କଲମ୍ବୋ, ୧୯।୨: ଶ୍ରୀଲଙ୍କାର ଦ୍ରୁତ ବୋଲର୍ ଧାମିକା ପ୍ରସାଦ ଗୁରୁବାର ଅନ୍ତର୍ଜାତୀୟ କ୍ରିକେଟରୁ ଅବସର ଘୋଷଣା କରିଛନ୍ତି। ୩୭ ବର୍ଷୀୟ ଏହି ବୋଲର୍ ୨୫ଟି ଟେଷ୍ଟ, ୨୪ ଏକଦିବସୀୟ ଏବଂ ଗୋଟିଏ ଟି୨୦ ଅନ୍ତର୍ଜାତୀୟ ମ୍ୟାଚ୍ରେ ଶ୍ରୀଲଙ୍କାର ପ୍ରତିନିଧିତ୍ୱ କରିଥିଲେ।
୨୦୦୬ରେ ବାଂଲାଦେଶ ବିପକ୍ଷରେ ଧାମିକା କ୍ରିକେଟରେ ଡେବ୍ୟୁ କରିଥିଲେ। ଏହାର ଦୁଇ ବର୍ଷ ପରେ ଅର୍ଥାତ ୨୦୦୮ରେ କଲମ୍ବୋରେ ଭାରତ ବିପକ୍ଷରେ ସେ ଟେଷ୍ଟ ଡେବ୍ୟୁ କରିଥିଲେ। ୨୦୧୧ରେ ଅଷ୍ଟ୍ରେଲିଆ ବିପକ୍ଷରେ ସେ ତାଙ୍କ କ୍ୟାରିୟରର ଏକମାତ୍ର ଟି-୨୦ ମ୍ୟାଚ୍ ଖେଳିଥିଲେ।
ଡାହାଣହାତୀ ଦ୍ରୁତ ବୋଲର ଧାମିକା ଟେଷ୍ଟରେ ୭୫ ଉଇକେଟ ଏବଂ ଦିନିକିଆରେ ୩୫ ଉଇକେଟ ନେଇଥିଲେ। ୨୦୧୫ରେ ସେ ତାଙ୍କର ଶେଷ ଅନ୍ତର୍ଜାତୀୟ ମ୍ୟାଚ୍ ଖେଳିଥିଲେ। ଏହାପରେ ୬ ବର୍ଷ ଧରି ତାଙ୍କୁ ସୁଯୋଗ ମିଳି ନ ଥିଲା। ଶେଷରେ ସେ ଅନ୍ତର୍ଜାତୀୟ କ୍ରିକେଟରୁ ଅବସର ନେବାକୁ ନିଷ୍ପତ୍ତି ନେଇଛନ୍ତି।