ଭୁବନେଶ୍ୱର, ୨୪।୮(କ୍ରୀଡ଼ା ପ୍ରତିନିଧି): ନୂଆଦିଲ୍ଲୀଠାରେ ଚାଲିଥିବା ୧୬ ବର୍ଷରୁ କମ୍ ଖେଲୋ ଇଣ୍ଡିଆ ମହିଳା ହକି ଲିଗ୍ (ଫେଜ୍-୧)ରେ ମଙ୍ଗଳବାର ଓଡ଼ିଶାର ଦୁଇ ଦଳ ସ୍ପୋଟର୍ସ ହଷ୍ଟେଲ ଓ ନାଭାଲ ଟାଟା ହକି ହାଇ ପରଫର୍ମାନ୍ସ ସେଣ୍ଟର (ଓଡ଼ିଶା ଏଚ୍ପିସି) ବିଜୟ ହାସଲ କରିଛନ୍ତି। ସ୍ପୋଟର୍ସ ହଷ୍ଟେଲ ୯-୧ ଗୋଲରେ ଭାଇ ବେହଲୋ ହକି ଏକାଡେମୀ ଭଗତାକୁ ହରାଇଥିବାବେଳେ ଓଡ଼ିଶା ଏଚ୍ପିସି ୧୨-୦ରେ ଦିଲ୍ଲୀକୁ ପରାସ୍ତ କରିଛି। ସ୍ପୋଟର୍ସ ହଷ୍ଟେଲ ପକ୍ଷରୁ ମୋନିକା ତିର୍କୀ ୨୪, ୪୭, ୫୫ ଓ ୬୦ତମ ମିନିଟରେ ଏକାକୀ ୪ଟି ଏବଂ ଅର୍ଚ୍ଚନା ଖାଲ୍କୋ ୯, ୩୧ ଓ ୫୮ତମ ମିନିଟରେ ୩ଟି ଗୋଲ ଦେଇ ହ୍ୟାଟ୍ରିକ ଅର୍ଜନ କରିଥିଲେ। ସସ୍ମିତା ଡୁଙ୍ଗଡୁଙ୍ଗ ୬ଷ୍ଠ ଓ ପ୍ରେମଶୀଳା ବାଗେ ୫୨ତମ ମିନିଟରେ ଅନ୍ୟ ୨ଟି ଗୋଲ ସ୍କୋର କରିଥିଲେ। ସେହିପରି ଓଡ଼ିଶା ଏଚ୍ପିସି ପକ୍ଷରୁ ନିର୍ମଳା ସେନବାର ୧୮ ଓ ୪୮, ଡୋଲି ଭୋଇ ୧୯ ଓ ୪୫, ନିହାରୀକା ଟପ୍ପୋ ୨୪ ଓ ୪୨ ଏବଂ ଅନୁସ୍କା ଭାଓ୍ବରେ ୩୩ ଓ ୫୧ତମ ମିନିଟରେ ୨ଟି ଲେଖାଏ ଗୋଲ ଦେଇଥିଲେ। ଖୁସ୍ବୁ କୁକୁର୍ ୧ମ, ଅଧିନାୟିକା ଅହଲ୍ୟା ଲାକ୍ରା ୭ମ, ପ୍ରଜ୍ଞା ପଟେଲ ୨୭ ଓ ହରପ୍ରୀତ କୌର ୫୬ତମ ମିନିଟରେ ଅନ୍ୟ ୪ଟି ଗୋଲ ସ୍କୋର କରିଥିଲେ। ଅନ୍ୟ ମ୍ୟାଚଗୁଡ଼ିକ ମଧ୍ୟରେ ସ୍ପୋଟର୍ସ ଅଥରିଟି ଅଫ୍ ଇଣ୍ଡିଆ ‘ଏ’ ୧୭-୦ରେ ସ୍ମାର୍ଟ ହକି ଏକାଡେମୀ ରାୟପୁର, ଘୁମାନହୀରା ରାଇଜର୍ସ ଏକାଡେମୀ ୨୭-୦ରେ ମୁମ୍ବାଇ ସ୍କୁଲ ସ୍ପୋଟର୍ସ ଆସୋସିଏଶନ, ପ୍ରୀତମ ସିଓ୍ବାଚ ହକି ଏକାଡେମୀ ସୋନେପତ ୨୧-୦ରେ ସିଟିଜେନ ହକି ଏକାଦଶ, ମଧ୍ୟ ପ୍ରଦେଶ ହକି ଏକାଡେମୀ ୨-୦ରେ ସ୍ପୋଟର୍ସ ଅଥରିଟି ଅଫ୍ ଇଣ୍ଡିଆ ‘ବି’, ସ୍ପୋଟର୍ସ ଅଥରିଟି ଅଫ୍ ଗୁଜରାଟ ଏକାଡେମୀ ୭-୦ରେ ଅନନ୍ତପୁର ହକି ଏକାଡେମୀ ଏବଂ ହର୍ ହକି ଏକାଡେମୀ ୭-୦ରେ ସାଲ୍ୟୁଟ ହକି ଏକାଡେମୀକୁ ପରାସ୍ତ କରିଛି।
