ପୁରୁଣା ଭୁବନେଶ୍ୱର,୨୬।୨(ଡି.ଏନ୍.ଏ.): ଏକାମ୍ର କ୍ଷେତ୍ରର ଆରାଧ୍ୟ ଦେବ ପ୍ରଭୁ ଶ୍ରୀଲିଙ୍ଗରାଜଙ୍କ ହାଣ୍ଡିଭଙ୍ଗା ଯାତ୍ରା ଶନିବାର ଥିବାବେଳେ ପୂର୍ବ ବର୍ଷ ଭଳି ବନ୍ଦ ହୋଇଛି। ମଲ୍ଲିଆ ସେବାୟତ ପାଳି କରିବାକୁ ନ ଆସିବାରୁ ଅସ୍ବାଭାବିକ ପରିସ୍ଥିତି ଉପୁଜିଛି। ପ୍ରାତଃରୁ କପିଳେଶ୍ୱର ମନ୍ଦିର କବାଟ ତାଲା ପଡ଼ି ରହିଥିବା ବେଳେ ରିପୋର୍ଟ ଲେଖା ହେବା ବେଳକୁ କୌଣସି ନୀତିକାନ୍ତି ହୋଇପାରି ନାହିଁ। ଫଳରେ କପିଳେଶ୍ୱର ଦେବ ଉପବାସରେ ରହିଥିଲେ।
ଶ୍ରୀଲିଙ୍ଗରାଜଙ୍କ ହାଣ୍ଡିଭଙ୍ଗା ଯାତ୍ରା ୯ବର୍ଷ ହେବ ବନ୍ଦ ରହିଥିବା ବେଳେ ସୁଚାରୁଭାବେ ପୁଣି ଯାତ୍ରା ସମ୍ପାଦନ କରିବା ପାଇଁ ହାଇକୋର୍ଟ ନିର୍ଦ୍ଦେଶ ଦେଇଥିଲେ। ଇତିମଧ୍ୟରେ ୫ବର୍ଷ ବିତିଯାଇଥିଲେ ମଧ୍ୟ ହାଇକୋର୍ଟଙ୍କ ନିର୍ଦ୍ଦେଶ କାର୍ଯ୍ୟକାରୀ ହୋଇପାରୁ ନାହିଁ। ଚଳିତ ବର୍ଷ ଏହି ଯାତ୍ରା ସମ୍ପାଦନ କରିବା ଲାଗି ପ୍ରଶାସନ ଅଣ୍ଟା ଭିଡ଼ିଥିଲା। ଏନେଇ ପ୍ରଶାସନ ପକ୍ଷରୁ ସର୍କିଟ ହାଉସଠାରେ ମଲ୍ଲିଆ ଓ ଖୁଣ୍ଟିଆ ସେବାୟତଙ୍କ ଉପସ୍ଥିତିରେ ବୈଠକ ହୋଇଥିଲା। ଚଳିତବର୍ଷ ପରମ୍ପରା ଅନୁଯାୟୀ ନୀତି ସ୍ବାଭାବିକ ହେବ ବୋଲି ବୈଠକରେ ନିଷ୍ପତ୍ତି ହୋଇଥିଲା। ଏଥିସହ ଦୁଇ ସେବାୟତ ପ୍ରମୁଖ ମଧ୍ୟ ରାଜି ହୋଇଥିଲେ। ତେବେ ଶନିବାର ପ୍ରତ୍ୟୁଷରୁ ଉପଜିଲାପାଳ, ଦେବୋତ୍ତର ସହକାରୀ ଆୟୁକ୍ତ, ସ୍ଥାନୀୟ ପୋଲିସ ଓ ଖୁଣ୍ଟିଆ ସେବାୟତ କପିଳେଶ୍ୱର ମନ୍ଦିର ସିଂହଦ୍ୱାର ନିକଟରେ ପହଞ୍ଚିଥିଲେ। ଦ୍ୱାରଫିଟା ଦାୟିତ୍ୱରେ ଥିବା ମଲ୍ଲିଆ ସେବାୟତ ମ୍ୟାନେଜରଙ୍କ ନିକଟରେ ଚାବି ରହିଥିଲା। ତେବେ ଉକ୍ତ ଦିନର ପାଳିଆ ମଲ୍ଲିଆ ସେବାୟତ ଅନୁପସ୍ଥିତ ରହିବାରୁ ମନ୍ଦିରର ଦ୍ୱାର ଫିଟା ହୋଇ ନ ଥିଲା। ଏପରିକି ଠାକୁରଙ୍କ ଅନ୍ୟାନ୍ୟ ନୀତିକାନ୍ତି ନ ହେବାରୁ ଦିନତମାମ ଠାକୁର ଉପବାସରେ ରହିଥିଲେ। ଫଳରେ ପ୍ରଶାସନିକ ଅଧିକାରୀମାନେ ଫେରିଯାଇଥିଲେ। ସନ୍ଧ୍ୟାରେ ଜିଲାପାଳ ତଥା ମନ୍ଦିର ଟ୍ରଷ୍ଟ ବୋର୍ଡ ସଭାପତି କେ.ସୁଦର୍ଶନ ଚକ୍ରବର୍ତ୍ତୀ ସର୍କିଟ ହାଉସକୁ ଉଭୟ ସେବାୟତ ପ୍ରମୁଖଙ୍କୁ ଡକାଇଥିଲେ। ଖୁଣ୍ଟିଆ ସେବାୟତ ଆସିଥିବା ବେଳେ ମଲ୍ଲିଆ ସେବାୟତ ଅନୁପସ୍ଥିତ ଥିଲେ। ଫଳରେ ହାଣ୍ଡିଭଙ୍ଗା ଯାତ୍ରା ଶେଷ ଆଶା ମଉଳିଯାଇଥିଲା। ଏ ସମ୍ପର୍କରେ ଉପଜିଲାପାଳ ଦେବବ୍ରତ ସାହୁ କୁହନ୍ତି, କପିଳେଶ୍ୱର ମନ୍ଦିର ଦ୍ୱାରଫିଟା ଦାୟିତ୍ୱରେ ଥିବା ମଲ୍ଲିଆ ସେବାୟତ ମ୍ୟାନେଜରଙ୍କ ନିକଟରେ ଚାବି ରହିଥିଲା। ଉକ୍ତ ଦିନର ପାଳିଆ ମଲ୍ଲିଆ ସେବାୟତ ଅନୁପସ୍ଥିତ ରହିବାରୁ ନୀତିକାନ୍ତି ହୋଇପାରିଲା ନାହିଁ। ଖିଲାପକାରୀଙ୍କୁ କାରଣ ଦର୍ଶାଅ ନୋଟିସ ହୋଇଛି। ଏଥିସହ ଦେବୋତ୍ତର ବିଭାଗକୁ ଘଟଣାକ୍ରମ ରିପୋର୍ଟ ମଗାଯାଇଛି ବୋଲି ସେ କହିଛନ୍ତି। ଅନ୍ୟପକ୍ଷରେ ଶ୍ରୀଲିଙ୍ଗରାଜ ମନ୍ଦିରରେ ପ୍ରାତଃରୁ ମଙ୍ଗଳ ଆଳତି, ଅବକାଶ ନୀତି କରାଯାଇ ଦ୍ୱିପ୍ରହର ଧୂପ ପରେ ଯାତ୍ରା ପୂଜା ନୀତି ହୋଇଥିଲା। ହାଣ୍ଡିଭଙ୍ଗା ଯାତ୍ରା ନ ହେବାରୁ ରିପୋର୍ଟ ଲେଖା ହେବା ବେଳକୁ ବୀରକିଶୋରୀ ବଲ୍ଲଭଠାରୁ ନୀତି ବନ୍ଦ ଥିବା ଜଣାପଡ଼ିଛି।