ଭୁବନେଶ୍ୱର,୨୫।୫(ବ୍ୟୁରୋ): ମାଡ଼ି ଆସୁଛି ବାତ୍ୟା ‘ୟାସ୍’। ଏହାର ବିଶେଷ ପ୍ରଭାବ ଭଦ୍ରକ ଓ ବାଲେଶ୍ୱର ଜିଲାରେ ପଡ଼ିବ। ବାତ୍ୟା ସମୟରେ ସର୍ବାଧିକ ୧୮୫ କିମି ପବନ ବହିବାର ସମ୍ଭାବନା ରହିଛି। ଏହି ସମୟରେ ସେଲ୍ଫି ନେବାକୁ ବାହାରକୁ ଯାଆନ୍ତୁ ନାହିଁ ବୋଲି ଯୁବବର୍ଗଙ୍କୁ ଏସ୍ଆର୍ସି ପ୍ରଦୀପ ଜେନା ନିବେଦନ କରିଛନ୍ତି। ବାତ୍ୟା ପବନ ବେଳେ ସାମାନ୍ୟ ଖୁସି ପାଇଁ ନିଜ ଜୀବନକୁ ବିପଦରେ ପକାନ୍ତୁ ନାହିଁ ବୋଲି ସେ କହିଛନ୍ତି। ଏଥିସହ ମା’ ଓ ମାଉସୀମାନେ ପବନ ବେଳେ ଆମ୍ବ, ପଣସ, ନଡ଼ିଆ ଆଦି ଗୋଟାଇବା ଲାଗି ଏସ୍ଆର୍ସି ବାରଣ କରିବା ସହ ସେଗୁଡ଼ିକ ଅପେକ୍ଷା ଜୀବନ ମୂଲ୍ୟବାନ, ଲୋଭ ସମ୍ବରଣ କରନ୍ତୁ ବୋଲି ସେ ମଧ୍ୟ କହିଛନ୍ତି।
ପ୍ରକାଶ ଯେ, ସମ୍ଭାବ୍ୟ ବାତ୍ୟାର ଉଦ୍ଧାର କାର୍ଯ୍ୟରେ ୪ହଜାର କର୍ମଚାରୀ ନିୟୋଜିତ ହୋଇଛନ୍ତି। ହେଲେ କରୋନା ଭୟ ଯୋଗୁ କିଛି ସ୍ଥାନରେ ଉଦ୍ଧାର କାର୍ଯ୍ୟ ସାମାନ୍ୟ ବିଳମ୍ବ ହେଉଛନ୍ତି। ଲୋକମାନେ ସ୍ଥାନାନ୍ତର ପାଇଁ ଅରାଜି ହେଉଥିବା ଲକ୍ଷ୍ୟ କରାଯାଉଛି। ତେବେ ସେମାନଙ୍କୁ ବୁଝାଇ ପ୍ରଶାସନ ସୁରକ୍ଷିତ ସ୍ଥାନକୁ ନେଉଥିବା ନଜର ଆସିଛି। ଏହାଛଡ଼ା ଆସନ୍ନ ପ୍ରସବା ଏବଂ ଦିବ୍ୟାଙ୍ଗମାନଙ୍କ ପ୍ରତି ବିଶେଷ ଯତ୍ନ ନିଆଯାଇଛି।