ନୂଆଦିଲ୍ଲୀ, ୬ା୪- ତାମିଲନାଡୁ ବିଧାନସଭା ନିର୍ବାଚନରେ ମତଦାନ ସାବ୍ୟସ୍ତ କରିବା ପାଇଁ ସାଇକେଲରେ ପହଞ୍ଚିଥିଲେ ସାଉଥ୍ ସୁପର ଷ୍ଟାର ବିଜୟ। ଏଥି ଯୋଗୁ ପୂରା ରାସ୍ତାରେ ଭିଡ ଜମାଇଥିଲେ ବିଜୟଙ୍କ ଫ୍ୟାନ। ରାସ୍ତାରେ ସୃଷ୍ଟି ହୋଇଥିଲା ଟ୍ରାଫିକ୍ ଜାମ୍ ଭଳି ପରିସ୍ଥିତି। କିଛି ସମୟ ପାଇଁ ଠପ ହୋଇଯାଇଥିଲା ଯାତାୟତ।
ସୋସିଆଲ ମିଡିଆରେ ଭାଇରାଲ ହେଉଥିବା ଭିଡିଓରେ ବିଜୟ ସାଇକେଲ ଚଲାଉଛନ୍ତି। ଆଉ ତାଙ୍କୁ ପିଛା କରୁଛନ୍ତି ବାଇକ୍ ଚଳାଉଥିବା ଅନେକ ପ୍ରଶଂସକ। ଅମାନିଆ ଫ୍ୟାନଙ୍କ ଠାରୁ ଦୂରେଇବା ଲାଗି ବିଜୟ ଜୋରେ ସାଇକେଲ ଚଲାଇବାକୁ ବିଫଳ ଉଦ୍ୟମ କରୁଥିବା ଦେଖିବାକୁ ମିଳୁଛି ଭିଡିଓରେ। ପୋଲିଂ ବୁଥରେ ଏହି ଷ୍ଟାର ପହଞ୍ଚିବା ପରେ ଅତ୍ୟଧିକ ଭିଡ଼ ହୋଇଯାଇଥିଲା। ଏପରି କି ଲୋକଙ୍କୁ ଘଉଡ଼ାଇବା ପାଇଁ ଲାଠି ଚାର୍ଜ କରିଥିଲା ପୋଲିସ।
ମତଦାନ କେନ୍ଦ୍ର ଘରଠୁ ପାଖରେ ଓ ସେଠାରେ କାର ପାର୍କ କରିବାକୁ ଯାଗ ନ ଥିବାରୁ ବିଜୟ ସାଇକେଲ ବ୍ୟବହାର କରିଥିଲେ। ଏହା ପଛରେ ଅନ୍ୟ କୌଣସି ପ୍ରକାର ଉଦ୍ଦେଶ୍ୟ ନ ଥିଲା ବୋଲି କୁହାଯାଇଛି।