ନିରାକାରପୁର,୧୬।୫(ଡି.ଏନ୍.ଏ.): ରାଜ୍ୟରେ କରୋନା ସଂକ୍ରମଣ ଦ୍ରୁତ ଗତିରେ ବଢୁଥିବାରୁ ପ୍ରତିହତ କରିବା ପାଇଁ ସରକାର ଲକଡାଉନ ଓ ଶଟ୍ଡାଉନ ଘୋଷଣା କରିଛନ୍ତି। ଏଥିଯୋଗୁ ବିଭିନ୍ନ ଜାଗାରେ ନିରାଶ୍ରୟ, ଅସହାୟ, ଭିକ୍ଷୁକ, ମାନସିକ ବିକାରଗ୍ରସ୍ତମାନେ ନାନା ଅସୁବିଧାର ସମ୍ମୁଖୀନ ହେଉଛନ୍ତି। ଏପରିକି ଏମାନଙ୍କ ପାଇଁ ଗୋଟିଏ ଓଳି ଖାଇବା ଯୋଗାଡ଼ କରିବା ମଧ୍ୟ କଷ୍ଟକର ହୋଇପଡ଼ିଛି। ଏଭଳି ବିପତ୍ତି ସମୟରେ ଜଣେ ବ୍ୟକ୍ତି ଅସହାୟମାନଙ୍କୁ ଖାଦ୍ୟ, ଔଷଧ ଦେବା ସହ ସ୍ବାସ୍ଥ୍ୟ ସେବା ଓ ମେଡିକାଲ ପହଞ୍ଚାଇ ମାନବିକତାର ପରିଚୟ ଦେଇଛନ୍ତି। ସେ ହେଲେ ଖୋର୍ଦ୍ଧା ଜିଲା ଜଙ୍କିଆ ଥାନା ଅନ୍ତର୍ଗତ ନିଧିପୁର ଗ୍ରାମର ଜଳନ୍ଧର ପାଇକରାୟ। ସେ ପେସାରେ ଜଣେ କାର୍ ଡ୍ରାଇଭିଂ ଶିକ୍ଷକ ଥିବାବେଳେ ଅସହାୟ, ଦୁଃଖୀଙ୍କୁ ସେବା କରିବା ତାଙ୍କ ନିଶା ପାଲଟିଛି। ବାଟରେ ଘାଟରେ ଯେକେହି ବି ଅସହାୟ ଅବସ୍ଥାରେ ଥିବା ଦେଖିଲେ ଜଳନ୍ଧର ପାଖକୁ ଯାଇ ନିଜସ୍ବ ଚେଷ୍ଟାରେ ସହାୟତା କରୁଛନ୍ତି। ଜଳନ୍ଧରଙ୍କ ପରିବାର କହିଲେ ସ୍ତ୍ରୀ ସହ ଗୋଟିଏ ଝିଅ ଓ ପୁଅ। ଜଳନ୍ଧରଙ୍କ ଏହି ସେବା ମନୋବୃତ୍ତିକୁ ଦେଖି ପରିବାର ଲୋକେ ମଧ୍ୟ ସହଯୋଗ କରୁଛନ୍ତି। ସେ ପାରାଦୀପ ଅଞ୍ଚଳରେ ରହି କାର୍ ଡ୍ରାଇଭିଂ ଶିକ୍ଷାଦାନ କରୁଥିବାବେଳେ ଏବେ ଲକଡାଉନ ଯୋଗୁ ଘରକୁ ଚାଲିଆସିଛନ୍ତି। ଘରେ ରହିବା ସମୟରେ ଟିଭି, ଖବରକାଗଜରେ ଅସହାୟଙ୍କ ଅବସ୍ଥା ଦେଖି ସାହାଯ୍ୟ କରିବାକୁ ଚିନ୍ତା କରିଥିଲେ। ରବିବାର ନିରାକାରପୁର ବଜାର ଦେଇ ଯାଉଥିବା ବେଳେ ୨ଜଣ ମାନସିକ ବିକାର ଗ୍ରସ୍ତ ରୋଗୀଙ୍କୁ ଦେଖିଥିଲେ। ସେମାନଙ୍କ ଚୁଟି କାଟିବା ସହ ସଫା ସୁତରା କରି ଖାଇବାକୁ ଦେଇଥିଲେ। ଅସହାୟଙ୍କୁ ସେବା କରିବା ଦ୍ୱାରା ସେମାନେ ଆଗ ଅପେକ୍ଷା ୫୦ ଭାଗ ସୁସ୍ଥ ହେଇଯାଉଛନ୍ତି ବୋଲି ସେ ପ୍ରକାଶ କରିଛନ୍ତି। ଏପରିକି ସେ ଯୁବାବସ୍ଥାରୁ ଲୋକଙ୍କୁ ସେବା କରିବାର ଇଚ୍ଛା ରଖି କାର୍ଯ୍ୟ ସମୟ ମଧ୍ୟରେ ଓଡ଼ିଶାର ବିଭିନ୍ନ ଅଞ୍ଚଳ ଯାଇଥିବାବେଳେ ସେଠାରେ ଅସହାୟ ଓ ନିରାଶ୍ରୟମାନଙ୍କୁ ଖାଦ୍ୟ, ଔଷଧ ଯୋଗାଇ ଦେଇଛନ୍ତି। ମାନସିକ ବିକାରଗ୍ରସ୍ତଙ୍କ ନଖ, ଚୁଟି କାଟି ସଫା କରିବା ସହ ନୂଆ ଜାମା ଦେଇଥାନ୍ତି। ଇତି ମଧ୍ୟରେ ପ୍ରାୟ ହଜାରରୁ ଊର୍ଦ୍ଧ୍ୱ ଲୋକଙ୍କୁ ସେବା କରିଥିବାବେଳେ ସେବା, ସାହାଯ୍ୟ ଦ୍ୱାରା ଯେତିକି ଆନନ୍ଦ ମିଳେ, ତା’ଠାରୁ ଢେରଗୁଣ ଖୁସି ଲାଗେ। ମୋର ଏହି ସେବା ବଞ୍ଚତ୍ଥିବା ପର୍ଯ୍ୟନ୍ତ ଜାରି ରହିବ ବୋଲି ଜଳନ୍ଧର କହିଛନ୍ତି।