ପ୍ରସିଦ୍ଧ ଚିତ୍ରକର ମକବୁଲ ଫିଦା ହୁସେନ ଓରଫ୍ ଏମ.ଏଫ ହୁସେନଙ୍କୁ ଭାରତର ‘ପିକାସୋ’ କୁହାଯାଏ। ସେ ୧୯୧୫, ୧୭ ସେପ୍ଟେମ୍ବରରେ ମୁମ୍ବାଇରେ ଜନ୍ମଗ୍ରହଣ କରିଥିଲେ। ହୁସେନ ତାଙ୍କ ଚିତ୍ରକୁ ନେଇ ଅନେକ ବିବାଦରେ ଛନ୍ଦି ହୋଇପଡିଥିଲେ। ହୁସେନ ଅଭିନେତ୍ରୀ ମାଧୁରୀ ଦୀକ୍ଷିତଙ୍କ ପାଇଁ ପାଗଳ ଥିଲେ। ୮୫ ବର୍ଷ ବୟସରେ ସେ ମାଧୁରୀଙ୍କ ବିଷୟରେ ଏକ ଫିଲ୍ମ ମଧ୍ୟ କରିଥିଲେ। ମାଧୁରୀ ଦୀକ୍ଷିତଙ୍କ ଫିଲ୍ମ ହମ ଆପକେ ହେନ କୌନ (୧୯୯୪) କୁ ହୁସେନ ୬୭ ଥର ଦେଖିଥିଲେ ଏବଂ ତାଙ୍କ ଉପରେ ସମ୍ପୂର୍ଣ୍ଣ ଚିତ୍ର ଆଙ୍କିଥିଲେ। ୨୦୦୦ ମସିହାରେ ମାଧୁରୀଙ୍କ ସହ ସେ ଫିଲ୍ମ ‘ଗଜଗାମିନୀ’ କରିଥିଲେ। ବିବାହ ପରେ ମାଧୁରୀ କିଛି ବର୍ଷ ଧରି ଫିଲ୍ମ ଇଣ୍ଡଷ୍ଟ୍ରିରୁ ଦୂରରେ ଥିଲେ। ୨୦୦୭ରେ ଆଜା ନାଚଲେ ଫିଲ୍ମ ଜରିଆରେ ବଲିଉଡକୁ ଫେରିଥିଲେ। ହୁସେନ ଏହା ଜାଣି ଅତ୍ୟଧିକ ଆନନ୍ଦିତ ହୋଇଥିଲେ। ସେହି ସମୟରେ ସେ ଦୁବାଇରେ ଥିଲେ ଏବଂ ମାଧୁରୀଙ୍କ ଫିଲ୍ମ ଦେଖିବା ପାଇଁ ଦୁବାଇର ଲାମ୍ସି ସିନେମା ହଲ୍ ସମ୍ପୂର୍ଣ୍ଣ ବୁକ୍ କରିଥିଲେ। ସେହିଭଳି ହୁସେନ ମଧ୍ୟ ଅଭିନେତ୍ରୀ ତବୁଙ୍କୁ ଭଲ ପାଉଥିଲେ ଏବଂ ତାଙ୍କ ପାଇଁ ମୀନାକ୍ଷୀ: ଏ ଟେଲ ଅଫ ଥ୍ରୀ ସିଟିଜ୍ (୨୦୦୪) ଫିଲ୍ମ ନିର୍ମାଣ କରିଥିଲେ। ହିନ୍ଦୁ ଦେବୀ ଦୁର୍ଗା, ଲକ୍ଷ୍ମୀ ଏବଂ ସରସ୍ବତୀଙ୍କ ନଗ୍ନ ଫଟୋ ତିଆରି କରି ଏମ.ଏଫ ହୁସେନ କଡ଼ା ସମାଲୋଚନାର ଶିକାର ହୋଇଥିଲେ। ଅଶ୍ଳୀଳ ଚିତ୍ର ଆଙ୍କିବା ବିରୋଧରେ ଦେଶର ବିଭିନ୍ନ ପ୍ରାନ୍ତରୁ ହୁସେନଙ୍କ ବିରୋଧରେ ଅନେକ ଅପରାଧିକ ମାମଲା ମଧ୍ୟ ରୁଜୁ ହୋଇଥିଲା। ସେ ୨୦୧୧ ଜୁନ୍ ୯ରେ ଲଣ୍ଡନରେ ମୃତ୍ୟୁବରଣ କରିଥିଲେ।