ଧରାକୋଟ,୧୪ା୧୧(ବିଷ୍ଣୁ କେଶରୀ ଆଚାର୍ଯ୍ୟ): ଗଞ୍ଜାମ ଜିଲା ଧରାକୋଟ ଥାନା ଅଧୀନ ଜଗମୋହନ ପଞ୍ଚାୟତ ନାରାୟଣପୁର ଶାସନ ଗ୍ରାମରେ ଏକ ନିର୍ବନ୍ଧ ଭୋଜିରେ ଛୁରାମାଡ଼ ହେବାରୁ ଜଣେ ଆହତ ହୋଇଛନ୍ତି। ସେ ହେଲେ ନାରାୟଣପୁର ଗ୍ରାମର ସନ୍ନ୍ୟାସୀ ବେହେରା। ଗତ ବୁଧବାର ଗ୍ରାମର ସୁଶାନ୍ତ ବେହେରାଙ୍କ ନିର୍ବନ୍ଧ ଭୋଜି ଚାଲିଥିଲା। ଏଥିରେ ସାମିଲ ହେବାକୁ ଆସିଥିବା ଗ୍ରାମର ଭଗବାନ ବେହେରା ନିଶାସକ୍ତ ହୋଇ ନିଜ ସମ୍ପର୍କୀୟ ପୁତୁରା ସୁଶାନ୍ତଙ୍କୁ କୌଣସି କାରଣକୁ ନେଇ ଗାଳିଗୁଲଜ କରିଥିଲେ।
ଗାଁ ସଭାପତି ସନ୍ନ୍ୟାସୀ ଘଟଣାସ୍ଥଳକୁ ବୁଝାଶୁଝା କରିବା ବେଳେ ଭଗବାନ ହଠାତ୍ ତାଙ୍କୁ ଛୁରାମାଡ଼ କରିଥିଲେ। ସେଠାରେ ଉପସ୍ଥିତ ଥିବା ଅନ୍ୟମାନେ ଭଗବାନଙ୍କୁ କାବୁ କରି ଧରାକୋଟ ଥାନାକୁ ଖବର ଦେଇଥିଲେ। ପୋଲିସ ପହଞ୍ଚି ସନ୍ନ୍ୟାସୀଙ୍କୁ ମେଡ଼ିକାଲ ନେଇଥିଲା। ତାଙ୍କ ଏତଲାକୁ ଭିତ୍ତି କରି ନଂ. ୩୭୬/୨୪ ରେ ମାମଲା ରୁଜୁ କରିବା ସହ ଅଭିଯୁକ୍ତଙ୍କୁ ଗିରଫ ପରେ କୋର୍ଟ ଚାଲାଣ କରାଯାଇଥିବା ତଦନ୍ତକାରୀ ଅଧିକାରୀ ସସ୍ମିତା ମଗର କହିଛନ୍ତି।