ଭୁବନେଶ୍ବର,୨୭ା୧୨(ବ୍ୟୁରୋ):ଓଡ଼ିଶାରେ ଦୀର୍ଘ ୨୩ ବର୍ଷ ହେଲା ନିରଙ୍କୁଶ ଶାସନ କରିଆସୁଥିବା ବିଜେଡିର ମନ୍ତ୍ରୀ, ବିଧାୟକ ଓ ନେତା ଆଇନ ତା’ବାଟରେ ଯିବ ବୋଲି କହୁଛନ୍ତି। ହେଲେ ସେମାନେ ନିଜେ ଅପରାଧରେ ସଂଶ୍ଳିଷ୍ଟ ହୋଇ ରାଜ୍ୟ ରାଜନୀତିକୁ ଅପରାଧୀକରଣ କରିବାରେ ପ୍ରୋତ୍ସାହିତ କରୁଛନ୍ତି। ଫଳରେ ଅରାଜକତା ସୃଷ୍ଟି ସହ ରାଜ୍ୟର ଆଇନଶୃଙ୍ଖଳା ଭଙ୍ଗ କରୁଥିବାରୁ ଭାଜପା ଏହାକୁ ଦୃଢ଼ ବିରୋଧ କରୁଛି। ଏହାକୁ ନେଇ ଏକ ସ୍ବତନ୍ତ୍ର ବିଧାନସଭା ଅଧିବେଶନ ଡାକି ଏ ବିଷୟରେ ଆଲୋଚନା କରାଯିବାର ନିହାତି ଆବଶ୍ୟକ ରହିଥିବା ଭାଜପା ବିଧାୟକ ସୋମବାର ରାଜ୍ୟପାଳଙ୍କୁ ସ୍ମାରକ ପତ୍ର ଦେଇଛନ୍ତି।
ରାଜ୍ୟପାଳଙ୍କୁ ସାକ୍ଷାତ କରି ଭାଜପା ବିଧାୟକମାନେ ଏ ପ୍ରସଙ୍ଗରେ ହସ୍ତକ୍ଷେପ କରିବାକୁ ଦାବି ଜଣାଇବା ସହ କହିଛନ୍ତି ଯେ, ଦୀର୍ଘ ୨୩ ବର୍ଷର ନିରଙ୍କୁଶ ଶାସନରେ ବିଜେଡି ମନ୍ତ୍ରୀ, ବିଧାୟକ ଓ ନେତାମାନେ ସିଧାସଳଖ ହତ୍ୟା, ଯୌନ କାର୍ଯ୍ୟରେ ଲିପ୍ତ। ଆପରାଧିକ ଚେହେରା ଖୋଲିଯିବା ଭୟରେ ଏବଂ ଦୋଷ ଦୁର୍ବଳତାକୁ ଲୁଚାଇବା ପାଇଁ ରାଜ୍ୟ ସରକାର ଜାଣିଶୁଣି ବିଧାନସଭାର ଗତ ଶୀତ ଅଧିବେଶନକୁ ପୂର୍ବରୁ ବନ୍ଦ କରିଦେଲେ ବୋଲି ବିରୋଧୀ ଦଳ ମୁଖ୍ୟ ସଚେତକ ମୋହନ ମାଝି କହିଛନ୍ତି। ଏନ୍ସିଆର୍ବି ରିପୋର୍ଟ ଅନୁଯାୟୀ ୨୦୨୧-୨୨ରେ ଓଡ଼ିଶା କ୍ରାଇମ ରେଟ୍ରେ ୩ୟ ସ୍ଥାନ ହାସଲ କରିଛି। ଅନ୍ୟପଟେ ଏହି ପ୍ରସଙ୍ଗରେ ଭାଜପା ରାଜ୍ୟବ୍ୟାପୀ ମଣ୍ଡଳ ସ୍ତରରେ ସତ୍ୟାଗ୍ରହ କରିଛି। ରାଜଧାନୀରେ ମଧ୍ୟ ଭାଜପା ପକ୍ଷରୁ ସତ୍ୟାଗ୍ରହ କରାଯାଇଛି।
ରାଜ୍ୟ ସଭାପତି ସମୀର ମହାନ୍ତି ରାଜଧାନୀରେ ହେଉଥିବା ସତ୍ୟାଗ୍ରହରେ ଯୋଗଦେଇ କହିଛନ୍ତି, ୨୫ ବର୍ଷ ପୂର୍ତ୍ତି କରିଥିବା ବିଜେଡି ଶାସନରେ ଓଡ଼ିଶାରେ ସୁଶାସନ ନୁହେଁ କୁଶାସନ ଚାଲିଛି।
