କେନ୍ଦୁଝର, ୧୩ ।୨(ନରେଶ ଚନ୍ଦ୍ର ପଟ୍ଟନାୟକ): କେନ୍ଦୁଝର ଜିଲାରେ ଓମ୍ବାଡସି ସହାୟତାରେ ୨୦୨୧ରୁ ୩ଟି ଅତ୍ୟାଧୁନିକ ଆମ୍ବୁଲାନ୍ସ ସେବା କାର୍ଯ୍ୟକ୍ଷମ ହେଉଛି। ସେଥିମଧ୍ୟରୁ ଗୋଟିଏ ଆଡଭାନ୍ସଡ ଲାଇଫ ସପୋର୍ଟ ଆମ୍ବୁଲାନ୍ସ (ଏଏଲଏସ) ରହିଥିବା ବେଳେ ୨ଟି ହେଉଛି ବେସିକ ଲାଇଫ ସପୋର୍ଟ ଆମ୍ବୁଲାନ୍ସ (ବିଏଲଏସ)। ଏହି ଆମ୍ବୁଲାନ୍ସଗୁ ଜିଲ୍ଲାର ବିଭିନ୍ନ ସ୍ବାସ୍ଥ୍ୟ କେନ୍ଦ୍ର ସହିତ ଯୋଡା ଯାଇଛି।
ଜିଲାର ଆନନ୍ଦପୁର ଉପଖଣ୍ଡ ଚିକିତ୍ସାଳୟ ସହିତ ଶାଳଣିଆଁ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ର ଏବଂ ସାଇଁକୁଳ ସ୍ବାସ୍ଥ୍ୟ ଓ ଆରୋଗ୍ୟ କେନ୍ଦ୍ରରେ ଏହି ଆମ୍ବୁଲାନ୍ସ ସେବା ଉପଲବ୍ଧ ରହିଛି। ଏହି ଆମ୍ବୁଲାନ୍ସର ନାମ ‘ଓମ୍ବାଡସି ସେବା ସଂଯୋଗ ବାହନ’ ରଖାଯାଇଛି। ଏହି ସ୍ବାସ୍ଥ୍ୟ କେନ୍ଦ୍ରରେ ଚିକିତ୍ସିତ ରୋଗୀମାନଙ୍କୁ ବଡ ଡାକ୍ତରଖାନାକୁ ପଠାଇବା ବେଳେ ଓମ୍ବାଡସିର ଏହି ଆମ୍ବୁଲାନ୍ସ ସେବା ଏକ ପ୍ରମୁଖ ଭୂମିକା ଗ୍ରହଣ କରୁଛି। ୨୦୨୧ ମେ’ରୁ ୨୦୨୩ ଡିସେମ୍ବର ଭିତରେ ୬ ହଜାର ୪୯୩ ଜଣ ରୋଗୀ ଏହି ଆମ୍ବୁଲାନ୍ସ ସେବା ଦ୍ୱାରା ଉପକୃତ ହୋଇଛନ୍ତି ବୋଲି ସୂଚନା ଦିଆଯାଇଛି। ଓମ୍ବାଡସିର ଏହି ସ୍ବତନ୍ତ୍ର ଆମ୍ବୁଲାନ୍ସ ସେବା ଫଳରେ ୨୦୨୧ ମେ’ରୁ ୨୦୨୨ ମାର୍ଚ୍ଚ ଭିତରେ ୧୭୬୨ ଜଣ ରୋଗୀ ଉପକୃତ ହୋଇଛନ୍ତି। ସେହିପରି ୨୦୨୨ ଏପ୍ରିଲରୁ ୨୦୨୩ ମାର୍ଚ୍ଚ ଭିତରେ ୨୬୬୯, ଏପ୍ରିଲ ୨୦୨୩ରୁ ୨୦୨୪ ଜାନୁଆରୀ ମାସ ସୁଦ୍ଧା ୨୦୬୨ ଜଣ ରୋଗୀଙ୍କୁ ଏହି ଆମ୍ବୁଲାନ୍ସ ସେବା ଯୋଗାଇ ଦେଇଛି। ପ୍ରତି ମାସରେ ୨୦୦ରୁ ୨୫୦ ଜଣ ରୋଗୀ ଏହି ସେବା ପାଇଛନ୍ତି।
ଆଡଭାନ୍ସଡ ଲାଇଫ ସପୋର୍ଟ ଆମ୍ବୁଲାନ୍ସରେ ଅକ୍ସିଜେନ, ଭେଣ୍ଟିଲେଟର, ପଲ୍ସ ଅକ୍ସିମିଟର, ଗ୍ଲୁକୋମିଟର, ନେବିଲାଇଜର୍, ଇନଫ୍ୟୁଜନ ପମ୍ପ, ସକ୍ସନ ମେସିନ ଏବଂ ବିଭିନ୍ନ ପ୍ରକାରର ଷ୍ଟ୍ରେଚର ଆଦି ରହିଛି। ସେହିପରି ବେସିକ ଲାଇଫ ସପୋର୍ଟ ଆମ୍ବୁଲାନ୍ସରେ ଭେଣ୍ଟିଲେଟର ଛଡା ଅନ୍ୟନ୍ୟ ପ୍ରାଥମିକ ଚିକିତ୍ସା ସୁବିଧା ରହିଛି। ତା’ଛ ଦୁର୍ଘଟଣାଗ୍ରସ୍ତ ରୋଗୀଙ୍କୁ ସୁବିଧାରେ ଡାକ୍ତରଖାନା ନେବା ପାଇଁ ସ୍ପାଇନ ବୋର୍ଡ ସହିତ ଆବଶ୍ୟକ ଔଷଧ ଓ ଇଞ୍ଜେକ୍ସନ ମଧ୍ୟ ଉପଲବ୍ଧ ରହିଛି।
ଏହି ଏଏଲଏସ ଓ ବିଏଲଏସ ଆମ୍ବୁଲାନ୍ସ ଛଡା କେନ୍ଦୁଝର ଜିଲାାରେ ପ୍ରଶାସନ ପକ୍ଷରୁ ୧୦୮ ଓ ୧୦୨ ଆମ୍ବୁଲାନ୍ସ ସେବା ମଧ୍ୟ ଚାଲିଛି। ଫଳରେ ରୋଗୀମାନେ ଘର ପାଖରୁ ସୁବିଧାରେ ନିକଟସ୍ଥ ଡାକ୍ତରଖାନାରେ ପହଞ୍ଚି ପାରୁଛନ୍ତି।
କେନ୍ଦୁଝର ସହିତ ରାଜ୍ୟର ବିଭିନ୍ନ ଖଣି ପ୍ରଭାବିତ ଜିଲାରେ ଲୋକଙ୍କୁ ଉନ୍ନତମାନର ସ୍ବାସ୍ଥ୍ୟ ସେବା ଯୋଗାଇଦେବା ପାଇଁ ଓମ୍ବାଡସି ପକ୍ଷରୁ ବିଭିନ୍ନ କାର୍ଯ୍ୟକ୍ରମ ହାତକୁ ନିଆଯାଉଛି। ବିଭିନ୍ନ ସ୍ବାସ୍ଥ୍ୟ କେନ୍ଦ୍ରଗୁଡିକ ନବୀକରଣ କରାଯିବା ସହ ଅତ୍ୟାଧୁନିକ ଉପକରଣ ଯୋଗାଇ ଦେବା ଫଳରେ ସ୍ବାସ୍ଥ୍ୟ ସେବାର ରୂପରେଖ ବଦଳିଛି। ଏଥିରେ ଆମ୍ବୁଲାନ୍ସ ସେବା ଯୋଡି ହେବା ଫଳରେ ଖଣି ପ୍ରଭାବିତ କେନ୍ଦୁଝର ଜିଲାରେ ସ୍ବାସ୍ଥ୍ୟ ସେବା କ୍ଷେତ୍ର ଅଧିକ ସୁଦୃଢ ହୋଇପାରିଛି।
