ନୂଆଦିଲ୍ଲୀ,୧।୩: ଭାରତୀୟ କ୍ରିକେଟର ପୂର୍ବତନ ଖେଳାଳୀ ଏସ୍.ଶ୍ରୀସାନ୍ତ ନିକଟରେ କ୍ରିକେଟ ମଇଦାନକୁ ଓହ୍ଲାଇଛନ୍ତି। ରଣଜୀ ଟ୍ରଫିରେ ଖେଳିଥିବା ଶ୍ରୀସାନ୍ତଙ୍କ ପାଇଁ ଏହି ପ୍ରତ୍ୟାବର୍ତ୍ତନ ଭଲ ବୋଲି ପ୍ରମାଣିତ ହୋଇନାହିଁ। କାରଣ ନିକଟରେ ଶ୍ରୀସାନ୍ତ ଅଭ୍ୟାସ କରୁଥିବା ସମୟରେ ଗୁରୁତର ଆହତ ହୋଇଥିଲେ। ତାଙ୍କୁ ଗଭୀର ଆଘାତ ଲାଗିବାରୁ ହସ୍ପିଟାଲରେ ଭର୍ତ୍ତି କରାଯାଇଛି। ଏବେ ହସ୍ପିଟାଲରୁ ତାଙ୍କର ଏକ ଫଟୋ ସାମ୍ନାକୁ ଆସିଛି। ଶ୍ରୀସାନ୍ତଙ୍କ ବନ୍ଧୁ ନିଜ ଇନଷ୍ଟାଗ୍ରାମରେ ଏହି ଫଟୋ ଶେୟାର କରିଛନ୍ତି। ଯେଉଁଥିରେ ସେ ହସ୍ପିଟାଲର ଶର୍ଯ୍ୟାରେ ଶୋଇଥିବାର ଦେଖିବାକୁ ମିଳିଛି। ଶ୍ରୀସାନ୍ତଙ୍କ ବନ୍ଧୁ ଏହି ଫଟୋ ଶେୟାର କରିବା ସହ ତାଙ୍କର ଆଶୁଆରୋଗ୍ୟ କାମନା କରିଛନ୍ତି। ଅନ୍ୟପଟେ ଶ୍ରୀସାନ୍ତ ମଧ୍ୟ ଏହି ଫଟୋକୁ ନିଜ ଟୁଇଟର ଆକାଉଣ୍ଟରେ ଶେୟାର କରିଛନ୍ତି। ସୂଚନାଯୋଗ୍ୟ, ନିକଟରେ ଶ୍ରୀସାନ୍ତ ଅଭ୍ୟାସ ସମୟରେ ଗୁରୁତର ଆହତ ହୋଇ ଚାଲିପାରୁ ନାହାନ୍ତି ବୋଲି ନିଜ ଇନ୍ଷ୍ଟାଗ୍ରାମରେ ସୂଚନା ଦେଇଥିଲେ। ଯାହାପରେ କେରଳରେ ଆୟୋଜିତ ରଣଜୀ ମ୍ୟାଚରୁ ସେ ବାଦ୍ ପଡ଼ିଥିଲେ।