ବଅଁରପାଳ,୧୪ା୬(ଉପେନ୍ଦ୍ର ରାଉତ): ଅନୁଗୋଳସ୍ଥିତ ନାଲ୍କୋ ଏସ୍ଆଣ୍ଡପି କମ୍ପ୍ଲେକ୍ସରେ ପରବର୍ତ୍ତୀ କାର୍ଯ୍ୟ ନିର୍ବାହୀ ନିର୍ଦ୍ଦେଶକ (ଇଡି) କିଏ ହେବେ ସେ ନେଇ କଳ୍ପନା ଜଳ୍ପନା ବଢ଼ିବାରେ ଲାଗିଛି। ବର୍ତ୍ତମାନ ଇଡି ଥିବା ଭୀମସେନ ପ୍ରଧାନଙ୍କ କାର୍ଯ୍ୟକାଳ ଆସନ୍ତା ୩୦ ତାରିଖରେ ଶେଷ ହେଉଥିବାରୁ ନୂଆ ଇଡି ପଦବୀକୁ ନେଇ ଆଶାୟୀଙ୍କ ସଂଖ୍ୟା ବଢ଼ିବାରେ ଲାଗିଛି।
ପ୍ରକାଶ ଯେ, ଦାମନଯୋଡିର ଭୀମସେନ ପ୍ରଧାନଙ୍କୁ ନାଲ୍କୋ ଏସ୍ଆଣ୍ଡ୍ପିରେ ଇଡି ଭାବେ ୩ ମାସ ପାଇଁ ଅବସ୍ଥାପିତ କରାଯାଇଥିଲା। ଆସନ୍ତା ୩୦ ତାରିଖରେ ସେ ଅବସର ଗ୍ରହଣ କରିବେ। ତେଣୁ ଜଣେ ସ୍ଥାୟୀ ଇଡିଙ୍କୁ ନିଯୁକ୍ତି ଦେବାକୁ କର୍ମଚାରୀ ମହଲରେ ଦାବି ହେଉଥିବାରୁ ପରବର୍ତ୍ତୀ ଇଡିଙ୍କୁ ନେଇ ନାନା ଆଲୋଚନା ଆରମ୍ଭ ହୋଇଛି। ଏହି ପଦବୀ ହାତେଇବା ପାଇଁ ଅନୁଗୋଳସ୍ଥିତ ନାଲ୍କୋର ୨ ଜଣ ମହାପ୍ରବନ୍ଧକ ଓ ଦାମନଯୋଡି ଏବଂ କର୍ପୋରେଟର କେତେଜଣ ଉଚ୍ଚ ଅଧିକାରୀ ଆଶାୟୀ ରହିଥିବା ଚର୍ଚ୍ଚା ହେଉଛି। ଏପରି କି ଏହି ଆଶାୟୀମାନେ ନାଲ୍କୋ କର୍ପୋରେଟ୍ କାର୍ଯ୍ୟାଳୟରେ ଏବେଠାରୁ ଲବି ଆରମ୍ଭ କରିଦେଇଥିବା ସୂଚନା ମିଳିଛି। ସେହିପରି ନାଲ୍କୋ ଏଚ୍ଆର୍ଡି ଜିଜିଏମ୍ ମଣି ପ୍ରସାଦ ସାମଲ ଗତମାସରେ ଅବସର ଗ୍ରହଣ କରିଥିବାରୁ ତାଙ୍କ ସ୍ଥାନ ଖାଲି ପଡିଛି। ଫଳରେ ସିଏସ୍ଆର୍ କାର୍ଯ୍ୟର ଅଗ୍ରଗତି ହୋଇପାରୁନାହିଁ କି ପାରିପାର୍ଶ୍ୱିକ ଅଞ୍ଚଳର ବିକାଶ କାର୍ଯ୍ୟ ଆଗେଇ ପାରୁନାହିଁ। ପ୍ରଶାସନିକ ଅଧିକାରୀମାନଙ୍କ ସହ ଆଲୋଚନା ମଧ୍ୟ ହୋଇପାରୁ ନାହିଁ। ତେଣୁ ଉତ୍ତମ ଦକ୍ଷତା ଥିବା ଅଧିକାରୀଙ୍କୁ ନୂତନ ଇଡି ଓ ଜିଜିଏମ୍ ଭାବେ ନିଯୁକ୍ତି ଦିଆଯିବା ପାଇଁ କର୍ମଚାରୀ ମହଲରେ ଦାବି ହେଉଛି। ଏପରି କି ସ୍ମେଲଟର ଓ ସିପିପିରେ ବହୁ ସମସ୍ୟା ଥିବାରୁ ଟେକ୍ନିକାଲ ବିଷୟରେ ଜ୍ଞାନ ରଖିଥିବା ଉଚ୍ଚ ଅଧିକାରୀଙ୍କୁ ଇଡି ଭାବେ ଅବସ୍ଥାପିତ କରିବା ପାଇଁ ଶ୍ରମିକ ନେତାମାନଙ୍କ ପକ୍ଷରୁ ଦାବି ହେଉଛି।