ଭୁବନେଶ୍ୱର, ୧୩ା୬(ବ୍ୟୁରୋ): ଓଡ଼ିଶା ବିଧାନସଭାର ବାଚସ୍ପତି ନିର୍ବାଚନ ସୋମବାର ଅନୁଷ୍ଠିତ ହେବ। ପୂର୍ବାହ୍ନ ୧୧ଟାରେ ବିଧାନସଭାର ସ୍ବତନ୍ତ୍ର ବୈଠକ ଲାଗି ଉଭୟ ଶାସକ ଓ ବିରୋଧୀ ଦଳର ସଦସ୍ୟମାନଙ୍କୁ ସମନ କରାଯାଇଛି। ଅର୍ଥାତ୍ ୧୧ଟାରେ ବାଚସ୍ପତି ଭୋଟ୍ ଅନୁଷ୍ଠିତ ହେବ। ଏହି ଅବସରରେ ଗୃହରେ ସମସ୍ତ ସଦସ୍ୟ ଉପସ୍ଥିତ ରହିବେ। ନୂଆ ବାଚସ୍ପତି ଦାୟିତ୍ୱ ନେବାକୁ ଯାଉଥିବା ବେଳେ ବିରୋଧୀ ଦଳର ସଦସ୍ୟଙ୍କୁ ଯେପରି ନିମନ୍ତ୍ରଣ କରିବା କଥା କରାଯାଇ ନାହିଁ ବୋଲି ଭାଜପା ଅଭିଯୋଗ କରିଥିବା ବେଳେ ଏଥିରେ ଯୋଗଦେବା ନେଇ ନିଷ୍ପତ୍ତି ନିଆଯାଇ ନ ଥିବା ବିରୋଧୀ ଦଳ ମୁଖ୍ୟ ସଚେତକ ମୋହନ ମାଝି କହିଛନ୍ତି। ତେଣୁ ଉକ୍ତ ବୈଠକରେ ଯୋଗ ଦେବୁ ନା ନାହିଁ ସେକଥା ସୋମବାର ୯ଟାରେ ଏକ ବୈଠକ କରାଯିବ। ଅନ୍ୟପଟେ କଂଗ୍ରେସ କିନ୍ତୁ ଏହି ସ୍ବତନ୍ତ୍ର ବୈଠକରେ ସାମିଲ ହେବ ବୋଲି ବିଧାୟକ ସନ୍ତୋଷ ସିଂ ସାଲୁଜା ଜଣାଇଛନ୍ତି।
ସୂଚନାଯୋଗ୍ୟ, ମୁଖ୍ୟମନ୍ତ୍ରୀଙ୍କୁ ଉପ ବାଚସ୍ପତି ରଜନୀକାନ୍ତ ସିଂ ଯାଇ ଗୃହକୁ ନିମନ୍ତ୍ରଣ କରି ଆସିବେ। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବିଧାନସଭାରେ ଏକ ମୋଶନ ଆଣିବେ। ଏହାପରେ ବାଚସ୍ପତିଙ୍କ ସପକ୍ଷରେ ମୁଖ୍ୟମନ୍ତ୍ରୀ ୨ ରୁ ୩ ଲାଇନ କହିବେ। ଏହାପରେ ସଂସଦୀୟ ବ୍ୟାପାର ମନ୍ତ୍ରୀ ନିରଞ୍ଜନ ପୂଜାରୀ ଏହାକୁ ସମର୍ଥନ ଜଣାଇବେ। ଉପ ବାଚସ୍ପତି ବାଚନିକ ଭୋଟ କରିବେ। ଏହାପରେ ବାଚସ୍ପତିଙ୍କୁ ସମସ୍ତେ ସମର୍ଥନ ଜଣାଇବେ। ବାଚସ୍ପତିଙ୍କ ଉପରେ ମୁଖ୍ୟମନ୍ତ୍ରୀ ଏବଂ ଉପବାଚସ୍ପତି କିଛି କହିବେ। ବିରୋଧୀ ଦଳର ସଦସ୍ୟମାନେ ମଧ୍ୟ ଏହି ସମୟରେ ଉପସ୍ଥିତ ରହିବେ। ତେବେ ବିଜେଡି ବିଧାୟକ ବିକ୍ରମ କେଶରୀ ଆରୁଖ ବାଚସ୍ପତି ନିର୍ବାଚନ ଲାଗି ନାମାଙ୍କନପତ୍ର ଦାଖଲ କରିଛନ୍ତି। ବିରୋଧୀଙ୍କ ପକ୍ଷରୁ କାହାକୁ ମଧ୍ୟ ବାଚସ୍ପତି ପ୍ରାର୍ଥୀ କରାଯାଇ ନାହିଁ।