ମୁମ୍ବାଇ,୧।୩ : ଆଗାମୀ ଆଇପିଏଲ ଲାଗି ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ଚୂଡ଼ାନ୍ତ କରିଥିବା ୬ଟି ଭେନ୍ୟୁ ଉପରେ ଆପତ୍ତି ଉଠାଇଛନ୍ତି ରାଜସ୍ଥାନ ରୟାଲ୍ସ, ପଞ୍ଜାବ କିଙ୍ଗ୍ସ ଓ ସନରାଇଜର୍ସ ହାଇଦ୍ରାବାଦ। ଆପତ୍ତି ଉଠାଇଥିବା ଫ୍ରାଞ୍ଚାଇଜର ହୋମ ଗ୍ରାଉଣ୍ଡକୁ ବିସିସିଆଇ ପକ୍ଷରୁ ଚୂଡ଼ାନ୍ତ କରାଯାଇଥିବା ଭେନ୍ୟୁ ତାଲିକାରେ ସ୍ଥାନ ଦିଆଯାଇନାହିଁ।
ଉଲ୍ଲେଖଥାଉ କି, ବିସିସିଆଇ ଚେନ୍ନାଇ, ମୁମ୍ବାଇ, ବାଙ୍ଗାଲୋର, କୋଲକାତା, ଦିଲ୍ଲୀ ଓ ଅହମ୍ମଦାବାଦ୍ ଗ୍ରାଉଣ୍ଡରେ ପୂରା ଆଇପିଏଲ ଆୟୋଜନ କରିବାକୁ ଯୋଜନା କରୁଛି।
”ଆମେ ୩ ଫ୍ରାଞ୍ଚାଇଜ ମୁଖ୍ୟତଃ ପ୍ରଭାବିତ ହେବୁ। ଦଳ ଭଲ ପ୍ରଦର୍ଶନ କରିବା ଅଲଗା କଥା। କିନ୍ତୁ ଯେଉଁ ଦଳମାନେ ଘରେ ୫ରୁ ୬ ଜିତନ୍ତି ଓ ବାହାର ଭେନ୍ୟୁରେ ଅଳ୍ପ ମ୍ୟାଚ୍ ଜିତି ପ୍ଲେ-ଅଫ୍ସରେ ପ୍ରବେଶ କରୁଛନ୍ତି। ସେହି ୫ ଦଳ (ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର, ଚେନ୍ନାଇ ସୁପର କିଙ୍ଗ୍ସ, କୋଲକାତା ନାଇଟ୍ ରାଇଡର୍ସ, ଦିଲ୍ଲୀ କ୍ୟାପିଟାଲ୍ସ ଓ ମୁମ୍ବାଇ ଇଣ୍ଡିଆନ୍ସ) ଘରୋଇ ଭେନ୍ୟୁର ଫାଇଦା ଉଠାଇବେ। ଆମକୁ ସମସ୍ତ ମ୍ୟାଚ୍ ବାହାରେ ଖେଳିବାକୁ ପଡ଼ିବ ବୋଲି ଜଣେ ଫ୍ରାଞ୍ଚାଇଜ ଅଫିସିଆଲ କହିଛନ୍ତି। ତେବେ ୩ ଫ୍ରାଞ୍ଚାଇଜ ବିସିସିଆଇ ସିଇଓ ହେମାଙ୍ଗ ଆମିନଙ୍କ ନିକଟରେ ଆପତ୍ତି ଉଠାଇଛନ୍ତି। ମିଳିତ ଭାବେ ଲିଖିତ ଅଭିଯୋଗ ମଧ୍ୟ କରିଥିବା ସୂଚନା ମିଳିଛି।
