ଭୁବନେଶ୍ୱର,୨୯।୧୨(ବ୍ୟୁରୋ): ହକି ବିଶ୍ୱକପ୍ ପାଇଁ ଭୁବନେଶ୍ୱର ଉନ୍ନୟନ କର୍ତ୍ତୃପକ୍ଷ(ବିଡିଏ) ପକ୍ଷରୁ ୧୭ଟି ସ୍ବତନ୍ତ୍ର ସ୍କ୍ବାଡ୍ ଗଠନ କରାଯାଇଛି। ସ୍କ୍ବାଡ୍ରେ ଥିବା ଅଧିକାରୀ ଓ କର୍ମଚାରୀ ହାତରେ ଲାଠି ଧରି ସୌନ୍ଦର୍ଯ୍ୟକରଣ କାର୍ଯ୍ୟର ତଦାରଖ କରିବା ସହିତ ରାସ୍ତା ଉପରେ ଠେଲାଗାଡି ଏବଂ ଉଠାଦୋକାନୀଙ୍କୁ ହଟାଇ ଜବରଦଖଲ, ପାର୍କିଂ ତଥା ଟ୍ରାଫିକ୍ ସମସ୍ୟା ଦୂର କରିବେ। ବିଡିଏ ଉପାଧ୍ୟକ୍ଷ ବଲଓ୍ବନ୍ତ ସିଂଙ୍କ ନିର୍ଦ୍ଦେଶକ୍ରମେ ଏହି ଟିମ୍ ଗଠନ ହୋଇଥିବାବେଳେ ଏଥିପାଇଁ ସ୍ବତନ୍ତ୍ର ଗାଡି ବ୍ୟବସ୍ଥା ହୋଇଛି। ସେହିପରି ସ୍ବତନ୍ତ୍ର ଡ୍ରେସ୍କୋଡ୍ ସହ ଗାଡିରେ ପୋଲିସ ସାଇରନ ଓ ଲାଇଟ୍ ରହିଛି। ୧୭ ଏନ୍ଫୋର୍ସମେଣ୍ଟ ସ୍କ୍ବାଡ୍କୁ ଜଣେ ଓଏଏସ୍ ସ୍ତରର ଅଧିକାରୀ ମନିଟରିଂ କରିବେ। ପ୍ରତି ସ୍କ୍ବାଡ୍ରେ ଜଣେ ଏନ୍ଫୋର୍ସମେଣ୍ଟ ଆସିଷ୍ଟାଣ୍ଟ, ସର୍ଭେ ଆସିଷ୍ଟାଣ୍ଟ, ଜଣେ ବିଏମ୍ସି ଅଧିକାରୀ, ଜଣେ ୱାର୍କ ସାଇଟ୍ ଆସିଷ୍ଟାଣ୍ଟ ଓ ୨ଜଣ ସିକ୍ୟୁରିଟି କର୍ମଚାରୀ ରହିଛନ୍ତି। କମିଶନରେଟ ପୋଲିସଠାରୁ ଅନୁମତି ପରେ ପ୍ରତି ଏନ୍ଫୋର୍ସମେଣ୍ଟ ଗାଡିରେ ପୋଲିସ ଲାଇଟ୍ ସହିତ ସାଇରନ ବ୍ୟବସ୍ଥା ହୋଇଛି। ଏହା ସହ ଗାଡିରେ ମଧ୍ୟ ଷ୍ଟିକରିଂ କରାଯାଇଛି। ଲୋକମାନେ ଉଚ୍ଛେଦକାରୀ ଦଳକୁ ଚିହ୍ନିବାରେ ଯେପରି କୌଣସି ଅସୁବିଧା ନ ହୁଏ ସେଥିପାଇଁ ସ୍ବତନ୍ତ୍ର ଗାଡି ଓ ଡ୍ରେସ୍କୋଡ୍ର ବ୍ୟବସ୍ଥା କରାଯାଇଥିବା ବିଡିଏ ପକ୍ଷରୁ ସୂଚନା ଦିଆଯାଇଛି।
