ଲକ୍ଷ୍ନୌ,୧୩।୨: ସମାଜବାଦୀ ପାର୍ଟି (ଏସ୍ପି) ନେତା ଆଜମ ଖାନ୍ ଏବଂ ତାଙ୍କ ପୁଅ ଅବଦ୍ଦୁଲ୍ଲା ଖାନ୍ଙ୍କୁ କୋର୍ଟରୁ ଏକ ବଡ଼ ଝଟ୍କା ମିଳିଛି। ୨୦୦୮ ମାମଲାରେ କୋର୍ଟ ତାଙ୍କୁ ଦୋଷୀ ସାବ୍ୟସ୍ତ କରିଛନ୍ତି। ଏଥିସହ କୋର୍ଟ ଏହି ମାମଲାରେ ଦଣ୍ଡ ଘୋଷଣା କରିଛନ୍ତି। ଆଜମ ଓ ଅବଦ୍ଦୁଲ୍ଲାଙ୍କୁ କୋର୍ଟ ୨-୨ବର୍ଷର ଜେଲ୍ ଦଣ୍ଡାଦେଶ ଶୁଣାଇଛନ୍ତି। ଏଥିସହ ଧାରା ୩୫୩ ଅନୁଯାୟୀ କୋର୍ଟ ସେମାନଙ୍କୁ ୨ହଜାର ଟଙ୍କା ଜରିମାନା ଲଗାଇଛନ୍ତି। ଏହାପରେ ଅବୁଦ୍ଦୁଲାଙ୍କ ସଦସ୍ୟତା ଉପରେ ପ୍ରଭାବ ପଡ଼ିପାରେ। ତାଙ୍କ ସଦସ୍ୟତା ବାତିଲ ହୋଇପାରେ ବୋଲି ଚର୍ଚ୍ଚା ହେଉଛି। ଇତିମଧ୍ୟରେ କୋର୍ଟ ଆଜମ ଓ ଅବଦ୍ଦୁଲାଙ୍କୁ ଜାମିନରେ ଛାଡ଼ି ଦେଇଥିବା ଜଣାପଡ଼ଇଛି। ସୂଚନାଯୋଗ୍ୟ, ୨୦୦୮ ଜାନୁୟାରୀ ୨୯ରେ ଏସ୍ପି ନେତା ଆଜମ ଖାନ ଏବଂ ତାଙ୍କ ପୁଅ ଅବଦ୍ଦୁଲ୍ଲା ଏବଂ ଅନ୍ୟ ଏସ୍ପିଙ୍କ ବିରୋଧରେ ଏହି ମାମଲା ରୁଜୁ ହୋଇଥିଲା। ଜାନୁୟାରୀ ୨୯, ୨୦୦୮ରେ ଛଜଲେଟ ପୋଲିସ ଏସ୍ପିର ପୂର୍ବତନ ମନ୍ତ୍ରୀ ତଥା ରାମପୁରର ପୂର୍ବତନ ବିଧାୟକ ଆଜମ ଖାନ୍ଙ୍କ କାରକୁ ଯାଞ୍ଚ ପାଇଁ ଅଟକାଇଥିଲା। ଏହି ସମୟରେ ଆଜମ ଖାନ ଉତ୍ତ୍ୟକ୍ତ ହୋଇପଡ଼ି ରାସ୍ତାରେ ବସିଯାଇଥିଲେ। ଏହାପରେ ଆଜମ ଏବଂ ତାଙ୍କ ସହଯୋଗୀମାନେ ରାସ୍ତା ଅବରୋଧ କରି ସରକାରୀ କାର୍ଯ୍ୟରେ ବାଧା ସୃଷ୍ଟି କରିବା ସହ ଭିଡ଼କୁ ଉସକାଇବା ଅଭିଯୋଗ ହୋଇଥିଲା। ବର୍ତ୍ତମାନ ଏହି ମାମଲାରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। ଅନ୍ୟପଟେ ଏହି ମାମଲାରେ ଆଜମ, ଅବଦ୍ଦୁଲ୍ଲା ଏବଂ ମେହବୁବ ଅଲିଙ୍କ ସମେତ ୯ଜଣ ଏସ୍ପି ନେତାଙ୍କ ବିରୋଧରେ ଅଭିଯୋଗ ହୋଇଥିଲା। ହେଲେ କୋର୍ଟ ଆଜମ, ଅବଦ୍ଦୁଲ୍ଲାଙ୍କୁ ଦୋଷୀ ସାବସ୍ତ୍ୟ କରି ଅବଶିଷ୍ଟ ଲୋକଙ୍କୁ ନିର୍ଦ୍ଦୋଷରେ ଖଲାସ୍ କରିଛନ୍ତି।