ଭୋପାଳ,୩୧।୧୨ : ଅଯୋଧ୍ୟାରେ ରାମମନ୍ଦିର ନିର୍ମାଣ ଲାଗି ମଧ୍ୟପ୍ରଦେଶରେ ଚାନ୍ଦା ଆଦାୟ ବେଳେ ଦୁଇଟି ସ୍ଥାନରେ ଉତ୍ତେଜନା ଦେଖାଦେବା ସହ ସଂଘର୍ଷ ହୋଇଛି। ମଙ୍ଗଳବାର ମଣ୍ଡସୌର ଜିଲାର ଦୋରାନା ଗ୍ରାମରେ ଏକ ମସ୍ଜିଦ ଭାଙ୍ଗିବାକୁ ଗୋଟିଏ ଗୋଷ୍ଠୀ ଉଦ୍ୟମ କରିଥିଲେ। ସେମାନଙ୍କ ମଧ୍ୟରୁ ୫ ଜଣଙ୍କୁ ଗିରଫ କରାଯାଇଛି। ବିଶ୍ୱହିନ୍ଦୁ ପରିଷଦ ଓ ବଜରଙ୍ଗ ଦଳର ଶତାଧିକ ସଦସ୍ୟ ରାମମନ୍ଦିର ଲାଗି ପାଣ୍ଠି ସଂଗ୍ରହ ନିମନ୍ତେ ଉକ୍ତ ଗ୍ରାମରେ ରାଲି କରିଥିଲେ। ଏହାକୁ ନେଇ ଉତ୍ତେଜନା ସୃଷ୍ଟି ହୋଇଥିଲା। ସେହିପରି ଇନ୍ଦୋରରେ ପାଣ୍ଠି ସଂଗ୍ରହ ପାଇଁ ଅନ୍ୟ ଏକ ରାଲି ବେଳେ ସାମ୍ପ୍ରଦାୟିକ ଉତ୍ତେଜନା ପ୍ରକାଶ ପାଇଛି। ରାଲିରେ ଭାଗନେଇଥିବା ଲୋକମାନେ ମସ୍ଜିଦ ଭାଙ୍ଗିବାକୁ ଉଦ୍ୟମ କରିବା ସହ ଏହାର ପରିସରରେ ହନୁମାନ ଚାଳିଶା ପଢ଼ିଥିବା ଅଭିଯୋଗ ହୋଇଛି। ଢେଲାମାଡ଼ରେ କେତେଜଣ ଆହତ ହୋଇଛନ୍ତି। ପୋଲିସ ୪ଟି ଏତଲା ଦାଏର କରିବା ସହ ୨୭ ଜଣଙ୍କୁ ଡାକି ପଚରାଉଚରା କରୁଛି।
ରାମମନ୍ଦିର ଚାନ୍ଦା ସଂଗ୍ରହ ଲାଗି ମଧ୍ୟପ୍ରଦେଶରେ ଅନେକ ରାଲି ଚାଲିଥିବାବେଳେ କେବଳ ମାଲଓ୍ବା ଅଞ୍ଚଳରେ ସାମ୍ପ୍ରଦାୟିକ ଉତ୍ତେଜନା ଦେଖାଦେଇଛି। ପ୍ରଶାସନିକ ଅନୁମତି ନ ନେଇ କୋଭିଡ୍ କଟକଣା ଉଲ୍ଲଂଘନ କରାଯାଇ କେତେକ ସ୍ଥାନରେ ରାଲି ହୋଇଛି। ଲିଖିତ ଅନୁମତି ନ ଥିଲେ ରାଲି କରାଯାଇପାରିବ ନାହିଁ ବୋଲି ଜଣେ ବରିଷ୍ଠ ପୋଲିସ ଅଧିକାରୀ କହିଛନ୍ତି।