ନୂଆଦିଲ୍ଲୀ, ୩୧।୮: ଭାରତୀୟ କ୍ରିକେଟ୍ ଦଳରେ ବର୍ତ୍ତମାନ ଯଶପ୍ରୀତ୍ ବୁମ୍ରା, ମହମ୍ମଦ ସାମି, ଇଶାନ୍ତ ଶର୍ମାଙ୍କ ଭଳି ବିଶ୍ୱର ଶ୍ରେଷ୍ଠ ଦ୍ରୁତ ବୋଲର ରହିଛନ୍ତି। କିନ୍ତୁ ଏଭଳି ଏକ ସମୟ ଥିଲା ଯେତେବେଳେ ଭାରତୀୟ କ୍ରିକେଟ୍ରେ ଦ୍ରୁତ ବୋଲରଙ୍କୁ ଗୁରୁତ୍ୱ ଦିଆଯାଉ ନ ଥିଲା। ତେବେ ମହେନ୍ଦ୍ର ସିଂ ଧୋନୀ ଓ ବିରାଟ କୋହଲିଙ୍କ ନେତୃତ୍ୱରେ ଭାରତୀୟ ଦ୍ରୁତ ବୋଲରମାନେ ଅନେକ ମ୍ୟାଚ୍ରେ ଦଳକୁ ଜିତାଇଛନ୍ତି। ଟେଷ୍ଟ କ୍ରିକେଟ୍ରେ ୨୦ ଉଇକେଟ୍ ଅକ୍ତିଆର କରିବା ଭାରତୀୟ ବୋଲରଙ୍କ ପାଇଁ ଏକ ସାଧାରଣ କଥା ହୋଇସାରିଛି। ଗୋଟିଏ ସମୟରେ ଭାରତୀୟ ଦଳରେ ୨ରୁ ୩ ଜଣ ଭଲ ବୋଲର ରହୁଥିଲେ। ଏପରିକି ଭଲ ବୋଲର ଖୋଜିବା କଷ୍ଟସାଧ୍ୟ ଥିଲା। ସେହି ସମୟରେ ମୟଶୂର ଏକ୍ସପ୍ରେସ ନାମରେ ପରିଚିତ ଜାଭାଗଲ ଶ୍ରୀନାଥ ସାରା ବିଶ୍ୱକୁ ନିଜ ବୋଲିଂର ଗତି ଦେଖାଇଥିଲେ।
ଶାରଜାରେ ପାକିସ୍ତାନ ବିପକ୍ଷରେ ପଦାର୍ପଣ କରି ଅନ୍ତର୍ଜାତୀୟ କ୍ୟାରିୟର ଆରମ୍ଭ କରିଥିବା ଶ୍ରୀନାଥ ଭାରତ ପକ୍ଷରୁ ୧୨ ବର୍ଷ ଧରି ପ୍ରତିନିଧିତ୍ୱ କରିଥିଲେ। ସୋମବାର ୫୧ ବର୍ଷ ବୟସରେ ପଦାର୍ପଣ କରିଥିବା ଜାଭାଗଲଙ୍କ ନାମରେ ଏକ ସଫଳତା ରହିଛି ଯାହାକୁ ଆଜି ପର୍ଯ୍ୟନ୍ତ ଆଉ କୌଣସି ଭାରତୀୟ ଦ୍ରୁତ ବୋଲର ହାସଲ କରିପାରି ନାହାନ୍ତି। ଭାରତର ଏକମାତ୍ର ଦ୍ରୁତ ବୋଲର ଭାବେ ଶ୍ରୀନାଥ ଦିନିକିଆ କ୍ରିକେଟ୍ରେ ୩୦୦ରୁ ଊର୍ଦ୍ଧ୍ୱ ଉଇକେଟ୍ ନେଇଛନ୍ତି। ୨୨୯ ଦିନିକିଆ ମ୍ୟାଚ୍ ଖେଳି ସେ ୩୧୫ ଉଇକେଟ୍ ହାସଲ କରିଛନ୍ତି। ସେହିଭଳି ୬୭ ଟେଷ୍ଟରୁ ତାଙ୍କ ନାମରେ ୨୩୬ ଉଇକେଟ୍ ରହିଛି। ଟେଷ୍ଟରେ ସେ ୫ ଥର ୧୦ କିମ୍ବା ଏହାଠାରୁ ଅଧିକ ଉଇକେଟ୍ ନେଇଛନ୍ତି। ୨୭ ଜାନୁୟାରୀ ୧୯୯୭ରେ ଶ୍ରୀନାଥ ଜିମ୍ବାଓ୍ବେ ବିପକ୍ଷରେ ଏକ ବଲ୍ ପକାଇଥିଲେ ଯାହାର ଘଣ୍ଟା ପ୍ରତି ବେଗ ୧୫୭ କିମି ଥିଲା। ସେ ଭାରତ ପକ୍ଷରୁ ୩ (୧୯୯୨, ୧୯୯୬ ଓ ୧୯୯୯) ବିଶ୍ୱକପ୍ ଖେଳିଛନ୍ତି।