ବଲିଉଡ୍ ଅଭିନେତା ଅଜୟ ଦେବଗନଙ୍କୁ ରିଲ ଲାଇଫ୍ ସିଙ୍ଘମ କୁହାଯାଏ। ହେଲେ ରିଅଲ ଲାଇଫ୍ରେ ଜଣେ ଏଭଳି ଆଇଏଏସ୍ ଅଫିସର ଅଛନ୍ତି, ଯାହାଙ୍କୁ ଅପରାଧିଙ୍କ ପ୍ରାଣେ ଭୟ। ସେ ହେଲେ ଏସ୍ପି ମୁଦୁଲ କଚ୍ଛାବା। ତାଙ୍କ ନାମ ଶୁଣିବା ମାତ୍ରେ ଅପରାଧୀଙ୍କ ମନରେ ଛନକା ପଶିଯାଏ।
ମୁଦୁଲ ରାଜସ୍ଥାନର ବିକାନେର ଜିଲାରେ ରୁହନ୍ତି। ସେଠାରେ ହିଁ ସେ ପ୍ରାଥମିକ ଶିକ୍ଷା ଗ୍ରହଣ କରିଥିଲେ। ରାଜସ୍ଥାନ ବିଶ୍ୱବିଦ୍ୟାଳୟରୁ ସେ ଏମ୍ଆଇବି କରିଛନ୍ତି। ଡିଗ୍ରୀ ହାସଲ କରିବା ପରେ ସେ ସିଏ ଏବଂ ସିଏସ୍ ପାଇଁ ପ୍ରସ୍ତୁତ ହୋଇଥିଲେ। ପରେ ସେ ନେଟ୍ କ୍ୱାଲିଫାଏ କରିଥିଲେ। ଜର୍ମାନୀରେ ଏକ ବର୍ଷ ଚାକିରି କରିବା ପରେ ସେ ୟୁପିଏସ୍ସି ପଢ଼ା ଆରମ୍ଭ କରିବା ଲାଗି ଦିଲ୍ଲୀ ଆସିଥିଲେ। ସେଠାରେ ଅଢ଼େଇ ବର୍ଷ ରହିଥିଲେ। ୨୦୧୪ରେ ସେ ଡାକ ବିଭାଗରେ ଚାକିରି ପାଇଥିଲେ। ହେଲେ ତାଙ୍କର ସ୍ବପ୍ନ ଥିଲା ଆଇପିଏସ୍ ହେବା। ୨୦୧୫ରେ ସେ ଏହି ସଫଳତା ପାଇଥିଲେ। ତାଙ୍କ ସ୍ତ୍ରୀଙ୍କ ନାମ କନିକା ସିଂହ। କନିକା ବରିଷ୍ଠ ଆଇପିଏସ୍ ଅଧିକାରୀ ପଙ୍କଜ ସିଂହଙ୍କ ଝିଅ।
ପ୍ରୋବେଶନାଲ ଏସ୍ପି ଭାବେ ସେ ୨୦୧୭ ଜାନୁୟାରୀରୁ ଜୁନ୍ ପର୍ଯ୍ୟନ୍ତ କାମ କରିଥିଲେ। ପରେ ସେ ଗଙ୍ଗାନଗରରେ ୨୦୧୮ ପର୍ଯ୍ୟନ୍ତ ଅତିରିକ୍ତ ପୋଲିସ ଅଧିକାରୀ ଭାବେ କାମ କରିଥିଲେ। ପରେ ମୁଦୁଲଙ୍କୁ ଧୋଲପୁର ଜିଲାର ଏସ୍ପି କରାଯାଇଥିଲା। ଏଠାରେ ସେ ଅପରାଧିଙ୍କ ଧରପଗଡ଼ ଆରମ୍ଭ କରିଥିଲେ। ସେଠାରେ ନିଜର କିଛିଦିନ କାର୍ଯ୍ୟକାଳରେ ସେ ୫୭ଜଣ ଡକାୟତ ଏବଂ ଅନ୍ୟ ଅପରାଧୀଙ୍କୁ ଗିରଫ କରିଛନ୍ତି। ବିଶେଷକରି ଅପରାଧୀଙ୍କ ଆଡ୍ଡାସ୍ଥଳ କୁହାଯାଉଥିବା ଧୋଲପୁର ଜିଲାର ଚମ୍ବଲର ବିହଡ଼ରେ ତାଙ୍କ ନାମରେ ଭୟ ପଶୁଥିଲା। ଏହି ଯୁବ ଅଫିସର ଅପରାଧୀଙ୍କୁ ଧରିବା ପାଇଁ ଟିମ୍ ଗଠନ କରି ନିଜେ ମଧ୍ୟ ନଜର ରଖିଥିଲେ। ଏବେ ସେ ନିଜ କାମରେ ସଫଳ ହୋଇଥିବା କୁହାଯାଉଛି।
୨୦୧୯ ଜୁଲାଇରୁ ଏବେ ମଧ୍ୟରେ ମୁଦୁଲ ୫୭ଜଣ ଡକାୟତ ଏବଂ ହାର୍ଡକୋର ଅପରାଧିଙ୍କୁ ଧରିଛନ୍ତି। ସେମାନଙ୍କ ମଧ୍ୟରେ ରହିଛନ୍ତି ପପ୍ପୁ ଗୁର୍ଜର, ଲାଲ ସିଂ ଗୁର୍ଜର, ରାମବିଲାସ ଗୁର୍ଜର, ଭାରତ ଗୁର୍ଜର, ରଘୁରାଜ ଗୁର୍ଜର ପ୍ରମୁଖ ଅପରାଧି। ତେବେ କେବଳ ଲକ୍ଡାଉନ୍ ସମୟ ମଧ୍ୟରେ ୨୨ରୁ ଅଧିକ ଡକାୟତଙ୍କୁ ସେ ଗିରଫ କରି ଜେଲକୁ ପଠାଇଦେଇଛନ୍ତି। ଦୀର୍ଘ ୧୧ ମାସ ଧରି କଷ୍ଟ କରିବା ପରେ ଶେଷରେ ଚମ୍ବଲ ଅପରାଧମୁକ୍ତ ହୋଇଛି।