ପୁରୀ ଅଫିସ,୨୫।୫: ଦିନକୁ ଦିନ ଆଧ୍ୟାତ୍ମିକ ସହର ପୁରୀ ଅଶାନ୍ତ ଏବଂ ଅସୁରକ୍ଷିତ ହୋଇପଡ଼ୁଛି। ପ୍ରାୟ ପ୍ରତିଦିନ ଦାଦାବଟି, ଲୁଟ, ବ୍ରାଉନସୁଗାର ଓ ଗଞ୍ଜେଇ କାରବାର ସମେତ ଅଧିକାଂଶ ସମୟରେ ଗୁଳିକାଣ୍ଡ ଘଟୁଛି। ଏଥିଯୋଗୁ ସହରବାସୀ ନିଜକୁ ଅସୁରକ୍ଷିତ ମଣୁଛନ୍ତି। ଗତ ମାର୍ଚ୍ଚ ୧୬ରେ ସୁଆର ମହାସୁଆର ନିଯୋଗ ସମ୍ପାଦକ ତଥା ଶ୍ରୀମନ୍ଦିର ସେବାୟତ କୃଷ୍ଣଚନ୍ଦ୍ର ପ୍ରତିହାରୀ (କାଳିଆ)ଙ୍କୁ ବାରବାଟୀ ଜାଗାଘର ନିକଟରେ ଗୁଳିକରି ହତ୍ୟା କରାଯାଇଥିଲା। ମଙ୍ଗଳବାର ରାତିରେ ଏମାର ମଠ ନିକଟରେ ଶ୍ରୀଲୋକନାଥ ମନ୍ଦିର ଜଣେ ସେବାୟତଙ୍କୁ ଗୁଳି କରି ହତ୍ୟା କରାଯାଇଛି। ସେହିପରି ବଳଗଣ୍ଡି ଛକସ୍ଥିତ ମାଉସୀ ମା’ ମନ୍ଦିର ନିକଟରେ ବାସେଳି ସାହି ଅଞ୍ଚଳର ସୂର୍ଯ୍ୟନାରାୟଣ ତ୍ରିପାଠୀଙ୍କୁ ଛୁରାମାଡ଼ ହୋଇଛି। ଗୋଟିଏ ଦିନରେ ଦୁଇଟି ଘଟଣା ପୁରୀର ଆଇନଶୃଙ୍ଖଳା ବିପର୍ଯ୍ୟସ୍ତକୁ ପଦାରେ ପକାଇଛି। ଆଗକୁ ରଥଯାତ୍ରା ଓ ସ୍ନାନଯାତ୍ରା ଆସୁଛି। ଏଭଳି ସ୍ଥଳେ ଅପରାଧ ଥମିବାର ନାଁ ନେଉନାହିଁ। କେତେକ ଘଟଣାରେ ପୋଲିସ ଅଭିଯୁକ୍ତଙ୍କୁ ଧରିବାରେ ସଫଳ ହେଉଥିଲେ ମଧ୍ୟ ଅପରାଧ ଉପରେ ରୋକ୍ ଲଗାଇପାରୁନାହିଁ। ପୁରୀ ଏବେ ଅପରାଧୀଙ୍କ ଚରାଭୂଇଁ ପାଲଟିଛି ଏବଂ ପୋଲିସକୁ ଅପରାଧୀମାନେ ଖୋଲା ଚ୍ୟାଲେଞ୍ଜ ଦେଉଛନ୍ତି ବୋଲି ଆଇନଜୀବୀ ଚିନ୍ମୟ ଦାଶ କହିଛନ୍ତି।
କଂଗ୍ରେସ ନେତା ଆଲୋକ କୁମାର ଦାଶ କହିଛନ୍ତି, ଶ୍ରୀମନ୍ଦିର ଚାରିପାଖରେ ମାଳମାଳ ପୋଲିସ। ତାହା ସତ୍ତ୍ବେ ଏମାର ମଠ ସମ୍ମୁଖରେ ହତ୍ୟା ଘଟଣା ପୁରୀ ସହରବାସୀଙ୍କ ମଧ୍ୟରେ ଭୟ ସଞ୍ଚାର କରୁଛି। ପୋଲିସ ନିଜ କାର୍ଯ୍ୟ ସମ୍ପାଦନରେ ବିଫଳ ହୋଇଛି, ସେଥିପାଇଁ ଅପରାଧୀ ହତ୍ୟା କରିବାକୁ ସାହସ କରୁଛନ୍ତି। ରଥଯାତ୍ରା ଆସୁଥିବାରୁ ଲୋକେ ପୁରୀ ପୋଲିସକୁ ଏକ ଦାୟିତ୍ୱସମ୍ପନ୍ନ ଭୂମିକାରେ ଦେଖିବାକୁ ଚାହୁଁଛନ୍ତି। ମାତ୍ର ବିଡମ୍ବନା ଯେ, ପୁରୀ ଦିନକୁ ଦିନ କ୍ରାଇମ ସିଟିରେ ପରିଣତ ହେଉଛି। ସେହିଭଳି ଭାଜପା ଯୁବମୋର୍ଚ୍ଚା ଜୟନ୍ତ କୁମାର ଦାଶ କହିଛନ୍ତି, ପୁରୀ ସହରରେ ଏଭଳି ଦିନ ନାହିଁ ଯେଉଁଦିନ ହତ୍ୟା କିମ୍ବା ମରଣାନ୍ତକ ଆକ୍ରମଣ ନ ହେଉଛି। ମାରଣାସ୍ତ୍ର ଓ ବନ୍ଧୁକ ପୁରୀ ସହରରେ ଏବେ ସ୍ବାଭାବିକ ହୋଇଗଲାଣି। ହତ୍ୟା ପଛର କାରଣ ଖୋଜି ପାଉ ପାଉ ଆଉ ଏକ ଅପରାଧ ଘଟୁଛି। ଆଇନଶୃଙ୍ଖଳା ବିପର୍ଯ୍ୟସ୍ତ ହୋଇପଡ଼ିଛି। ସ୍ଥାନୀୟ ବାସିନ୍ଦା ଅଭୟ ଅବିନାଶ ନାୟକ କହିଛନ୍ତି, ପୁରୀ ସହର ଅସୁରକ୍ଷିତ ହୋଇଗଲାଣି। ଏବେ ଘରୁ ବାହାରିବାକୁ ଡ଼ର ଲାଗୁଛି। ପୋଲିସ ପ୍ରଶାସନ ଚେଇଁ ଶୋଇଥିବା ପରି ମନେ ହେଉଛି।