କୋଚି : ଭାରତର ପୂର୍ବତନ ପେସ୍ ବୋଲର ଏସ୍. ଶ୍ରୀସନ୍ଥ୍ ପ୍ରତିଯୋଗିତାମୂଳକ କ୍ରିକେଟକୁ ଫେରିବେ। କେରଳ କ୍ରିକେଟ ଆସୋସିଏଶନ (କେସିଏ) ଦ୍ୱାରା ଆୟୋଜିତ ସ୍ଥାନୀୟ ଏକ ଟୁର୍ନାମେଣ୍ଟରେ ସେ ଖେଳିବେ। ଆଇପିଏଲ୍ ସ୍ପଟ ଫିକ୍ସିଂ ମାମଲାରେ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ଦ୍ୱାରା ୭ବର୍ଷ ବାସନ୍ଦ ପରେ ପ୍ରଥମଥର ସେ ଏକ ପ୍ରତିଯୋଗିତାରେ ଭାଗ ନେବାକୁ ଯାଉଛନ୍ତି। ଶ୍ରୀସନ୍ଥଙ୍କ ବାସନ୍ଦ ଦଣ୍ଡ ସେପ୍ଟେମ୍ବରରେ ଶେଷ ହୋଇଛି। ଆଲାପୁଝାରେ ହେବାକୁଥିବା ଏକ ଟି୨୦ ଇଭେଣ୍ଟର ଖେଳାଳି ତାଲିକାରେ ତାଙ୍କ ନାମ ରହିଛି। କେସିଏ ଟାଇଗର୍ସ ଟିମ୍ ଦଳରୁ ସେ ଖେଳିବେ। କେରଳ ଅଧିନାୟକ ସଚିନ ବେବି ଏହି ଦଳର ଅଧିନାୟକ ଅଛନ୍ତି। କେରଳ କ୍ରିକେଟ ଆସୋସିଏଶନର କହିବା ଅନୁସାରେ ଉଦ୍ଘାଟନୀ କେସିଏ ପ୍ରେସିଡେଣ୍ଟ୍ସ କପ୍ ଟି୨୦ ଟୁର୍ନାମେଣ୍ଟରେ ୬ଟି ଦଳ ଭାଗ ନେବେ। ଏହି ଦଳଗୁଡ଼ିକ ହେଲା କେସିଏ ରୟାଲ୍ସ, କେସିଏ ଟାଇଗର୍ସ, କେସିଏ ଟସ୍କର୍ସ, କେସିଏ ଇଗଲ୍ସ, କେସିଏ ପାନ୍ଥର୍ସ ଏବଂ କେସିଏ ଲାୟନ୍ସ। ଉଦ୍ଘାଟନୀ କେସିଏ ପ୍ରେସିଡେଣ୍ଟ୍ସ କପ୍ ଟି୨୦ ଟୁର୍ନାମେଣ୍ଟ ପାଇଁ ଗଠିତ ଏକ କମିଟି ଖେଳାଳି ମନୋନୟନ କରିଛି। ଶ୍ରୀସନ୍ଥ୍ ଓ ବେବିଙ୍କ ବ୍ୟତୀତ ବସିଲ ଥାମ୍ପି, ରୋହନ ପ୍ରେମ୍, ଏସ୍. ମିଧୁନ, କେ.ଏମ୍ ଅସିଫ୍ ଏବଂ ରାଜ୍ୟର ଅନ୍ୟ ସିନିୟର ଖେଳାଳିମାନେ ଅଂଶଗ୍ରହଣ କରୁଛନ୍ତି। ଉଭୟ ଯୁବ ଓ ଅଭିଜ୍ଞ ଖେଳାଳିଙ୍କୁ ନେଇ ଦଳଗୁଡ଼ିକ ଗଠନ କରାଯାଇଥିବା କେସିଏ କହିଛି।
