କଲମ୍ବୋ, ୬।୮ : ଦୁଇ ସରକାରଙ୍କ ମଧ୍ୟରେ ପରାମର୍ଶ ନହେବା ପର୍ଯ୍ୟନ୍ତ ଶ୍ରୀଲଙ୍କା ସରକାର ଚାଇନାର ସ୍ପେସ-ସାଟେଲାଇଟ ଟ୍ରାକର ଜାହାଜ ୟୁଆନ ୱାଙ୍ଗ ୫ର ହମ୍ବନଟୋଟା ବନ୍ଦରରେ ଅଟକ ରଖିବାକୁ କହିଛନ୍ତି। ଚାଇନାର ଗୁପ୍ତଚର ଜାହାଜ ଅଗଷ୍ଟ ୧୧ ରେ ଶ୍ରୀଲଙ୍କାର ହମ୍ବନଟୋଟା ବନ୍ଦରରେ ଇନ୍ଧନ ଭର୍ତ୍ତି କରିବା ପରେ ଅଗଷ୍ଟ ୧୭ରେ ସେଠାରୁ ଛାଡିବାର କାର୍ଯ୍ୟକ୍ରମ ଥିଲା।
ଗୁପ୍ତଚର ଜାହାଜ ୟୁଆନ ୱାଙ୍ଗ-୫କୁ ୨୦୦୭ରେ ନିର୍ମିତ କରାଯାଇଥିଲା। ଏହାର କ୍ଷମତା ୧୧,୦୦୦ ଟନ। ଏହି ସର୍ଭେ ଜାହାଜ ୧୩ ଜୁଲାଇରେ ଚାଇନାର ଜିଆଙ୍ଗିନ ବନ୍ଦରରୁ ଯାତ୍ରା ଆରମ୍ଭ କରିଥିଲା। ଏବେ ଏହା ତାଇୱାନ ନିକଟରେ ପହଞ୍ଚିଛି। ମେରାଇନ ଟ୍ରାଫିକ ୱେବସାଇଟ ଅନୁଯାୟୀ ଏହି ଜାହାଜଟି ଦକ୍ଷିଣ ଜାପାନ ଏବଂ ତାଇୱାନର ଉତ୍ତର-ପୂର୍ବ ମଧ୍ୟରେ ପୂର୍ବ ଚାଇନା ସାଗରରେ ଅଛି। ନିକଟରେ ଶ୍ରୀଲଙ୍କାର ହମ୍ବନଟୋଟା ବନ୍ଦରରେ ଏକ ବିଶାଳ ଚାଇନା ଜାହାଜର ଆଗମନ ସମ୍ପର୍କରେ ସୂଚନା ଉପରେ ଭାରତ ନିଜର ଆପତ୍ତି ଜଣାଇଥିଲା। ଭାରତର ବହିର୍ବ୍ୟାପାର ମନ୍ତ୍ରଣାଳୟ ସ୍ପଷ୍ଟ ଭାବରେ କହିଥିଲା ଯେ ଏହାର ସୁରକ୍ଷା ତଥା ଅର୍ଥନୈତିକ ସ୍ବାର୍ଥ ଉପରେ ପ୍ରଭାବ ପକାଉଥିବା କୌଣସି ଗତିବିଧି ଉପରେ ଏହା ତୀକ୍ଷ୍ଣ ନଜର ରଖିଛି। ଏହା ପରେ ଅର୍ଥନୈତିକ ସଙ୍କଟ ଦେଇ ଗତି କରୁଥିବା ଶ୍ରୀଲଙ୍କା ନିଜ ଦେଶର ଆର୍ଥିକ ସ୍ଥିତିକୁ ନେଇ ଚିନ୍ତା କରିବା ଆରମ୍ଭ କରିଥିଲା। ଶ୍ରୀଲଙ୍କା ଏହା ମଧ୍ୟ ଜାଣେ ଯେ ସଙ୍କଟ ସମୟରେ ଭାରତ ଏହାକୁ ସମର୍ଥନ କରିଥିଲା।
ତେଣୁ ଶ୍ରୀଲଙ୍କା ଚାଇନା ଜାହାଜର ପ୍ରବେଶ ଅନୁମତିକୁ ମନା କରିଛି। ଚାଇନାର ଜାହାଜ ୟୁଆନ ୱାଙ୍ଗ-୫ ଇ ରିଫିଲିଂ ପାଇଁ ଅଗଷ୍ଟ ୧୧ରୁ ୧୭ ମଧ୍ୟରେ ଶ୍ରୀଲଙ୍କାର ହମ୍ବନଟୋଟା ବନ୍ଦରରେ ପହଞ୍ଚିବ ବୋଲି ଆଶା କରାଯାଉଥିଲା ଏବଂ ଅଗଷ୍ଟ ଏବଂ ସେପ୍ଟେମ୍ବର ମଧ୍ୟରେ ଭାରତ ମହାସାଗରର ଉତ୍ତର-ପଶ୍ଚିମ ଭାଗରେ ଉପଗ୍ରହ ନିୟନ୍ତ୍ରଣ ଏବଂ ଅନୁସନ୍ଧାନ ଟ୍ରାକିଂ କରିବାକୁ ଯୋଜନା କରାଯାଇଥିଲା।