ଓଡେନ୍ସେ(ଡେନ୍ମାର୍କ), ୧୫।୧୦(ପି.ଟି.)- ଦୀର୍ଘ ୭ ମାସର ବ୍ୟବଧାନପରେ ଡେନମାର୍କ ଓପନ ସହ ଅନ୍ତର୍ଜାତୀୟ ବ୍ୟାଡ୍ମିଣ୍ଟନ ଟୁର୍ନାମେଣ୍ଟ ଆରମ୍ଭ ହୋଇଛି। ଏଥିରେ ଭାଗ ନେଇଥିବା ଭାରତର କିଡାମ୍ବି ଶ୍ରୀକାନ୍ତ ବିଜୟ ସହ ଅଭିଯାନ ଆରମ୍ଭ କରିଛନ୍ତି। ପ୍ରଥମ ରାଉଣ୍ଡରେ ସେ ଇଂଲଣ୍ଡର ଟୋବି ପେଣ୍ଟିଙ୍କୁ ୨୧-୧୨, ୨୧-୧୮ ପଏଣ୍ଟରେ ପରାସ୍ତ କରିଛନ୍ତି। ବିଜୟ ପାଇଁ ପୂର୍ବତନ ବିଶ୍ୱର ନମ୍ବରଓ୍ବାନ ଖେଳାଳି ଶ୍ରୀକାନ୍ତ ମାତ୍ର ୩୭ ମିନିଟ ସମୟ ନେଇଥିଲେ। ପୂର୍ବରୁ ଭାରତର ଲକ୍ଷ୍ୟ ସେନ୍ ଦ୍ୱିତୀୟ ରାଉଣ୍ଡରେ ପ୍ରବେଶ କରି ସାରିଛନ୍ତି। ଏହି ପର୍ଯ୍ୟୟରେ ସେ ଡେନ୍ମାର୍କର ହନ୍ସ-କ୍ରିଷ୍ଟିଆନ ସୋଲବର୍ଗ ଭିଟିଂହସ୍ଙ୍କୁ ଭେଟିବେ। କରୋନା ସଂକ୍ରମଣକୁ ଦୃଷ୍ଟିରେ ରଖି ବ୍ୟାଡ୍ମିଣ୍ଟନ ଓ୍ବାଲର୍ଡ ଫେଡେରେଶନ ଅଧିକାଂଶ ପ୍ରତିଯୋଗିତାକୁ ବାତିଲ କରିଛି । ଏହା ବ୍ୟତୀତ ଏସିଆ ଲେଗ୍ ଏବଂ ଓ୍ବାଲର୍ଡ ଟୁର୍ ଫାଇନାଲକୁ ଆସନ୍ତା ବର୍ଷ ଆୟୋଜନ କରିବାକୁ ନିଷ୍ପତ୍ତି ନେଇଛି। ତେଣୁ ଅନ୍ତର୍ଜାତୀୟ ଟୁର୍ନାମେଣ୍ଟ ମଧ୍ୟରେ ଚଳିତ ବର୍ଷ କେବଳ ଡେନ୍ମାର୍କ ଓପନ ସୁପର ୭୫୦ ଆୟୋଜନ ହେଉଛି।
