ଲଣ୍ଡନ, ୧୮ା୭ (ଏପି)-ଇଂଲଣ୍ଡରେ ଆସନ୍ତା ସପ୍ତାହରେ କେତୋଟି ସ୍ପୋଟର୍ସ ଇଭେଣ୍ଟରେ ଅଳ୍ପ କେତେଜଣ ଦର୍ଶକଙ୍କୁ ପରୀକ୍ଷାମୂଳକ ଭାବେ ଅନୁମତି ମିଳିବ। କରୋନା ଭାଇରସ୍ ପାଇଁ ଏଥିରେ କେତେକ ପ୍ରତିଷେଧକ ମୂଳକ ବ୍ୟବସ୍ଥା ଗ୍ରହଣ କରାଯିବ। ସଫଳ ହେଲେ ଅକ୍ଟୋବରରେ ଷ୍ଟାଡିୟମକୁ ଅଧିକ ସଂଖ୍ୟାରେ ଦର୍ଶକଙ୍କୁ ଅନୁମତି ଦେବା ଲାଗି ଯୋଜନା ରହିଛି। ଜୁଲାଇ ୨୬-୨୭ରେ ଘରୋଇ କ୍ରିକେଟ ଆରମ୍ଭ ହେବାର କାର୍ଯ୍ୟକ୍ରମ ରହିଛି। ମାର୍ଚ୍ଚ ପରେ ଏହା ହେବ ପ୍ରଥମ କ୍ରୀଡ଼ା ଯେଉଁଥିରେ ଦର୍ଶକଙ୍କୁ ଅନୁମତି ମିଳିବ। ଜୁଲାଇ ୩୧ରୁ ଶେଫିଲ୍ଡରେ ବିଶ୍ୱ ସ୍ନୁକର ଚାମ୍ପିୟନଶିପ୍ ଅନୁଷ୍ଠିତ ହେବ। ଏଥିରେ କିଛି ଦର୍ଶକଙ୍କୁ ଅନୁମତି ମିଳିବ। ସରକାରଙ୍କ ଯୋଜନାର ଏକ ଅଂଶ ବିଶେଷ ସ୍ବରୂପ ଅଗଷ୍ଟ ୧ରେ ଗ୍ଲୋରିଅସ୍ ଗୁଡ୍ଉଡ୍ ହର୍ସ ରେସିଂ ଫେଷ୍ଟିଭାଲରେ ମଧ୍ୟ ଅଳ୍ପ ସଂଖ୍ୟକ ଦର୍ଶକଙ୍କୁ ଅନୁମତି ମିଳିବ। ବ୍ରିଟିଶ ପ୍ରଧାନମନ୍ତ୍ରୀ ବୋରିସ୍ ଜନସନ କହିଛନ୍ତି ଅକ୍ଟୋବରରେ ଷ୍ଟାଡିୟମକୁ ଦର୍ଶକ ଫେରାଇ ଆଣିବା ଲାଗି ଯୋଜନା ରହିଛି। ଷ୍ଟାଡିୟମରେ ଦର୍ଶକଙ୍କ ସଂଖ୍ୟା ସୀମିତ କରାଯିବ। ପ୍ରବେଶ ପାଇଁ ପୃଥକ୍ ପୃଥକ୍ ସମୟ ଧାର୍ଯ୍ୟ କରାଯିବ। ସାମାଜିକ ଦୂରତ୍ୱ ବଜାୟ ରଖାଯିବ। ଓ୍ବାନ ଓ୍ବେ ସିଷ୍ଟମ କାର୍ଯ୍ୟକାରୀ କରାଯିବ। କୋଭିଡ୍-୧୯ ନିୟମ ଉଲ୍ଲଂଘନ କଲେ ସମ୍ପୃକ୍ତ ଖେଳପ୍ରେମୀଙ୍କୁ ଷ୍ଟାଡିୟମରେ ଅନୁମତି ମିଳିବ ନାହିଁ।
