ନୂଆଦିଲ୍ଲୀ, ୭ା୭: ଡେଙ୍ଗୁ ରୋକିବ ମଶା। ମଶା ଯୋଗୁ ବ୍ୟାପୁଥିବା ଏହି ରୋଗକୁ ନିୟନ୍ତ୍ରଣ ପାଇଁ ଇଣ୍ଡିଆନ୍ କାଉନସିଲ ଅଫ୍ ମେଡିକାଲ ରିସର୍ଚ୍ଚ (ଆଇସିଏମ୍ଆର୍) ଏବଂ ଭେକ୍ଟର କଣ୍ଟ୍ରୋଲ ରିସର୍ଚ୍ଚ ସେଣ୍ଟର (ଭିସିଆର୍ସି) ପକ୍ଷରୁ ଏପରି ମଶା ବିକଶିତ କରାଯାଇଛି, ଯାହା ଡେଙ୍ଗୁ ଷ୍ଟ୍ରେନ୍କୁ ରୋକିପାରିବ। ଆଇସିଏମ୍ଆର୍-ଭିସିଆର୍ସି ପୁଡୁଚେରୀ ପକ୍ଷରୁ ବିକଶିତ ହୋଇଥିବା ଏହି ମଶାକୁ ବ୍ୟାକ୍ଟେରିଆ ବା ଜୀବାଣୁ ଦ୍ୱାରା ସଂକ୍ରମିତ କରାଯାଇଛି। ଏହି ମଶା ଡେଙ୍ଗୁ ସହ ଚିକୁନଗୁନିଆ ରୋକିବାରେ ମଧ୍ୟ ସହାୟକ ହେବ ବୋଲି ଏହି ସଂସ୍ଥାର ଗବେଷକ କହିଛନ୍ତି। ଡେଙ୍ଗୁ ଜ୍ୱରର ବାହକ ଏଡିସ୍ ମଶା ବା ଏଡିସ୍ ଏଜିପ୍ଟି ସହ ଡବ୍ଲ୍ୟୁ-ଏମ୍ଇଏଲ୍ ଏବଂ ଡବ୍ଲ୍ୟୁ-ଏଏଲ୍ବି ଓ୍ବଲବାଚିଆ ଷ୍ଟ୍ରେନ୍କୁ ସଂକ୍ରମିତ କରାଯାଇଛି। ଏ. ଏଜିପ୍ଟି (ପଡ୍) ଭୂତାଣୁଜନିତ ଡେଙ୍ଗୁ ସଂକ୍ରମଣ ରୋକିପାରିବ ବୋଲି କୁହାଯାଇଛି। ଭିସିଆର୍ସି ୪ ବର୍ଷ ଧରି ଓ୍ବଲବାଚିଆ ମଶା ଉପରେ ଗବେଷଣା କରିଆସୁଛନ୍ତି। ଆଇସିଏମ୍ଆର୍-ଭିସିଆର୍ସି ନିର୍ଦ୍ଦେଶକ ଡା. ଅଶ୍ୱିନୀ କୁମାରଙ୍କ କହିବା ଅନୁସାରେ, ଏହି ବ୍ୟାକ୍ଟେରିଆ ମଶା ପ୍ରାୟ ସମସ୍ତ କୋଷିକାରେ ପ୍ରବେଶ କରି ସେଠାରେ ବଂଶବିସ୍ତାର କରିପାରିବ। ଏହି ଜୀବାଣୁର ଉପସ୍ଥିତିରେ ଡେଙ୍ଗୁ ଭୂତାଣୁ ଅଧିକ ସଂକ୍ରାମକ ହେବାରେ ସକ୍ଷମ ହେବ ନାହିଁ।