କରାଚୀ,୧୮।୩: ଅଷ୍ଟ୍ରେଲିଆ ଓ ପାକିସ୍ତାନ ମଧ୍ୟରେ ଖେଳାଯାଇଥିବା ଦୁଇଟି ମ୍ୟାଚ୍ ଡ୍ର’ ଭାବେ ଶେଷ ହୋଇଛି। ଉଭୟ ମ୍ୟାଚ୍ରେ ବ୍ୟାଟରଙ୍କ ରାଜୁତି ଯୋଗୁ ରାଓ୍ବାଲପିଣ୍ଡି ଏବଂ କରାଚୀ ପିଚ୍କୁ ପ୍ରବଳ ସମାଲୋଚନାର ସମ୍ମୁଖୀନ ହେବାକୁ ପଡ଼ିଛି। ଗଦାଫି ଷ୍ଟାଡିୟମରେ ହେବାକୁ ଥିବା ସିରିଜ୍ର ନିର୍ଣ୍ଣାୟକ ତଥା ତୃତୀୟ ଟେଷ୍ଟ ଲାଗି ପିଚ୍ ପ୍ରସ୍ତୁତ କରିବା ପାଇଁ ପୂର୍ବତନ ଏକାଡେମି ମୁଖ୍ୟ ତଥା ଅଷ୍ଟ୍ରେଲିଆନ୍ କ୍ୟୁରେଟର ଟବି ଲୁମସ୍ଡେନଙ୍କୁ ଦାୟିତ୍ୱ ଦେଇଛି ପାକିସ୍ତାନ କ୍ରିକେଟ୍ ବୋର୍ଡ (ପିସିବି)। ଏଭଳି ପରିସ୍ଥିତିରେ ଭାରତରୁ କ୍ୟୁରେଟର ଡକାଇବାକୁ ପରାମର୍ଶ ଦେଇଛନ୍ତି ପୂର୍ବତନ ପାକିସ୍ତାନ ପେସର ଏବଂ କୋଚ୍ ଆକିବ ଜାଭେଦ।
“କାହିଁକି ଅନ୍ୟ କେଉଁଆଡ଼େ ଯିବା? ମୋ ମତରେ ମୁମ୍ବାଇ, ବାଙ୍ଗାଲୋର, ଚେନ୍ନାଇ ଭଳି ସ୍ଥାନରୁ କ୍ୟୁରେଟର ଆଣିବା ଉଚିତ। କାରଣ ସେମାନେ ଭାରତୀୟ ସ୍ପିନରଙ୍କୁ ସୁହାଇଲା ଭଳି ସ୍ପିନ ଟ୍ରାକ ପ୍ରସ୍ତୁତ କରନ୍ତି। କିନ୍ତୁ ଆମ ସ୍ପିନରଙ୍କ ପାଇଁ ପାକିସ୍ତାନ ଏପର୍ଯ୍ୟନ୍ତ ଟର୍ନିଂ ଟ୍ରାକ ପ୍ରସ୍ତୁତ କରି ନ ପାରିବା ଆଶ୍ଚର୍ଯ୍ୟର କଥା” ବୋଲି ଆକିବ ଏକ ୟୁଟ୍ୟୁବ ଚ୍ୟାନେଲରେ କହିଛନ୍ତି। ତାଙ୍କ ମତରେ ପାକିସ୍ତାନ କେବଳ ଟର୍ନିଂ ଟ୍ରାକରେ ହିଁ ଅଷ୍ଟ୍ରେଲିଆକୁ ହରାଇପାରିବ।
ଦୁଇଟି ଟେଷ୍ଟରେ ଦୁଇ ଦଳର ୮ ଜଣ ବ୍ୟାଟର ଶତକ ହାସଲ କରିଛନ୍ତି। ଏମାନଙ୍କ ମଧ୍ୟରେ ୬ ପାକିସ୍ତାନୀ ବ୍ୟାଟର ଅଛନ୍ତି। ଉଭୟ ମ୍ୟାଚ୍ରେ ୨୩୦୦ ରନ୍ ହୋଇଥିବା ବେଳେ ରାଓ୍ବାଲପିଣ୍ଡିରେ ୧୪ ଏବଂ କରାଚୀରେ ୨୮ ଉଇକେଟ ପଡ଼ିଥିଲା। ଏଥିଯୋଗୁ ପିସିବି ବିଦେଶୀ କ୍ୟୁରେଟରଙ୍କୁ ନିଯୁକ୍ତ କରିଛି। ଲୁମସଡେନ ମେଲବୋର୍ନ ଗ୍ରାଉଣ୍ଡର ମୁଖ୍ୟ କ୍ୟୁରେଟର ଅଛନ୍ତି। ବର୍ତ୍ତମାନ ସେ ଲାହୋରରେ ପିଚ୍ ପ୍ରସ୍ତୁତକୁ ତଦାରଖ କରୁଛନ୍ତି।
