ଢାକା, ୨୯।୫-
ଅଧିନାୟକ କୁସାଲ ପେରେରାଙ୍କ ଶତକ ପରେ ଦୁଷ୍ମନ୍ତ ଚାମିରାଙ୍କ ୫ ଉଇକେଟ ସଫଳତା ବଳରେ ଶ୍ରୀଲଙ୍କା ଶୁକ୍ରବାର ଅନୁଷ୍ଠିତ ତୃତୀୟ ଦିନିକିଆ କ୍ରିକେଟ ମ୍ୟାଚରେ ବାଂଲାଦେଶକୁ ୯୭ ରନରେ ପରାସ୍ତ କରିଛି। ପ୍ରଥମ ୨ଟି ଦିନିକିଆ ସହ ବାଂଲାଦେଶ ସିରିଜ ଜିତି ସାରିଛି। ତେଣୁ ଅନ୍ତିମ ଦିନିକିଆରେ ଶ୍ରୀଲଙ୍କା ସାନ୍ତ୍ୱନାମୂଳକ ବିଜୟ ହାସଲ କରିଛି। ପ୍ରଥମେ ବ୍ୟାଟିଂ କରିଥିବା ଶ୍ରୀଲଙ୍କା ୫୦ ଓଭରରେ ୬ ଉଇକେଟ ହରାଇ ୨୮୬ ରନ କରିଥିବାବେଳେ ବାଂଲାଦେଶ ୪୨.୩ ଓଭରରେ ୧୮୯ ରନକରି ଅଲ୍ଆଉଟ ହୋଇଯାଇଥିଲା। ଶ୍ରୀଲଙ୍କାର ଦୁଷ୍ମନ୍ତ ଚାମିରା ପ୍ଲେୟର ଅଫ୍ ଦି ମ୍ୟାଚ ଏବଂ ବାଂଲାଦେଶର ମୁଶ୍ଫିକର ରହିମ ପ୍ଲେୟର ଅଫ୍ ଦି ସିରିଜ ପୁରସ୍କାର ପାଇଛନ୍ତି।
ଟସ୍ ଜିତି ପ୍ରଥମେ ବ୍ୟାଟିଂ ନିଷ୍ପତ୍ତି ନେଇଥିଲା ଶ୍ରୀଲଙ୍କା। ବ୍ୟାଟିଂ ବିଭାଗର ମେରୁଦଣ୍ଡ ସାଜିଥିବା ଅଧିନାୟକ ପେରେରା ୧୨୨ ବଲ୍ରୁ ୧୧ ଚୌକା ଓ ୧ ଛକା ସହାୟତାରେ ୧୨୦ ରନ କରି ଦଳକୁ ଏକ ସମ୍ମାନଜନକ ସ୍କୋରରେ ପହଞ୍ଚାଇବାରେ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରିଥିଲେ। ଧନଞ୍ଜୟ ଡି’ସିଲ୍ଭା ୫୫(୭୦ ବଲ, ୪ ଚୌକା) ରନରେ ଅପରାଜିତ ରହିଥିଲେ। ବାଂଲାଦେଶ ପକ୍ଷରୁ ତାସକିନ ଅହମଦ ୪ଟି ଓ ଶୋରିଫୁଲ ଇସଲାମ ଗୋଟିଏ ଉଇକେଟ ନେଇଥିଲେ। ୨୮୭ ରନ ବିଜୟ ଲକ୍ଷ୍ୟରେ ବାଂଲାଦେଶ ପ୍ରାରମ୍ଭିକ ବ୍ୟାଟିଂ ବିପର୍ଯ୍ୟୟର ସମ୍ମୁଖୀନ ହୋଇ ବ୍ୟାକ୍ଫୁଟ୍କୁ ଚାଲି ଯାଇଥିଲା। ୨୮ ରନ ମଧ୍ୟରେ ଦଳ ୩ଟି ଉଇକେଟ ହରାଇଥିବାବେଳେ ମିଡିଲ ଅର୍ଡରରେ ମହମୁଦୁଲ୍ଲା ସର୍ବାଧିକ ୫୩ ଓ ମୋସାଦେକ ହୋସେନ ୫୧ ରନ କରିଥିଲେ। ମାତ୍ର ବିଜୟ ପାଇଁ ତାହା ପର୍ଯ୍ୟାପ୍ତ ହୋଇ ନ ଥିଲା। ଶ୍ରୀଲଙ୍କା ବୋଲରଙ୍କ ମଧ୍ୟରେ ଚାମିରା ନିଜ ୯ ଓଭର ସ୍ପେଲ୍ରେ ଗୋଟିଏ ମେଡେନ ନେଇ ମାତ୍ର ୧୬ ରନ ବିନିମୟରେ ୫ ଉଇକେଟ ସଫଳତା ପାଇଥିଲେ। ଓ୍ବାନିନ୍ଦୁ ହସରଙ୍ଗା ଓ ରମେଶ ମେଣ୍ଡିସ ୨ଟି ଲେଖାଏ ଏବଂ ବିନୁରା ଫର୍ନାଣ୍ଡୋ ଗୋଟିଏ ଉଇକେଟ ନେଇଥିଲେ।
ସଂକ୍ଷିପ୍ତ ସ୍କୋର
ଶ୍ରୀଲଙ୍କା ୫୦ ଓଭରରେ ୨୮୬/୬(କୁସାଲ ପେରେରା-୧୨୦, ଧନଞ୍ଜୟ ଡି’ସିଲ୍ଭା-୫୫*, ତାସକିନ ଅହମଦ-୪/୪୬, ଶୋରିଫୁଲ ଇସଲାମ-୧/୫୬)। ବାଂଲାଦେଶ ୪୨.୩ ଓଭରରେ ୧୮୯/ଅଲଆଉଟ (ମହମୁଦୁଲ୍ଲା-୫୩, ମୋସାଦେକ ହୋସେନ-୫୧, ଦୁଷ୍ମନ୍ତ ଚାମିରା-୫/୧୬, ଓ୍ବାନିନ୍ଦୁ ହସରଙ୍ଗା-୨/୪୭, ରମେଶ ମେଣ୍ଡିସ-୨/୪୦, ବିନୁରା ଫର୍ନାଣ୍ଡୋ-୧/୩୩)।
