ପାଲିକେଲ (ଶ୍ରୀଲଙ୍କା), ୨୫ା୪-ସ୍ଥାନୀୟ ପାଲିକେଲ ଇଣ୍ଟରନ୍ୟାଶନାଲ ଷ୍ଟାଡିୟମରେ ଚାଲିଥିବା ପ୍ରଥମ କ୍ରିକେଟ ଟେଷ୍ଟ ମ୍ୟାଚରେ ବାଂଲାଦେଶର ପ୍ରଥମ ଇନିଂସ ସ୍କୋର ୫୪୧/୭ ଜବାବରେ ଶ୍ରୀଲଙ୍କା ଶନିବାର ଚତୁର୍ଥ ଦିବସ ଖେଳ ଶେଷ ସୁଦ୍ଧା ୩ ଉଇକେଟ ବିନିମୟରେ ୫୧୨ରନ କରିଛି। ମ୍ୟାଚ ସମ୍ଭବତଃ ଡ୍ର ଆଡକୁ ଗତି କରିଛି। ଘରୋଇ ଦଳ ସକାଳେ ପୂର୍ବଦିନର ଅସମାପ୍ତ ସ୍କୋର ୨୨୯/୩ରୁ ଖେଳ ଆରମ୍ଭ କରିଥିଲା। ଚତୁର୍ଥ ଦିବସରେ ବାଂଲାଦେଶ ବୋଲରମାନେ ପ୍ରଭାବହୀନ ସାବ୍ୟସ୍ତ ହୋଇଥିଲେ। ସେମାନେ ଗୋଟିଏ ହେଲେ ଉଇକେଟ ପତନ ଘଟାଇ ପାରି ନ ଥିଲେ। ଷ୍ଟମ୍ପ୍ସ ଅପସାରଣ ବେଳକୁ ଦିମୁଥ କରୁଣାରନେତ୍ ୨୩୪ ଏବଂ ଧନଞ୍ଜୟ ଡି’ସିଲ୍ଭା ୧୫୪ରନ କରି ଅପରାଜିତ ରହିଛନ୍ତି। ଦୁଇ ବ୍ୟାଟ୍ସମ୍ୟାନଙ୍କ ମଧ୍ୟରେ ଚତୁର୍ଥ ଉଇକେଟରେ ୩୨୨ରନର ପାର୍ଟନରଶିପ ହୋଇସାରିଛି।