ପୁରୁଣା ଭୁବନେଶ୍ୱର,୨୯ା୩(ଡି.ଏନ୍.ଏ.): ପ୍ରଭୁ ଶ୍ରୀଲିଙ୍ଗରାଜଙ୍କ ରୁକୁଣା ରଥଯାତ୍ରା ବୁଧବାର ଅନୁଷ୍ଠିତ ହେବ। ରଥଖଳାରେ ରଥ ନିର୍ମାଣ କାର୍ଯ୍ୟ ଶେଷ ହେବା ପରେ ମନ୍ଦିର ପ୍ରଶାସନକୁ ହସ୍ତାନ୍ତର କରାଯାଇଛି। ମନ୍ଦିର ପ୍ରଶାସନ ପକ୍ଷରୁ ମଧ୍ୟ ସବୁ ପ୍ରସ୍ତୁତି ଶେଷ ହୋଇଛି। ମଙ୍ଗଳବାର ରଥଖଳାରେ ଥିବା ରୁକୁଣା ରଥ ପ୍ରତିଷ୍ଠା କାର୍ଯ୍ୟ ମଧ୍ୟ ବିଧି ମୁତାବକ ସମ୍ପନ୍ନ ହୋଇଛି। ସନ୍ଧ୍ୟା ଧୂପ, ଠାକୁରାଣୀ ସନ୍ଧ୍ୟା ଧୂପ, ଭୁବନେଶ୍ୱରୀ ଠାକୁରାଣୀଙ୍କ ନବପତ୍ରିକା ପୂଜା ସରିବା ପରେ ରାତି ୧୦ଟା ୩୦ରୁ ୧୧ଟା ମଧ୍ୟରେ ପ୍ରତିଷ୍ଠା କାର୍ଯ୍ୟ ଆରମ୍ଭ ହୋଇଥିଲା। ପତ୍ରି ସେବକ ଘଣ୍ଟ, କାହଳୀ, ମଶାଲ ସହିତ ମୁକ୍ତେଶ୍ୱର ମନ୍ଦିରକୁ ଯାତ୍ରା କରିଥିଲେ। ସେଠାରେ ମନ୍ଦିର ପରିସରରେ ଥିବା ମରୀଚିି କୁଣ୍ଡରୁ ଦୁଇ କଳସ ପାଣି ରଥ ପ୍ରତିଷ୍ଠା ପାଇଁ ପତ୍ରୀ ସେବକ ରଥଖଳାକୁ ଆଣିଥିଲେ। ରଥଖଳା ପରିସରରେ ଥିବା ବେଦିରେ ମନ୍ଦିର କୂଳ ପୁରୋହିତ ମନୋରଞ୍ଜନ ଦାସ ଏବଂ ପୁରୀ ମହାରାଜାଙ୍କ ନିର୍ଦ୍ଦେଶରେ ଆସିଥିବା ପୁରୀ ରାଜଗୁରୁ କର୍ତ୍ତା ହୋଇ ରଥ ପ୍ରତିଷ୍ଠା କାର୍ଯ୍ୟ ସମ୍ପାଦନ କରିଥିଲେ। ବିଳମ୍ବିତ ରାତିରେ ଏହି କାର୍ଯ୍ୟ ଶେଷ ହେବା ପରେ ପୂଜାପଣ୍ଡା ସେବକ ଦକ୍ଷିଣ ଘରୁ ପଞ୍ଚବକ୍ରଙ୍କୁ ଘଣ୍ଟ ମଶାଲ ଓ କାହାଳୀ ଶୋଭାଯାତ୍ରାରେ ବିଜେ କରିଥିଲେ। ପଞ୍ଚବକ୍ରଙ୍କୁ ପାଳିଆ ସେବାୟତ ରଥରେ ବିରାଜମାନ କରିସାରିବା ପରେ ପତ୍ରି ସେବକ ଠା’ କରିଥିଲେ। ପଞ୍ଚବକ୍ରଙ୍କୁ ଭୋଗ ନୈବେଦ୍ୟ କରିସାରିବା ପରେ ଆଳତି କରାଯାଇଥିଲା। ପରେ ପଞ୍ଚବକ୍ର ମନ୍ଦିରର ଦକ୍ଷିଣ ଘରକୁ ପ୍ରବେଶ କରିଥିଲେ। ସୂଚନାଥାଉ କି, ରଥ ଠିକ୍ ନିର୍ମାଣ ହୋଇଛି କି ନାହିଁ ଏହି ପଞ୍ଚବକ୍ରଙ୍କୁ ଆଗମନ ହୋଇଥାଏ ବୋଲି କିମ୍ବଦନ୍ତୀ ରହିଛି। ରଥ ପ୍ରତିଷ୍ଠା ପାଣିରେ ନିସନ୍ତାନ ମହିଳାମାନେ ସ୍ନାନ କରି ଭକ୍ତି ପୂର୍ବକ ଠାକୁରଙ୍କୁ ପୂଜାର୍ଚ୍ଚନା କଲେ ସନ୍ତାନବତୀ ହୋଇଥିବା କଥା କିମ୍ବଦନ୍ତୀ ରହିଛି।