ବମ୍ବେ: ବଲିଉଡର ‘ଚାନ୍ଦନୀ’ ହଠାତ୍ ଦୁନିଆରୁ ବିଦାୟ ନେବେ ବୋଲି କେହି ବି ଭାବି ନ ଥିଲେ। ଶ୍ରୀଦେବୀଙ୍କ ଦେହାନ୍ତ ତାଙ୍କ ପ୍ରଶଂସକ, ପରିବାର ସହ ସିନେମା ଜଗତକୁ ଏକ ଗଭୀର ଆଘାତ ଦେଇଥିଲା। ୨୦୧୮ ଫେବୃଆରୀ ୨୪ରେ ଦୁବାଇରେ ସୁପରଷ୍ଟାର ଶ୍ରୀଦେବୀଙ୍କର ମୃତ୍ୟୁ ଘଟିଥିଲା। ହୋଟେଲ ବାଥରୁମ୍ର ଟବ୍ରେ ବୁଡ଼ିଯିବା କାରଣରୁ ତାଙ୍କର ମୃତ୍ୟୁ ହୋଇଥିବା କୁହାଯାଇଥିଲା। ସେତେବେଳେ ତାଙ୍କ ସ୍ବାମୀ ବୋନି କପୁର ମଧ୍ୟ ସେଠାରେ ଉପସ୍ଥିତ ଥିଲେ। ଏବେ ଏହି ଘଟଣାକୁ ୫ ବର୍ଷ ବିତିଥିବା ବେଳେ ବୋନି କପୁର ଏକ ସାକ୍ଷାତକାରରେ ଶ୍ରୀଦେବୀଙ୍କ ମୃତ୍ୟୁ ରହସ୍ୟ ଉନ୍ମୋଚନ କରିଛନ୍ତି।
ଶ୍ରୀଦେବୀ ତାଙ୍କ ସମ୍ପର୍କୀୟଙ୍କ ବିବାହ ଉତ୍ସବରେ ଯୋଗଦେବା ପାଇଁ ସ୍ବାମୀ ବୋନି କପୁର ଏବଂ ଝିଅ ଖୁସିଙ୍କ ସହ ଦୁବାଇରେ ପହଞ୍ଚିଥିଲେ। ଫେବୃଆରୀ ୨୦ରେ ବିବାହ କାର୍ଯ୍ୟ ସମାପ୍ତ ହୋଇଥିଲା। ପରଦିନ ବୋନି ଏବଂ ଖୁସି ମୁମ୍ବାଇ ଫେରି ଆସିଥିଲେ। କାରଣ ବୋନିଙ୍କୁ ଏକ ବୈଠକ ଲାଗି ଲକ୍ଷ୍ନୌ ଯିବାର ଥିଲା। ଅପରପକ୍ଷେ ଶ୍ରୀଦେବୀ ଦୁବାଇରେ ଟିକେ ଆରାମ କରିବା ଏବଂ ଝିଅଙ୍କ ଲାଗି ଶପିଂ କରିବା ପାଇଁ ରହିଥିଲେ।
୨୨ ଏବଂ ୨୩ ଫେବୃଆରୀରେ ଶ୍ରୀଦେବୀ ହୋଟେଲରେ ଏକୁଟିଆ ଥିଲେ। ସେ ୨୪ ତାରିଖ ଦିନ ଭାରତକୁ ଫେରିଥାନ୍ତେ। ଶ୍ରୀଦେବୀଙ୍କ ଫୋନ ଯେଉଁଥିରେ ଜାନଭୀ କପୁରଙ୍କ ଶପିଂ ତାଲିକା ରହିଥିଲା, ତାହା ରସ-ଅଲ-ଖାଇମାରେ ଛାଡି ଦେଇଥିଲେ। ଏଭଳି ପରିସ୍ଥିତିରେ ସେ ନିଜେ ହୋଟେଲରେ ଆରାମ କରିଥିଲେ। ୨୪ ଫେବୃଆରୀ ସକାଳେ ଶ୍ରୀଦେବୀ ବୋନି କପୁରଙ୍କୁ ଫୋନ କରି ତାଙ୍କୁ ମିସ୍ କରୁଥିବା କହିଥିଲେ। ବୋନି ଦୁବାଇ ଯିବା ଯୋଜନା କରିଥିଲେ ହେଁ ତାଙ୍କୁ ସରପ୍ରାଇଜ୍ ଦେବାକୁ କହି ନ ଥିଲେ।
ବୋନି ଦୁବାଇରେ ପହଞ୍ଚି ହୋଟେଲରୁ ଏକ ନକଲ ଚାବି ନେଇ ଶ୍ରୀଦେବୀଙ୍କ କୋଠରୀରେ ପ୍ରବେଶ କରି ତାଙ୍କୁ ସରପ୍ରାଇଜ୍ ଦେଇଥିଲେ। ବୋନି କପୁରଙ୍କୁ ଦେଖି ଶ୍ରୀଦେବୀ ବହୁତ ଖୁସି ହୋଇ ତାଙ୍କୁ ଆଲିଙ୍ଗନ କରିଥିଲେ। ଏହା ପରେ ଦୁହେଁ ଏକ ରୋମାଣ୍ଟିକ ରାତ୍ରୀ ଭୋଜନ ଡେଟ୍ରେ ଯିବାକୁ ଯୋଜନା କରିଥିଲେ। ପ୍ରାୟ ଅଧ ଘଣ୍ଟା କଥାବାର୍ତ୍ତା କରିବା ପରେ ଶ୍ରୀଦେବୀ ଗାଧୋଇବାକୁ ବାଥରୁମକୁ ଯାଇହେଲେ ଏବଂ ବୋନି ର ମ୍ୟାଚ ଦେଖିଥିଲେ। ବହୁତ ସମୟ ବିତିଯିବା ପରେ ମଧ୍ୟ ସେ ବାହାରୁ ନ ଥିବାରୁ ବୋନି ତାଙ୍କୁ ଦୁଇଥର ଡାକିଥିଲେ। ହେଲେ କୌଣସି ପ୍ରତିକ୍ରିୟା ମିଳି ନ ଥିଲା।
ବୋନି କପୁର କବାଟ ଭାଙ୍ଗି ଭିତରେ ପଶିଥିଲେ। ହେଲେ ତାଙ୍କ ସମ୍ମୁଖରେ ଥିବା ଦୃଶ୍ୟ ଦେଖି ଆଶ୍ଚର୍ଯ୍ୟ ହେଇଥିଲେ। ବାଥଟବ୍ରେ ପାଣି ଭର୍ତ୍ତି ହୋଇ ଶ୍ରୀଦେବୀ ଏଥିରେ ମୁଣ୍ଡରୁ ପାଦ ପର୍ଯ୍ୟନ୍ତ ବୁଡ଼ି ଯାଇଥିଲେ। ଟବରୁ ପାଣି ଢାଳିବାର କୌଣସି ଚିହ୍ନ ମଧ୍ୟ ନ ଥିଲା। ଏଭଳି ପରିସ୍ଥିତିରେ ଶ୍ରୀଦେବୀ ପ୍ରଥମେ ଚେତାଶୂନ୍ୟ ହୋଇ ବୁଡ଼ି ଯାଇଥିଲେ କିମ୍ବା ପ୍ରଥମେ ବୁଡ଼ି ଯାଇଥିଲେ ଏବଂ ପରେ ଚେତାଶୂନ୍ୟ ହୋଇଯାଇଥିଲେ ତାହା ଜଣା ପଡି ନ ଥିଲା। ବୋନି ତୁରନ୍ତ ତାଙ୍କୁ ବାହାରକୁ ନେଇଥିଲେ, ହେଲେ ବହୁତ ଡେରି ହୋଇଯାଇଥିଲା। ଶ୍ରୀଦେବୀଙ୍କ ମୃତ୍ୟୁ ଖବର ଭାରତରେ ଜଙ୍ଗଲୀ ନିଆଁ ପରି ବ୍ୟାପିଯାଇଥିଲା। ଦୁବାଇରେ ବୋନି କପୁରଙ୍କୁ ୪୮ ଘଣ୍ଟା ପଚରାଉଚରା କରାଯାଇଥିଲା ଯେଉଁଥିରେ ଲାଇ ଡିଟେକ୍ଟର ସମେତ ବିଭିନ୍ନ ପରୀକ୍ଷା କରାଯାଇଥିଲା। ତେବେ ଶ୍ରୀଦେବୀଙ୍କ ମୃତ୍ୟୁ ଏକ ଆକସ୍ମିକ ମୃତ୍ୟୁ ବୋଲି ରିପୋର୍ଟରେ ଏହା ସ୍ପଷ୍ଟ ହୋଇଛି। ପାଣିରେ ବୁଡିଯିବା କାରଣରୁ ଅଭିନେତ୍ରୀଙ୍କ ମୃତ୍ୟୁ ହୋଇଥିଲା। ଏତେ ବର୍ଷ ପର୍ଯ୍ୟନ୍ତ ଏ ବିଷୟରେ କଥାବାର୍ତ୍ତା ନ କରିବାକୁ ସ୍ଥିର କରିଥିଲି ବୋଲି ବୋନି କପୁର କହିଛନ୍ତି।
ଏହାଛଡ଼ା ଶ୍ରୀଦେବୀ ପରଦାରେ ଭଲ ଦେଖାଯିବା ପାଇଁ କ୍ରାସ ଡାଏଟିଂ କରୁଥିଲେ। ବିବାହ ପରେ ସେ ଅନେକ ଥର ବେହୋସ ହୋଇଯାଇଥିଲେ। ସେ ନିଜ ଖାଦ୍ୟରେ ବିଲକୁଲ୍ ଲୁଣ ଖାଉ ନ ଥିଲେ, ଯେଉଁ କାରଣରୁ ରକ୍ତଚାପ କମ ରହୁଥିଲା। ଡାକ୍ତରମାନେ ତାଙ୍କୁ ଅନେକ ଥର ଲୁଣ ଖାଇବାକୁ ପରାମର୍ଶ ଦେଇଥିଲେ, କିନ୍ତୁ ସେ କାହା କଥା ଶୁଣୁ ନ ଥିଲେ। ଯେତେବେଳେ ନାଗାର୍ଜୁନ ତାଙ୍କ ଅନ୍ତିମ ସଂସ୍କାରକୁ ଆସିଥିଲେ ସେତେବେଳେ ସେ କହିଥିଲେ ଯେ ଫିଲ୍ମର ଶୁଟିଂ ସମୟରେ ସେ ଚେତାଶୂନ୍ୟ ହୋଇଯାଇଥିଲେ। ଏପରିକି ତାଙ୍କର ଗୋଟିଏ ଦାନ୍ତ ମଧ୍ୟ ଭାଙ୍ଗି ଯାଇଥିଲା। ଯଦିଓ ମୋତେ ଏ ବିଷୟରେ କିଛି ଜଣା ନ ଥିଲା। ଶ୍ରୀଦେବୀ ନିଜ ଝିଅମାନଙ୍କୁ ମଧ୍ୟ କମ ଲୁଣ ଖାଇବାକୁ ପରାମର୍ଶ ଦେଉଥିଲେ। କାରଣ ଅତ୍ୟଧିକ ଲୁଣ ଚେହେରାକୁ ଫ୍ଲଫି କରିଦିଏ। ଏହାଫଳରେ କ୍ୟାମେରାରେ ମୁହଁ ଟିକେ ଓଜନିଆ ଦେଖାଯାଇଥାଏ। ତେବେ ଏହି ଅଭ୍ୟାସ ଏତେ ଗମ୍ଭୀର ହୋଇପାରେ ବୋଲି ଆମର କୌଣସି ଧାରଣା ନ ଥିବା ସେ କହିଛନ୍ତି।