ଚଣ୍ଡିଗଡ଼,୨୩।୩: ଯେଉଁଠାରେ ୱାର୍ନର ବିଫଳ ହେଲେ, ମିଚେଲ ମାର୍ଶ,ଋଷଭ ପନ୍ତଙ୍କ ବ୍ୟାଟ୍ ଚାଲିଲା ନାହିଁ , ସେଠାରେ ଜଣେ ୨୧ ବର୍ଷୀୟ ବ୍ୟାଟ୍ସମ୍ୟାନ ଝଡ଼ ଭଳି ବ୍ୟାଟିଂ କରି ଚର୍ଚ୍ଚାରେ ରହିଛନ୍ତି। ଏବେ ସମଗ୍ର ବିଶ୍ୱ ତାଙ୍କୁ ଅଭିବାଦନ ଜଣାଉଛି। ଆମେ ବାମହାତୀ ବ୍ୟାଟ୍ସମ୍ୟାନ ଅଭିଷେକ ପୋରେଲଙ୍କ ବିଷୟରେ କହୁଛୁ, ଯିଏ ଆଇପିଏଲ୍ ୨୦୨୪ରେ ପଞ୍ଜାବ କିଙ୍ଗ୍ସ ବୋଲରଙ୍କୁ ଘାଇଲା କରିଥିଲେ। ଅଭିଷେକ ୧୦ ବଲରେ ଅପରାଜିତ ୩୨ ରନ ସ୍କୋର କରିଥିଲେ। ତାଙ୍କର ଷ୍ଟ୍ରାଇକ ରେଟ୍ ୩୨୦ ଥିଲା। ସେ ୨ ଛକା ଓ ୪ ଚୌକା ମାରିଥିଲେ। ଯଦିଓ ପୋରେଲ ମାତ୍ର ୩୨ ରନ ସ୍କୋର କରିଥିଲେ, ହେଲେ ଏହି ରନ୍ ଦଳର ସ୍କୋର୍କୁ ୧୭୪ ରନ୍ରେ ପହଞ୍ଚାଇଥିଲା।
ପଞ୍ଜାବର ଘରୋଇ ମଇଦାନ ମୁଲାନପୁରରେ ଖେଳାଯାଇଥିବା ମ୍ୟାଚ୍ରେ ପଞ୍ଜାବର ବୋଲରମାନେ ଭଲ ବୋଲିଂ କରିଥିଲେ କରିଥିଲେ। ୧୮.୩ ଓଭର ପର୍ଯ୍ୟନ୍ତ ଦିଲ୍ଲୀ ଟିମ୍ ୮ ଉଇକେଟ ହରାଇ ମାତ୍ର ୧୪୭ କରିଥିଲା। ଏଭଳି ପରିସ୍ଥିତିରେ ଦିଲ୍ଲୀ ଅଭିଷେକଙ୍କୁ କ୍ରିଜକୁ ପଠାଇଥିଲା। ସେତେବେଳେ ସମସ୍ତେ ଆଶ୍ଚର୍ଯ୍ୟ ହୋଇଯାଇଥିଲେ। କାରଣ ଗତ ସିଜନରେ ଏହି ଖେଳାଳିଙ୍କୁ ସୁଯୋଗ ମିଳିଥିଲେ ହେଁ ସେ ଭଲ ପ୍ରଦର୍ଶନ କରିପାରି ନ ଥିଲେ। କିନ୍ତୁ ଏଥର ପୋରେଲ ନିଜକୁ ପ୍ରମାଣିତ କରିଥିଲେ। ପଞ୍ଜାବର ଇନିଂସର ୨୦ ଓଭରରେ ପୋରେଲ ଦିଲ୍ଲୀର ନିଷ୍ପତ୍ତିକୁ ଠିକ୍ ପ୍ରମାଣ କରିଥିଲେ।
ପନ୍ତ ଏବଂ ଓ୍ବାର୍ନରଙ୍କ ଉଇକେଟ ନେଇଥିବା ହର୍ଷଲ ପଟେଲ ଶେଷ ଓଭର ବୋଲିଂ କରିବାକୁ ଆସିଥିଲେ। ହେଲେ ୨୧ ବର୍ଷୀୟ ଅଭିଷେକ ହର୍ଷଲଙ୍କ ବଲ୍ରେ ଜବରଦସ୍ତ ବ୍ୟାଟିଂ କରିଥିଲେ। ପୋରେଲ ହର୍ଷଲଙ୍କ ପ୍ରଥମ ବଲରେ ଚୌକା, ଦ୍ୱିତୀୟ ବଲରେ ଛକା, ତୃତୀୟ ବଲରେ ଚୌକା, ଚତୁର୍ଥ ବଲରେ ଚୌକା ଏବଂ ପଞ୍ଚମ ବଲରେ ଛକା ମାରିଥିଲେ। ଅର୍ଥାତ ହର୍ଷଲଙ୍କ କ୍ରମାଗତ ପାଞ୍ଚଟି ବଲରେ ପୋରେଲଙ୍କ ବ୍ୟାଟରୁ ରନ୍ ଆସିଥିଲା। ସେ ଶେଷ ବଲରେ ମାତ୍ର ଗୋଟିଏ ରନ ସ୍କୋର କରିପାରିଥିଲେ। ତେବେ ଏହି ବ୍ୟାଟ୍ସମ୍ୟାନ ୨୦ତମ ଓଭରରେ ୬ ବଲରେ ୨୫ ରନ୍ ଯୋଡିବାରେ ସଫଳ ହୋଇଥିଲେ। ଏହି କାରଣରୁ ତାଙ୍କ ଦଳ ୧୭୪ ରନ୍ରେ ପହଞ୍ଚିଥିଲା।
କହିରଖୁଛୁ, ଦିଲ୍ଲୀ ପ୍ରଶିକ୍ଷକ ରିକି ପଣ୍ଟିଂ ଅଭିଷେକ ପୋରେଲଙ୍କୁ ବହୁତ ପସନ୍ଦ କରନ୍ତି। ସେ ଏହି ଖେଳାଳିଙ୍କୁ ବହୁତ ଦକ୍ଷ ବୋଲି ବିବେଚନା କରନ୍ତି । ସେଥିପାଇଁ ସେ ପୋରେଲଙ୍କୁ ଏକ ପ୍ରଭାବଶାଳୀ ଖେଳାଳି ଭାବରେ ବାଛିଥିଲେ। ପୋରେଲ ତାଙ୍କ ଇନିଂସ ପରେ କହିଥିଲେ ଯେ ସେ ବ୍ୟାଟିଂ କରିବାକୁ ଯାଉଛନ୍ତି ବୋଲି ତିନି ଓଭର ଆଗରୁ ଜାଣିବାକୁ ପାଇଥିଲେ। ପୋରେଲଙ୍କ ପାଇଁ ଭଲ କଥା ହେଲା ସେ ଦଳର ଏହି ବିଶ୍ୱାସକୁ ଠିକ୍ ସାବ୍ୟସ୍ତ କରିଥିଲେ।