି ବିଳାସପୂର୍ଣ୍ଣ ଜୀବନ ଅତିବାହିତ କରିଥାନ୍ତି। କାର୍ର ସଉକ ମଧ୍ୟ ତାଙ୍କର ରହିଛି। ସୋସିଆଲ ମିଡିଆରେ ସେ ସକ୍ରିୟ ଥିବା ବେଳେ ୟୁଟ୍ୟୁବ୍ରେ ତାଙ୍କର ଭିଡିଓ ପ୍ରତିଦିନ ଭାଇରାଲ ହେଉଅଛି।
