କଲମ୍ବୋ,୪।୪: ଶ୍ରୀଲଙ୍କାରେ ଆର୍ଥିକ ସଙ୍କଟ ଉତ୍କଟ ହୋଇଥିବାବେଳେ ସରକାର ବିରୋଧୀ ଆନ୍ଦୋଳନ ଏଡ଼ାଇବା ପାଇଁ ସେଠାରେ ୩୬ ଘଣ୍ଟିଆ କର୍ଫ୍ୟୁ ଜାରି କରାଯାଇଥିଲା। ରବିବାର ବିଭିନ୍ନ ସ୍ଥାନରେ କର୍ଫ୍ୟୁ ଉଲ୍ଲଂଘନ କରି ଆନ୍ଦୋଳନରେ ସାମିଲ ହେବାକୁ ଉଦ୍ୟମ କରିଥିବା ୬୬୪ ଜଣଙ୍କୁ ଗିରଫ କରାଯାଇଛି। ସାଜିଥ ପ୍ରେମଦାସାଙ୍କ ନେତୃତ୍ୱରେ ବିରୋଧୀ ଏମ୍ପିମାନେ କର୍ଫ୍ୟୁ ଉଲ୍ଲଂଘନ କରି କଲମ୍ବୋର ଇଣ୍ଡିପେଣ୍ଡେନ୍ସ ସ୍କୋୟାର ଅଭିମୁଖେ ଏକ ଶୋଭାଯାତ୍ରାରେ ଯାଇଥିଲେ। ସରକାର ଜନସୁରକ୍ଷା ଅଧ୍ୟାଦେଶ ବଳରେ ଜନସାଧାରଣଙ୍କ ପ୍ରତିବାଦ ଅଧିକାରକୁ ଛଡ଼ାଇ ନେଇଛନ୍ତି। ଆମେ ଏହାର ପ୍ରତିବାଦ କରୁଛୁ ବୋଲି ପ୍ରେମଦାସା କହିଛନ୍ତି। ଦେଶର ଆର୍ଥିକ ସଙ୍କଟ ଏବଂ ଅତ୍ୟାବଶ୍ୟକ ସାମଗ୍ରୀ ଅଭାବ ଯୋଗୁ ଲୋକେ ସମ୍ମୁଖୀନ ହେଉଥିତ୍ବା ଦୁର୍ଦ୍ଦଶା ପ୍ରତିବାଦରେ ସୋସିଆଲ ମିଡିଆ କର୍ମୀଙ୍କ ପକ୍ଷରୁ ବିକ୍ଷୋଭ ପ୍ରଦର୍ଶନ କରାଯାଇଥିଲା।
ସେହିପରି କାଣ୍ଡିରେ ଶତାଧିକ ଛାତ୍ର କର୍ଫ୍ୟୁକୁ ଅବମାନନା କରି ଆର୍ଥିକ ସଙ୍କଟ ପ୍ରତିବାଦରେ ପେରାଡେନିୟା ବାହାରେ ବିକ୍ଷୋଭ ପ୍ରଦର୍ଶନ କରିଥିଲେ। ସେମାନଙ୍କୁ ଘଉଡ଼ାଇବା ପାଇଁ ପୋଲିସ ଲୁହବୁହା ଗ୍ୟାସ୍ ପ୍ରୟୋଗ କରିବା ସହ ପାଣିମାଡ଼ କରିଥିଲା। ଦେଶର ଆର୍ଥିକ ସ୍ଥିତି ପାଇଁ ରାଷ୍ଟ୍ରପତି ଗୋଟାବାୟା ରାଜପାକ୍ସେଙ୍କୁ ଦାୟୀ କରି ତାଙ୍କ ବିରୋଧରେ ଫେସ୍ବୁକ୍, ଟୁଇଟର୍, ଇନ୍ଷ୍ଟାଗ୍ରାମ ଆଦି ସୋସିଆଲ ମିଡିଆରେ ପ୍ରତିବାଦ କରାଯାଉଥିବାରୁ ସରକାର ଶନିବାର ସେଗୁଡ଼ିକ ଉପରେ ନିଷେଧାଦେଶ ଜାରି କରିଥିଲେ। ୧୫ ଘଣ୍ଟା ପରେ ରବିବାର ଏହି କଟକଣାକୁ ହଟାଇ ଦିଆଯାଇଛି ଓ ସୋସିଆଲ ମିଡିଆ ପୁନଃ କାର୍ଯ୍ୟକ୍ଷମ ହୋଇଛି। ରାଜଧାନୀ କଲମ୍ବୋରେ ସରକାର ବିରୋଧୀ ସମାବେଶକୁ ରୋକିବା ଲାଗି ଏଭଳି କଟକଣା ଲାଗୁ ହୋଇଥିବା ସ୍ଥାନୀୟ ଗଣମାଧ୍ୟମରେ ପ୍ରକାଶ ପାଇଛି।