ଛତ୍ରପୁର,୧୯ା୧୦(ସନ୍ତୋଷ ପାଢ଼ୀ)ଚାରି ହାତର ମାଟିଘର ଆଉ ସେଇ ଘରେ ଚାଲିଛି ସଂସାର। ଏହା କେବଳ ଗୋଟିଏ ପରିବାରର କଥା ନୁହେଁ, ଗ୍ରାମରେ ଏମିତି ୭ଟି ପରିବାର ୪ ହାତର ମାଟି ଘରେ ଜୀବନ ବିତାଉଛନ୍ତି । ପକ୍କାଘର ଖଣ୍ଡିଏ ସେମାନଙ୍କ ପାଇଁ ସ୍ବପ୍ନ ହୋଇଥିବା ବେଳେ ରୋଜଗାର ମଧ୍ୟ ନାହିଁ। ଆଖପାଖ ଅଞ୍ଚଳରୁ ଖଜୁରୀ ଗଛରୁ ଡାଳ କାଟି ଆଣି ଝାଡୁ ତିଆରି କରି ଜୀବନ ବିତାଉଛନ୍ତି । ଗଞ୍ଜାମ ଜିଲା ପୋଡାପଦର ଗ୍ରାମରେ ଏଭଳି ଦୃଶ୍ୟ ଦେଖିବାକୁ ମିଳୁଛି। ସ୍ବାଧୀନତାର ଦୀର୍ଘ ବର୍ଷ ପରେ ବି ୭ ପରିବାର ମୌଳିକ ସୁବିଧାରୁ ବଞ୍ଚିତ ଅଛନ୍ତି।
ଛତ୍ରପୁରଠାରୁ ମାତ୍ର ୩ କିଲୋମିଟର ଦୂରରେ ଅବସ୍ଥିତ ପୋଡାପଦର ଗ୍ରାମ।ପଞ୍ଚାୟତ କାର୍ଯ୍ୟାଳୟ ଠାରୁ ମାତ୍ର ୨୦୦ ମିଟର ଦୂରରେ ମୁଖ୍ୟରାସ୍ତା କଡରେ ୪୦ ବର୍ଷରୁ ଉଦ୍ଧର୍ବ ହେଲା ଏହି ୭ ଦଳିତ ପରିବାର ରହି ଆସୁଛନ୍ତି । ରୋଜଗାର କହିଲେ ଖଜୁରୀ ଗଛରୁ ଡାଳ କାଟି ଆଣି ସେଥିରୁ ଝାଡୁ ପ୍ରସ୍ତୁତ କରି ବଜାରରେ ବିକ୍ରି କରି ଦୁଇ ପଇସା ଆଣିଲେ ପରିବାର ଗୁଜୁରାଣ ମେଣ୍ଟାନ୍ତି l ସକାଳ ହେଲେ ଆଖପାଖ ଅଞ୍ଚଳରୁ ମହିଳା ଓ ପୁରୁଷ ଦୁହେଁ ମିଶି ଝାଡୁ ତିଆରି କରିବା ପାଇଁ ଖଜୁରୀ ଗଛରୁ ଡାଳ କାଟି ଆଣି ଖରାରେ ଶୁଖାନ୍ତି। ପତ୍ର ଶୁଖିଲା ପରେ ତାହାକୁ ଏକାଠି କରି ଝାଡୁ ପ୍ରସ୍ତୁତ କରନ୍ତି। ଝାଡୁ ପ୍ରସ୍ତୁତ ହେବାକୁ ୪ ଦିନ ଲାଗେ। ବର୍ଷା ଦିନେ ଶୁଖିବାକୁ ଅଧିକ ସମୟ ଲାଗିଥାଏ । ଝାଡୁ ପ୍ରସ୍ତୁତ ହେବା ପରେ ବଜାର କିମ୍ବା ଗ୍ରାମାଞ୍ଚଳରେ ବିକ୍ରି କରିବାକୁ ଯାଆନ୍ତି । ଯଦି ଝାଡୁ ବିକ୍ରି ହେଲା ତ ମାଟି ଘରେ ଚୁଲି ଜଳିବ। ନ ହେଲେ ମାଟି ଘରେ ସାରା ପରିବାର ଭୋକରେ ଶୁଅନ୍ତି। ସେପଟେ ସରପଞ୍ଚ କୁହନ୍ତି ଅନେକ ଥର ବ୍ଲକ ଓ ଜିଲ୍ଲା ପ୍ରଶାସନ ସହ ଆଲୋଚନା କରିଛି । ମାତ୍ର ୩ କିଲୋ ମିଟର ଦୂରରେ ଜିଲା ପ୍ରଶାସନ ଥାଇ ମଧ୍ୟ କୌଣସି ପଦକ୍ଷେପ ନେଉନାହାନ୍ତି।