ନୂଆଦିଲ୍ଲୀ,୨୪।୫ : ନୂତନ ସଂସଦ ଭବନର ଉଦଘାଟନକୁ ନେଇ ରାଜନୈତିକ ଉତ୍ତେଜନା ମଧ୍ୟରେ ଏଆଇଏମଆଇଏମ ମୁଖ୍ୟ ଅସଦୁଦ୍ଦିନ ଓୱାଇସି ଏକ ନୂଆ ପରାମର୍ଶ ଦେଇଛନ୍ତି। ଓୱାଇସି କହିଛନ୍ତି ଉଭୟ ପ୍ରଧାନମନ୍ତ୍ରୀ ଏବଂ ରାଷ୍ଟ୍ରପତି ନୂତନ ସଂସଦ ଗୃହର ଉଦଘାଟନ କରିବା ଉଚିତ ନୁହେଁ। ଓୱାଇସିଙ୍କ ଅନୁଯାୟୀ, ପ୍ରଧାନମନ୍ତ୍ରୀ ଏବଂ ରାଷ୍ଟ୍ରପତି କାର୍ଯ୍ୟନିର୍ବାହୀଙ୍କର ଏକ ଅଂଶ, ଯେଉଁଥିପାଇଁ ବାଚସ୍ପତି ନୂତନ ସଂସଦ ଗୃହର ଉଦଘାଟନ କରିବା ଉଚିତ।
ଓୱାଇସି ସ୍ପଷ୍ଟ ଭାବରେ କହିଛନ୍ତି, ଯଦି ପ୍ରଧାନମନ୍ତ୍ରୀ ନୂତନ ସଂସଦ ଗୃହର ଉଦଘାଟନ କରନ୍ତି, ତେବେ ଆମେ ସେହି କାର୍ଯ୍ୟକ୍ରମରେ ଯୋଗଦେବୁ ନାହିଁ। ବାଚସ୍ପତି ଉଦଘାଟନ କଲେ ଏଆଇଏମଆଇଏମ କାର୍ଯ୍ୟକ୍ରମରେ ଅଂଶଗ୍ରହଣ କରିବ। ସେ ଏହା ମଧ୍ୟ କହିଛନ୍ତି ପ୍ରଧାନମନ୍ତ୍ରୀ ଏହି ସମୟରେ ଏଥିରୁ ଓହରିଯିବା ଉଚିତ।
ଏକ ନୂତନ ସଂସଦ ଭବନର ପ୍ରସ୍ତାବ ସମ୍ପର୍କରେ ଓୱାଇସି କହିଛନ୍ତି ୨୦୧୯ ଲୋକସଭା ନିର୍ବାଚନ ପରେ ପ୍ରଧାନମନ୍ତ୍ରୀ ଏକ ସର୍ବଦଳୀୟ ବୈଠକ ଡାକିଥିଲେ। ଏହି ବୈଠକର ଏଜେଣ୍ଡା ଗୋଟିଏ ରାଷ୍ଟ୍ର, ଗୋଟିଏ ନିର୍ବାଚନ ଥିଲା। ପ୍ରାୟ ସମସ୍ତ ଦଳ ଏଥିରେ ସହମତ ହୋଇଥିଲେ। ଯଦିଓ ମୁଁ ଏବଂ ସୀତାରାମ ୟେଚୁରୀ ଏହାକୁ ବିରୋଧ କରିଥିଲୁ। ମୁଁ ଏକ ନୂତନ ଲୋକସଭା ଗଠନ କରିବାକୁ ପ୍ରସ୍ତାବ ଦେଇଥିଲି। ସେତେବେଳେ ପ୍ରଧାନମନ୍ତ୍ରୀ ମୋ ଉପରେ ବହୁତ ରାଗିଥିଲେ।
ଓୱାଇସି କହିଛନ୍ତି ଆମେ ବିରୋଧ କରୁଛୁ ଶକ୍ତି ପୃଥକ କରିବାର ସିଦ୍ଧାନ୍ତ(ଥିଓରି ଅଫ ସେପାରେଶନ ଅଫ ପାଓ୍ବାର) ହେଉଛି ସମ୍ବିଧାନର ଏକ ଅଂଶ। ଯଦି ପ୍ରଧାନମନ୍ତ୍ରୀ ଉଦଘାଟନ କରନ୍ତି ତେବେ ଏହାର ସମ୍ପୂର୍ଣ୍ଣ ଉଲ୍ଲଂଘନ ହେବ। ସଂସଦ ଗୃହର ଉଦଘାଟନୀ ସମାରୋହ ନେଇ କୌଣସି ବିରୋଧୀ ଆମ ସହ ଯୋଗାଯୋଗ କରି ନାହାନ୍ତି।
ପ୍ରଧାନମନ୍ତ୍ରୀ ଚାହୁଁଛନ୍ତି ଯେ କେବଳ ତାଙ୍କ ଦଳ ସମଗ୍ର ଦେଶରେ ରହୁ। ନୂତନ ସଂସଦ ଭବନର ଆବଶ୍ୟକତାକୁ ଅସ୍ବୀକାର କରାଯାଇପାରିବ ନାହିଁ, କାରଣ ବିଦ୍ୟମାନ ସଂସଦ ଭବନରେ ଅଗ୍ନିଶମ ବିଭାଗର ଏନଓସି ନାହିଁ।